ନୂଆଦିଲ୍ଲୀ,୫।୨: ଥମିବାର ନା ନେଉନାହିଁ ଟି-୨୦ ବିଶ୍ୱକପ୍ ବିବାଦ। ଏହାରି ମଧ୍ୟରେ ଏହାକୁ ଆହୁରି ଜଟିଳ ଆତାକୁ ଟାଣି ନେଉଛି ବ୍ୟକ୍ତିବିଶେଷଙ୍କ ବୟାନ। ଏହାରି ମଧ୍ୟରେ ପୂର୍ବତନ ଇଂଲଣ୍ଡ ଅଧିନାୟକ ନାସର ହୁସେନ୍ଙ୍କ ଏକ ମନ୍ତବ୍ୟ କ୍ରିକେଟ ଜଗତରେ ନୂଆ ବିବାଦ ସୃଷ୍ଟି କରିଛି। ଭାରତ ପ୍ରତି ଆଇସିସି’ର ଆଭିମୁଖ୍ୟକୁ ନେଇ ସେ ପ୍ରଶ୍ନ ଉଠାଇଛନ୍ତି।
ଏକ ପୋଡ୍କାଷ୍ଟ୍ରେ ଆଲୋଚନା ବେଳେ ହୁସେନ୍ କହିଛନ୍ତି, “ଯଦି ଭାରତ ସରକାର କୌଣସି ଦେଶରେ ଖେଳିବାକୁ ମନା କରିଥାନ୍ତେ, ତେବେ ଆଇସିସି କ’ଣ ଭାରତକୁ ବିଶ୍ୱକପ୍ରୁ ବାହାର କରିଦେବାର ସାହସ କରିଥାନ୍ତା?” ସେ କହିଛନ୍ତି ଯେ ଆଇସିସି ସବୁ ଦଳ ପାଇଁ ସମାନ ନିୟମ ଆପଣାଇବା ଉଚିତ। ପାକିସ୍ତାନ, ବାଂଲାଦେଶ ଏବଂ ଭାରତକୁ ଭିନ୍ନ ଭିନ୍ନ ନଜରରେ ଦେଖିବା ଠିକ୍ ନୁହେଁ।
ସୁରକ୍ଷା କାରଣ ଦର୍ଶାଇ ଭାରତରେ ଖେଳିବାକୁ ବାଂଲାଦେଶ ମନା କରିବା ପରେ ଆଇସିସି ବାଂଲାଦେଶ ପରିବର୍ତ୍ତେ ସ୍କଟଲାଣ୍ଡକୁ ବିଶ୍ୱକପ୍ରେ ସ୍ଥାନ ଦେଇଛି। BCCI ନିର୍ଦ୍ଦେଶରେ ମୁସ୍ତାଫିଜୁର ରହମାନଙ୍କୁ ଆଇପିଏଲ୍ (IPL) ରୁ ହଟାଯିବା ପରେ ଏହି ବିବାଦ ଘନେଇଥିଲା। ବାଂଲାଦେଶରେ ହିନ୍ଦୁମାନଙ୍କ ଉପରେ ହେଉଥିବା ଆକ୍ରମଣକୁ ନେଇ ଭାରତୀୟ ବୋର୍ଡ ଏପରି ପଦକ୍ଷେପ ନେଇଥିବା ଚର୍ଚ୍ଚା ହେଉଛି।
ବାଂଲାଦେଶ ସହ ସଂହତି ପ୍ରକାଶ କରି ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ ଆସନ୍ତା ଫେବୃଆରୀ ୧୫ରେ କଲମ୍ବୋରେ ଭାରତ ବିପକ୍ଷରେ ହେବାକୁ ଥିବା ହାଇଭୋଲ୍ଟେଜ୍ ମ୍ୟାଚକୁ ବୟକଟ୍ କରିବାକୁ ଘୋଷଣା କରିଛନ୍ତି।
ନାସର ହୁସେନ୍ଙ୍କ ଏହି ମନ୍ତବ୍ୟକୁ ଅନେକ ସୋସିଆଲ ମିଡିଆ ବ୍ୟବହାରକାରୀ ସମାଲୋଚନା କରିଛନ୍ତି। ସେମାନେ ୨୦୦୩ ବିଶ୍ୱକପ୍ କଥା ମନେ ପକାଇ ଦେଇଛନ୍ତି, ଯେତେବେଳେ ଇଂଲଣ୍ଡ ନିଜେ ଜିମ୍ବାୱେ ସରକାରଙ୍କ ବିରୋଧରେ ସ୍ୱର ଉଠାଇ ମ୍ୟାଚ୍ ବୟକଟ୍ କରିଥିଲା। ହୁସେନ୍ଙ୍କ ମତରେ, ଭାରତ ପାଖରେ ଆର୍ଥିକ ଶକ୍ତି ଥାଇପାରେ, କିନ୍ତୁ ଶକ୍ତି ସହ ଦାୟିତ୍ୱବୋଧ ମଧ୍ୟ ଆସିବା ଉଚିତ।
