ଆବୁଧାବି,୪ା୧୨: ସ୍ବିନ ବୋଲର ସୁନିଲ ନାରିନ ପ୍ରଥମ ବୋଲର ଭାବେ ପ୍ରତିଯୋଗିତାମୂଳକ ଟି୨୦ କ୍ରିକେଟରେ ୬,୦୦ ଉଇକେଟ ହାସଲ କରିବାର ଗୌରବ ଅର୍ଜନ କରିଛନ୍ତି। ବୁଧବାର ଏକ ଆଇଏଲ୍ ଟି୨୦ ସେ ତାଙ୍କ ଫ୍ରାଞ୍ଚାଇଜ୍ ଆବୁଧାବୀ ନାଇଟ୍ ରାଇଡର୍ସ ପକ୍ଷରୁ ଶାରଜା ଓ୍ବାରିଅର୍ସ ବିପକ୍ଷରେ ଖେଳୁଥିବା ବେଳେ ସେ ଏହି ସମ୍ମାନଜନକ ମାଇଲ ଖୁଣ୍ଟ ହାସଲ କରିଛନ୍ତି।
ମ୍ୟାଚ ପରେ ଆବୁଧାବୀ ନାଇଟ୍ ରାଇଡର୍ସ ନାରିନଙ୍କୁ ୬୦୦ ନମ୍ବର ଲେଖାଥିବା ଏକ ସ୍ବତନ୍ତ୍ର ସଂସ୍କରଣ ଜର୍ସି ଉପହାର ଆକାରରେ ପ୍ରଦାନ କରିଥିଲା। ତ୍ରିନିଦାଦର ଏହି ୩୭ ବର୍ଷୀୟ କ୍ରିକେଟର ଟମ୍ ଆବେଲଙ୍କ ଉଇକେଟ ଅକ୍ତିଆର କରି ଏହି ମାଇଲଖୁଣ୍ଟ ହାସଲ କରିଛନ୍ତି।
ଏହି ସଫଳତା ପରେ ନାରିନ ନିଜକୁ ଟି୨୦ କ୍ରିକେଟର ଅନ୍ୟତମ ମହାନ ବୋଲର ଭାବେ ପ୍ରତିପାଦନ କରିଛନ୍ତି। ନାରିନ ବିଗତ ବର୍ଷ ଗୁଡିକରେ କୋଲକାତା ନାଇଟ ରାଇଡର୍ସ, ଆବୁଧାବି ନାଇଟ ରାଇଡର୍ସ, ତ୍ରିନ୍ବାଗୋ ନାଇଟ ରାଇଡର୍ସ ଓ ଲସ୍ଆଞ୍ଜେଲ୍ସ ନାଇଟ୍ ରାଇଡର୍ସ ଭଳି ଦଳରେ ପ୍ରତିନିଧିତ୍ୱ କରିଛନ୍ତି।
