ନୂଆଦିଲ୍ଲୀ, ୧୧।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କ୍ରମାଗତ ଭାବେ ସବୁଠାରୁ ଦୀର୍ଘ ସମୟ ପର୍ଯ୍ୟନ୍ତ ନିର୍ବାଚିତ ପ୍ରଧାନମନ୍ତ୍ରୀ ଭାବରେ ସେବା ପ୍ରଦାନ କରି ଏକ ନୂଆ ରେକର୍ଡ ସୃଷ୍ଟି କରିଛନ୍ତି। ୪,୩୯୯ ଦିନର କାର୍ଯ୍ୟକାଳ ସହିତ ସେ ଦେଶର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ରେକର୍ଡକୁ ପଛରେ ପକାଇ ଦେଇଛନ୍ତି। ଏହି ସଫଳତା ପାଇଁ ରୁଷିଆ ସମେତ ବିଶ୍ୱର ଅନେକ ଦେଶର ନେତା ତାଙ୍କୁ ଶୁଭେଚ୍ଛା ଜଣାଇଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ରୁଷିଆ ପିଏମ ମୋଦିଙ୍କୁ ‘ଡୋୟନ’ (Doyen) ବୋଲି ସମ୍ବୋଧନ କରିଛି। ଏହା ପରେ ଏହି ଶବ୍ଦଟି ଚର୍ଚ୍ଚାର ବିଷୟ ପାଲଟିଛି। ଆସନ୍ତୁ ଜାଣିବା, ପ୍ରକୃତରେ ‘ଡୋୟନ’ର ଅର୍ଥ କ’ଣ ଏବଂ ରୁଷିଆ ପ୍ରଧାନମନ୍ତ୍ରୀ ମୋଦିଙ୍କ ପାଇଁ ଏହି ଶବ୍ଦ କାହିଁକି ବ୍ୟବହାର କଲା।
ରୁଷିଆ ରାଷ୍ଟ୍ରପତିଙ୍କ କାର୍ଯ୍ୟାଳୟ ‘କ୍ରେମଲିନ’ର ମୁଖପାତ୍ର ଦିମିତ୍ରୀ ପେସ୍କୋଭ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଶୁଭେଚ୍ଛା ଜଣାଇ କହିଛନ୍ତି ଯେ, ଜୁନ ୧୦ ତାରିଖ ସୁଦ୍ଧା ସେ ସମସ୍ତ ଭାରତୀୟ ପ୍ରଧାନମନ୍ତ୍ରୀଙ୍କ ମଧ୍ୟରେ ସବୁଠାରୁ ଦୀର୍ଘ ସମୟ ଧରି ପଦବୀରେ ରହିଥିବା ନେତା ପାଲଟିଛନ୍ତି। ନିଜର ଏକ ଭିଡିଓ ବାର୍ତ୍ତାରେ ପେସ୍କୋଭ କହିଛନ୍ତି ଯେ, ‘ଡୋୟନ’ ସେହି ବ୍ୟକ୍ତିଙ୍କୁ କୁହାଯାଏ, ଯିଏ କୌଣସି ପଦବୀରେ ସବୁଠାରୁ ଦୀର୍ଘ ସମୟ ଧରି ରହିଥାନ୍ତି କିମ୍ବା ନିଜ କ୍ଷେତ୍ରରେ ସବୁଠାରୁ ବରିଷ୍ଠ ଏବଂ ଅଭିଜ୍ଞ ବୋଲି ବିବେଚିତ ହୁଅନ୍ତି। ଏହି କାରଣରୁ ପିଏମ ମୋଦିଙ୍କୁ ‘ଡୋୟନ ଅଫ ଇଣ୍ଡିଆନ ପ୍ରାଇମ ମିନିଷ୍ଟର୍ସ’ (ଭାରତୀୟ ପ୍ରଧାନମନ୍ତ୍ରୀମାନଙ୍କ ମଧ୍ୟରେ ସବୁଠାରୁ ବରିଷ୍ଠ/ଅଭିଜ୍ଞ) ବୋଲି କୁହାଯାଇଛି। ମସ୍କୋସ୍ଥିତ ଭାରତୀୟ ଦୂତାବାସ ମଧ୍ୟ ପେସ୍କୋଭଙ୍କର ଏହି ବାର୍ତ୍ତାକୁ ଶେୟାର୍ କରିଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କ୍ରମାଗତ ଭାବେ ୪,୩୯୯ ଦିନ ଧରି ପ୍ରଧାନମନ୍ତ୍ରୀ ପଦରେ ରହି ଏକ ନୂଆ ଇତିହାସ ରଚିଛନ୍ତି। ସେ ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ୪,୩୯୮ ଦିନର ରେକର୍ଡକୁ ଭାଙ୍ଗିଛନ୍ତି। ମୋଦି ପ୍ରଥମ ଥର ପାଇଁ ୨୬ ମେ ୨୦୧୪ରେ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ।