ମୁମ୍ବାଇ,୧୨।୪: ପ୍ରଖ୍ୟାତ ଗାୟିକା ଆଶା ଭୋସ୍ଲେଙ୍କ ପରଲୋକ ପରେ ସମଗ୍ର ଦେଶରେ ଶୋକର ଲହରୀ ଖେଳିଯାଇଛି। ରାଜନୈତିକ କ୍ଷେତ୍ରର ପ୍ରମୁଖ ବ୍ୟକ୍ତିବିଶେଷ ମଧ୍ୟ ତାଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସ, କେନ୍ଦ୍ର ମନ୍ତ୍ରୀ ନୀତିନ ଗଡ଼କରୀ ଏବଂ ଅନ୍ୟାନ୍ୟ ଅନେକ ନେତା ଆଶା ଭୋସ୍ଲେଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଶା ଭୋସ୍ଲେଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି। ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ତାଙ୍କ ସହିତ କିଛି ପୁରୁଣା ଫଟୋ ଶେୟାର କରି ସେ ଭାବପ୍ରବଣ ହୋଇ ସେ ଲେଖିଛନ୍ତି,ଭାରତର ସବୁଠାରୁ ପ୍ରସିଦ୍ଧ ଏବଂ ବହୁମୁଖୀ ସ୍ବର ମଧ୍ୟରୁ ଜଣେ ଆଶା ଭୋସ୍ଲେ ଜୀଙ୍କ ବିୟୋଗରେ ମୁଁ ଗଭୀର ଦୁଃଖିତ। ଦଶନ୍ଧି ଧରି ତାଙ୍କର ଅସାଧାରଣ ସଙ୍ଗୀତ ଯାତ୍ରା ଆମର ସାଂସ୍କୃତିକ ଐତିହ୍ୟକୁ ସମୃଦ୍ଧ କରିଥିଲା ଏବଂ ବିଶ୍ୱର ଅଗଣିତ ହୃଦୟକୁ ଛୁଇଁଥିଲା। ତାଙ୍କ ସ୍ବରରେ ସର୍ବଦା ଏକ ଅତୁଳନୀୟ ପ୍ରତିଭା ଥିଲା। ମୁଁ ତାଙ୍କ ସହିତ ମୋର ସାକ୍ଷାତର କିଛି ସ୍ମୃତିକୁ ସର୍ବଦା ମନେ ରଖିବି। ତାଙ୍କ ପରିବାର, ପ୍ରଶଂସକ ଏବଂ ସବୁଠି ସଙ୍ଗୀତ ପ୍ରେମୀଙ୍କ ପ୍ରତି ମୋର ଗଭୀର ସମବେଦନା। ସେ ଭବିଷ୍ୟତ ପିଢ଼ିକୁ ପ୍ରେରଣା ଦେଇ ଚାଲିବେ ଏବଂ ତାଙ୍କ ଗୀତଗୁଡ଼ିକ ଲୋକଙ୍କ ଜୀବନରେ ସର୍ବଦା ପ୍ରତିଧ୍ୱନିତ ହେବ।
ସୂଚନାଯୋଗ୍ୟ, ୯୨ ବର୍ଷୀୟା ଆଶା ଜୀଙ୍କର ଫୁସ୍ଫୁସ୍ଜନିତ ସମସ୍ୟା ଥିଲା। ତାଙ୍କୁ ହୃଦ୍ଘାତ ହେବାରୁ ହସ୍ପିଟାଲ ନିଆଯାଇଥିଲା। ସେଠାରେ ତାଙ୍କର ମୃତ୍ୟୁ ଘଟିଥିଲା। ୮ ଦଶନ୍ଧିର କ୍ୟାରିୟରରେ ଭୋସଲେ ତାଙ୍କର ବହୁମୁଖୀ ପ୍ରତିଭା ପାଇଁ ଜଣାଶୁଣା ଥିଲେ। ସେ ହେଉଛନ୍ତି ସ୍ବର୍ଗତା କିମ୍ବଦନ୍ତୀ ଗାୟିକା ଲତା ମଙ୍ଗେସ୍କରଙ୍କ ସାନ ଭଉଣୀ। ଆଶା ଭାସଲେଙ୍କ କେତେକ ଲୋକପ୍ରିୟ ଗୀତ ମଧ୍ୟରେ ରହିଛି ‘ଚୁରା ଲିୟା ହୈ ତୁମ୍ନେ ଜୋ ଦିଲ୍ କୋ’, ‘ଅଭି ନ ଯାଓ ଛୋଡ଼୍କର’, ଇନ୍ତହା ହୋ ଗଇ ଇନ୍ତେଜାର କୀ’। ସେ ବିଭିନ୍ନ ଭାରତୀୟ ଭାଷାରେ ୧୨,୦୦୦ରୁ ଊର୍ଦ୍ଧ୍ୱ ଗୀତ ରେକର୍ଡ କରାଇଥିଲେ। ମୀନା କୁମାରୀ, ମଧୁବାଲା, ଜିନତ ଅମନଙ୍କଠାରୁ ଆରମ୍ଭ କରି କାଜୋଲ, ଊର୍ମିଳା ମାତୋଣ୍ଡକର ଏବଂ ଦକ୍ଷିଣ ଭାରତୀୟ ଅଭିନେତ୍ରୀ ପଦ୍ମିନୀ ଓ ବୈଜୟନ୍ତିମାଲାଙ୍କ ସମେତ ବହୁ ଅଭିନେତ୍ରୀଙ୍କ ପାଇଁ ସେ ସ୍ବର ଦେଇଥିଲେ।
Deeply saddened by the passing of Asha Bhosle Ji, one of the most iconic and versatile voices India has ever known. Her extraordinary musical journey, spanning decades, enriched our cultural heritage and touched countless hearts across the world. Be it her soulful melodies or… pic.twitter.com/SbFrzf1Meu
— Narendra Modi (@narendramodi) April 12, 2026
Dharitri – Odisha’s No.1 Odia Daily
