ନୂଆଦିଲ୍ଲୀ,୭।୭: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମେଗା କ୍ୟାବିନେଟ ସମ୍ପ୍ରସାରଣ ବୁଧବାର ସନ୍ଧ୍ୟାରେ ହେବ। ଏଥିରେ ଅଧିକ ମହିଳା ଓ ପ୍ରଶାସନିକ ଅନୁଭୂତି ଥିବା ବ୍ୟକ୍ତିଙ୍କୁ ସ୍ଥାନ ମିଳିବ। ମୋଦି ସରକାରଙ୍କ ଦ୍ୱିତୀୟ ପାଳିର ଏହା ପ୍ରଥମ କ୍ୟାବିନେଟ ସମ୍ପ୍ରସାରଣ ହୋଇଥିବାରୁ ଏଥିରେ ସମସ୍ତଙ୍କ ନଜର ରହିଛି। ତେବେ ମୋଦିଙ୍କ ନୂଆ କ୍ୟାବିନେଟ ପାଇଁ ଏକ ବ୍ଲୁ ପ୍ରିଣ୍ଟ ପ୍ରସ୍ତୁତ କରାଯାଇଛି। ମିଳିଥିବା ସୂଚନା ଅନୁସାରେ ମୋଦିଙ୍କ ନୂଆ କ୍ୟାବିନେଟରେ ୪ଜଣ ପୂର୍ବତନ ମୁଖ୍ୟମନ୍ତ୍ରୀଙ୍କ ସହ ୧୮ଜଣ ରାଜ୍ୟମନ୍ତ୍ରୀଙ୍କୁ ବି ସ୍ଥାନ ଦିଆଯିବ। ସେହିପରି ୩୯ଜଣ ପୂର୍ବତନ ବିଧାୟକଙ୍କୁ ମଧ୍ୟ ମନ୍ତ୍ରିମଣ୍ଡଳରେ ସାମିଲ କରାଯିବ। ତେବେ ଏଥିରେ ଏଭଳି ଏମ୍ପି ୨୩ଜଣ ରହିଛନ୍ତି ଯେଉଁମାନେ ୩ଥରୁ କିମ୍ବା ଅଧିକ ଥର ନିର୍ବାଚନରେ ବିଜୟୀ ହୋଇଛନ୍ତି। ଏତଦ୍ ବ୍ୟତୀତ ୧୩ଜଣ ଓକିଲ, ୬ଜଣ ଡାକ୍ତର, ୫ଜଣ ଇଞ୍ଜିନିୟର ଓ ୭ଜଣ ପୂର୍ବତନ ପ୍ରଶାସନିକ ଅଧିକାରୀଙ୍କୁ କ୍ୟାବିନେଟରେ ସ୍ଥାନ ମିଳିବ। ଚଳିତ ଥର କ୍ୟାବିନେଟରେ ଯୁବବର୍ଗଙ୍କୁ ସ୍ଥାନ ଦିଆଯିବାକୁ ଉଦ୍ୟମ କରାଯାଇଥିବା ଜଣାପଡ଼ିଛି। ଏହି କ୍ୟାବିନେଟରେ ହାରାହାରି ବୟସ ୫୮ବର୍ଷ ରହିଥିବା ବେଳେ ଏଭଳି ୧୪ଜଣ ମନ୍ତ୍ରୀ ସାମିଲ ହୋଇଛନ୍ତି ଯେଉଁମାନଙ୍କର ବୟସ ୫୦ରୁ ବି କମ୍ ରହିଛି। ଅନ୍ୟପଟେ ମହିଳାଙ୍କୁ ଅଗ୍ରାଧିକାର ଦିଆଯାଇ ମନ୍ତ୍ରିମଣ୍ଡଳରେ ୧୧ଜଣ ମହିଳା ସାମିଲ ହେବେ ଏବଂ ସେଥିରୁ ୨ଜଣ କ୍ୟାବିନେଟ ମନ୍ତ୍ରୀ ହେବେ ବୋଲି ସୂଚନା ରହିଛି।
