ବଲାଙ୍ଗୀର,୨।୩( ସୁନିଲ କୁମାର ମହାନ୍ତି); ଦୋଳ ମହୋତ୍ସବ କେବଳ ବଲାଙ୍ଗୀରରେ ନୁହେଁ ସମଗ୍ର ଦେଶରେ ସମସ୍ତ ଜାତି, ଧର୍ମ, ବର୍ଣ୍ଣ ଲୋକେ ଏକତ୍ରିତ ହୋଇ ପାଳନ କରିଥାନ୍ତି । ଯାଦବ ସମାଜ ଏହି ପବିତ୍ର ପର୍ବ ପାଳନର ସୁତ୍ରଧର ସାଜି ଏହି ଉତ୍ସବର ମହତ୍ତ୍ୱକୁ ବଲାଙ୍ଗୀରବାସୀଙ୍କ ମଧ୍ୟରେ ସଂଚାର କରୁଛି । ଏ ଉତ୍ସବ ଅବସରରେ ସମଗ୍ର ଯାଦବ ସମାଜ ସମେତ ବଲାଙ୍ଗୀର ଜିଲାବାସୀଙ୍କୁ ମୁଁ ଶୁଭେଚ୍ଛା ଓ ଅଭିନନ୍ଦନ ଜଣାଇବା ସହ ପବିତ୍ର ଦୋଳ ମହୋତ୍ସବ ଆମ ଅଂଚଳରେ ଭାଇଚାରା ଓ ବିିକାଶର ବାର୍ତ୍ତାକୁ ସଂଚରିତ କରୁ ବୋଲି ଆଜି ପୌରାଞ୍ଚଳ ଯାଦବ ମହାସଭା ଦ୍ୱାରା ଆୟୋଜିତ ୩୦ତମ ଦୋଳ ମହୋତ୍ସବରେ ଯୋଗଦେଇ ପୂର୍ବତନ ଆଇନମନ୍ତ୍ରୀ ନରସିଂହ ମିଶ୍ର ନିଜ ପ୍ରତିକ୍ରିୟାରେ କହିଛନ୍ତି । ଏ ଅବସରରେ ସେ ଆହୁରି ମଧ୍ୟ କହିଛନ୍ତି ଯେ, ଯଦିଓ ଏହି ଉତ୍ସବ ଆୟୋଜନ ଯାଦବ ସମାଜ କରୁଛି , ତଥାପି ମଧ୍ୟ ଏଠାରେ ଆମ ଅଞ୍ଚଳର ପ୍ରତ୍ୟେକ ଜାତି, ଧର୍ମ, ବର୍ଣ୍ଣ ଲୋକେ ସମବେତ ହୋଇ ଭାଇଚାରା ବାର୍ତ୍ତା ବାଣ୍ଟୁଛନ୍ତି । ଏହି ଉତ୍ସବ ସମସ୍ତଙ୍କ ଭିତରେ ଏକତା ଭାବ ଉଦ୍ରେକ କରୁ ଯାହା ଦ୍ୱାରା ଆମେ ସମସ୍ତେ ଏକତ୍ରିତ ହୋଇ ଆମ ଅଞ୍ଚଳକୁ ପ୍ରତ୍ୟେକ କ୍ଷେତ୍ରରେ ବିକଶିତ କରିପାରିବା ।
ସୂଚନାଯୋଗ୍ୟ ଯେ ଜିଲା ଯାଦବ ସମାଜ ଓ ପୌରାଞ୍ଚଳ ଯାଦବ ସମାଜ ବଲାଙ୍ଗୀର ଦ୍ୱାରା ଗତ ୩୦ ବର୍ଷ ଧରି ଦୋଳ ମହୋତ୍ସବ ସୁରୁଖୁରୁରେ ମହାଆଡମ୍ବରରେ ପାଳନ କରାଯାଉଛି । ଯାଦବ ସମାଜ କାର୍ଯ୍ୟାଳୟରେ ଭଗବାନ ଶ୍ରୀକୃଷ୍ଣଙ୍କ ପୂଜାର୍ଚ୍ଚନା ସହ ଭଗବାନଙ୍କୁ ଦୋଳରେ ବସାଇ ଏହି ଦିନ ନଗର ପରିକ୍ରମା କରାଯାଇଥାଏ । ଏ ବର୍ଷ ଏହି ମହୋତ୍ସବର ମୁଖ୍ୟକର୍ତ୍ତା ଭାବରେ ଯୁବ ଯାଦବ ରାଧାରମଣ ବଗର୍ତ୍ତି ଓ ତାଙ୍କ ଧର୍ମପତ୍ନୀ ସୁଷମା ବଗର୍ତ୍ତି ଦାୟିତ୍ୱ ବହନ କରିଛନ୍ତି। ପୌରାଞ୍ଚଳ ଯୁବ ଯାଦବ ସଭାପତି ସନ୍ଦିପ ବାଗ୍ଙ୍କ ନେତୃତ୍ୱରେ ଆୟୋଜିତ ଏହି ଦୋଳ ମହୋତ୍ସବରେ ଖୁସିରାମ ଦିପ, ପ୍ରଦୀପ କୁମାର ଦାଶ, ପିଣ୍ଟୁ ମହାକୁର, ଭବାନି ଦିପ, ତ୍ରିନାଥ ଚନ୍ଦନ, ପ୍ରଫୁଲ୍ଲ ପୋଡ, ସଂପାଦକ ପ୍ରଶାନ୍ତ ଷାଣ୍ଢ, ଉପଦେଷ୍ଟା ସତ୍ୟନାରାୟଣ ବାଗ, ମହେନ୍ଦ୍ର ବାଗ ପ୍ରମୁଖ କାର୍ଯ୍ୟକ୍ରମ ଆୟୋଜନରେ ପ୍ରମୁଖ ଭୁମିକା ଗ୍ରହଣ କରିଛନ୍ତି । ଏହି ଦୋଳ ଉତ୍ସବରେ ଯାଦବ ସମାଜର ଅନେକ ଯୁବକ, ଛାତ୍ର, ମହିଳାଙ୍କ ସମେତ ସହରର ବିଭିନ୍ନ ରାଜନୈତିକ ନେତୃତ୍ୱମାନେ ଅଂଶଗ୍ରହଣ କରିଛନ୍ତି ।
