ଭୁବନେଶ୍ୱର, ୫ା୮(ବନ୍ଦନା ସେଠୀ):ଓଡ଼ିଶାର ପ୍ରଥମ ତଥା ଏକମାତ୍ର ମହିଳା ମୁଖ୍ୟମନ୍ତ୍ରୀ, ବରେଣ୍ୟ ସାହିତ୍ୟ ସାଧିକା ନନ୍ଦିନୀ ଶତପଥୀଙ୍କ ଶ୍ରାଦ୍ଧଦିବସ ଅବସରରେ ମଙ୍ଗଳବାର ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି। ଏହି ଅବସରରେ ବିଜୁ ଜନତା ଦଳ ସାଂସ୍କୃତିକ ସମନ୍ବୟ ସାମ୍ମୁଖ୍ୟ, ଓ୍ବି ଫର୍ ଭୁବନେଶ୍ୱର, ଉତ୍କଳ ସମ୍ମିଳନୀ ଓ ସିପିଆଇ ପକ୍ଷରୁ ଲୋକ ଭବନ ନିକଟ ଏଲ୍ଆଇସି ଛକସ୍ଥିତ ନନ୍ଦିନୀ ଦେବୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରାଯାଇଛି। କାର୍ଯ୍ୟକ୍ରମରେ ପୂର୍ବତନ ମନ୍ତ୍ରୀ ସୁରେଶ କୁମାର ରାଉତରାୟ ଯୋଗଦେଇ କହିଲେ, ନନ୍ଦିନୀଦେବୀ ଉତ୍କଳ ଦିବସକୁ ସରକାରୀ ଭାବରେ ପ୍ରଥମେ ପାଳନ କରିଥିଲେ। ଭୂମିହୀନମାନଙ୍କୁ ଜମି ବଣ୍ଟନକରି ଜମି ସଂସ୍କାର ଓ ଗରିବ କଲ୍ୟାଣ ପଦକ୍ଷେପ ନେଇଥିଲେ ବୋଲି ସେ କହିଥିଲେ।
ସମ୍ମିଳନୀର ରାଜ୍ୟ ସଭାପତି ଅନନ୍ତ ପ୍ରସାଦ ଜେନା ସଭାପତିତ୍ୱ କରି କହିଲେ, ନନ୍ଦିନୀଦେବୀ ସାହିତ୍ୟ, ସାମ୍ବାଦିକତା ଓ ରାଜନୀତି କ୍ଷେତ୍ରରେ ଜଣେ ପ୍ରବୀଣ ନାରୀ ନେତ୍ରୀ ଥିଲେ। ସେ ରାଜ୍ୟରେ ଅନେକ ନୂଆ ଧାରା ସୃଷ୍ଟି କରିଥିଲେ। ସାଧାରଣ ସମ୍ପାଦକ ତଥା ମଞ୍ଚଶ୍ୱର ଶିଳ୍ପାଞ୍ଚଳ ଶାଖା ସଭାପତି ଦିଲୀପ ଦାଶଶର୍ମା ସଂଯୋଜନା କରିଥିଲେ। ଲୌହମାନବୀ ନନ୍ଦିନୀ ଶତପଥୀ ମାତ୍ର ୮ ବର୍ଷ ବୟସରେ ୟୁନିୟନ ଜ୍ୟାକ୍ ଓହ୍ଲାଇଦେଇ ପୋଲିସଠାରୁ ଲାଠିମାଡ଼ ଖାଇଥିଲେ ବୋଲି ସେ ମତବ୍ୟକ୍ତ କରିଥିଲେ। ସଂସ୍କୃତି ବିଭାଗର ପୂର୍ବତନ ଅନୁସଚିବ ଲକ୍ଷ୍ମୀଧର ବେହେରା, ସମ୍ମିଳନୀର ରାଜ୍ୟ ଉପସଭାପତି ଡ. ସୁରେନ୍ଦ୍ର ମିଶ୍ର, ଶାଖା ଉପଦେଷ୍ଟା ନିମାଇଁ ଦାସ, ଶାଖା ଉପସଭାପତି ଶୀତଳ ଚନ୍ଦ୍ର ମହାନ୍ତି, ଅମୂଲ୍ୟ ସ୍ବାଇଁ, ବାସନ୍ତୀ ତ୍ରିପାଠୀ, ଅନୁପମା ବେହେରା ପ୍ରମୁଖ ବରପୁତ୍ରୀଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ।