ବାରଙ୍ଗ,୨ା୮(ଡି.ଏନ୍.ଏ.): ୩ ମାସ ଧରି ବନ୍ଦ ରହିଥିବା ନନ୍ଦନକାନନ ପ୍ରାଣୀ ଉଦ୍ୟାନ ୩ ତାରିଖ(ମଙ୍ଗଳବାର)ରେ ଖୋଲିବ। ଏନେଇ ନନ୍ଦନକାନନ ନିର୍ଦ୍ଦେଶକ ମନୋଜ କୁମାର ମହାପାତ୍ର ସୂଚନା ଦେଇଛନ୍ତି। ତେବେ ପର୍ଯ୍ୟଟକମାନେ ସଫାରି, ବ୍ୟାଟେରୀଚାଳିତ ଗାଡ଼ିରେ ବୁଲିବା, ବୋଟିଂର ସୁବିଧା ଏବେ ପାଇପାରିବେ ନାହିଁ। ପଶୁପକ୍ଷୀଙ୍କ ସୁରକ୍ଷା ଦୃଷ୍ଟିରୁ ପର୍ଯ୍ୟଟକମାନେ ନନ୍ଦନକାନନରେ ବୁଲିବା ବେଳେ କୌଣସି ଏନ୍କ୍ଲୋଜରକୁ ଯେପରି ନ ଛୁଇଁବେ ସେଥିପ୍ରତି ଗୁରୁତ୍ୱ ଦିଆଯାଇଛି। ଏଥିସହ ପ୍ରବେଶ ପଥରେ ଥର୍ମାଲ ସ୍କ୍ରିନିଂ, ସାମାଜିକ ଦୂରତ୍ୱ ଓ ମାସ୍କ ପରିଧାନକୁ ବାଧ୍ୟତାମୂଳକ କରାଯାଇଛି। ଥଣ୍ଡା, କାଶ ହେଉଥିବା ପର୍ଯ୍ୟଟକଙ୍କ ପ୍ରବେଶକୁ ବାରଣ କରାଯାଇଛି। କରୋନାର ଦ୍ୱିତୀୟ ଲହର ପାଇଁ ମେ’ ୧ରୁ ନନ୍ଦନକାନନକୁ ପର୍ଯ୍ୟଟକଙ୍କ ପ୍ରବେଶ ଉପରେ କଟକଣା କରାଯାଇଥିଲା। ରବିବାର ନିର୍ଦ୍ଦେଶକ ମହାପାତ୍ର ନନ୍ଦନକାନନ ପରିଦର୍ଶନରେ ଆସି ବିଭିନ୍ନ ସ୍ଥାନର ତର୍ଜମା କରିଛନ୍ତି। ବିଭିନ୍ନ ଦିଗକୁ ଚିନ୍ତା କରାଯାଇ ନନ୍ଦନକାନନ ଖୋଲିବାର ନିଷ୍ପତ୍ତି ନିଆଯାଇଛି। ଏହା ଦ୍ୱାରା ବ୍ୟବସାୟୀମାନେ ବି ରୋଜଗାରକ୍ଷମ ହୋଇପାରିବେ। ନନ୍ଦନକାନନ ପରିସରସ୍ଥ ପରିସ୍ରାଗାର ଓ ଶୌଚାଳୟକୁ ସଫା କରିବାକୁ କୁହାଯାଇଛି।
