ବାରଙ୍ଗ,୧୩।୮(ଡି.ଏନ୍.ଏ.): ନନ୍ଦନକାନନରେ ବୁଧବାର ବିଶ୍ୱ ହସ୍ତୀ ଦିବସ ନିରାଡ଼ମ୍ବରରେ ପାଳିତ ହୋଇଯାଇଛି। ମହାମାରୀ କରୋନା ପାଇଁ ସବୁ କିଛି ଫିକା ପଡ଼ିଯାଇଥିଲା। ଏଥର ହାତୀମାନଙ୍କୁ ସାଜସଜ୍ଜା କରାଯାଇ ନ ଥିଲା। କେବଳ ସେମାନଙ୍କୁ ସୁସ୍ବାଦ ଖାଦ୍ୟ ଖାଇବାକୁ ଦିଆଯାଇଥିଲା। ଏହାକୁ ହାତୀଶାଳରେ ହିଁ ପାଳନ କରାଯାଇଥିଲା। ହାତିଶାଳରେ ଥିବା ବସନ୍ତୀ, ପ୍ରେମା, ହୀରା ଉତ୍ସବରେ ସାମିଲ ହୋଇଥିବାବେଳେ ଡାକ୍ତରଖାନା ପାଖ ରେସ୍କ୍ୟୁ ସେଣ୍ଟରରେ ଥିବା ଛୁଆ ହାତୀ ମାମା ପାଖକୁ ନନ୍ଦନକାନନ ନିର୍ଦ୍ଦେଶକ ଶଶୀପଲ, ଉପନିର୍ଦ୍ଦେଶକ ବିମଳ ପ୍ରସନ୍ନ ଆଚାର୍ଯ୍ୟ, ସେଞ୍ଚୁରିଆନ ବିଶ୍ୱବିଦ୍ୟାଳୟର ଜୁଲୋଜି ବିଭାଗର ମୁଖ୍ୟ ଶିବପ୍ରସାଦ ପରିଡ଼ା, ପର୍ଯ୍ୟଟନ ପରିଚାଳନା ଦାୟିତ୍ୱରେ ଥିବା ଏସିଏଫ୍ ଅମୂଲ୍ୟ କୁମାର ପରିଡ଼ା ପ୍ରମୁଖ ଆସି ଖାଦ୍ୟ ଖାଇବାକୁ ଦେଇଥିଲେ। ଅନ୍ଲାଇନରେ ତିନୋଟି ପର୍ଯ୍ୟାୟରେ ମୋ ସାଙ୍ଗ ହାତୀ, ହାତୀଙ୍କ ଆବାସସ୍ଥଳୀ, ହାତୀ ସଂରକ୍ଷଣ ଆଦି ବିଷୟକୁ ନେଇ ଗତ ୫ରୁ ୧୧ତାରିଖ ପର୍ଯ୍ୟନ୍ତ ହୋଇଥିବା ପ୍ରତିଯୋଗିତାରେ କୃତୀ ପ୍ରତିଯୋଗୀମାନଙ୍କ ନାମ ଏହି ଅବସରରେ ଘୋଷଣା କରାଯାଇଥିଲା। ମାହୁନ୍ତମାନଙ୍କୁ ମଧ୍ୟ ପୁରସ୍କାର ପ୍ରଦାନ କରାଯିବା ସହ ହାତୀ ସୁରକ୍ଷାର ବାର୍ତ୍ତା ନନ୍ଦନକାନନ କର୍ତ୍ତୃପକ୍ଷ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଜନ୍ତୁ ବିଭାଗ ରେଞ୍ଜର ସୁଦୀପ୍ତ କୁମାର ପଣ୍ଡା, ଗନ୍ଥାଘର ଦାୟିତ୍ୱରେ ଥିବା ରେଞ୍ଜର ରଞ୍ଜନ କୁମାର ଦାସ, ଶିକ୍ଷା ଅଧିକାରୀ ମିଲନ କୁମାର ପଣ୍ଡା ପ୍ରମୁଖ ଉପସ୍ଥିତ ଥିଲେ।
