ଆନ୍ଧ୍ରପ୍ରଦେଶ-ତେଲେଙ୍ଗାନାରେ ୪୬ ଲକ୍ଷ ଲୋକଙ୍କ ନାମ ଭୋଟର ତାଲିକାରେ ନାହିଁ: ନୋଟିସ ଜାରି କଲେ ସୁପ୍ରିମ୍କୋର୍ଟ…
01 ନୂଆଦିଲ୍ଲୀ,୧୪।୧୨ : ଆନ୍ଧ୍ରପ୍ରଦେଶ ଏବଂ ତେଲେଙ୍ଗାନାର ଭୋଟର ତାଲିକାରୁ ୪୬ ଲକ୍ଷ ଲୋକଙ୍କ ନାମ ହଟାଇ ଦିଆଯାଇଛି। ଏନେଇ ସୁପ୍ରିମକୋର୍ଟରେ ଶୁଣାଣି ହୋଇଥିଲା। ଦାଖଲ ହୋଇଥିବା ଜନସ୍ବାର୍ଥ ମାମଲାର ଶୁଣାଣି ବେଳେ ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ କହିଛନ୍ତି ଯେ ଏହା ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ, ଆମେ ଏହାକୁ ଶୁଣିବା ଏବଂ ଜାଣିବା। ଏହି ମନ୍ତବ୍ୟ ସହିତ ବେଞ୍ଚ ସରକାର ଏବଂ ଅନ୍ୟ ପକ୍ଷକାରମାନଙ୍କୁ ନୋଟିସ ଜାରି କରିଛନ୍ତି।
ଆବେଦନକାରୀ ଶ୍ରୀନିବାସ କୋଡାଲି ତାଙ୍କ ପିଟିଶନରେ କହିଛନ୍ତି ଯେ ଭୋଟରଙ୍କ ପଞ୍ଜୀକରଣ ଏବଂ ପ୍ରୋଫାଇଲ ପାଇଁ ନିର୍ବାଚନ ଆୟୋଗ ଦାୟୀ, କାରଣ ଏହି କାର୍ଯ୍ୟ ଏବଂ ଅଧିକାର ତାଙ୍କ ସହିତ ଅଛି। ଏଥିପାଇଁ ଭୋଟର ଆଇଡି କୁ ଆଧାର କାର୍ଡ ସହିତ ଲିଙ୍କ କରିବା ଏବଂ ରେକର୍ଡ ରଖିବା ପାଇଁ ଆୟୋଗ କିଛି ଅଜ୍ଞାତ ସଫ୍ଟୱେୟାର ବ୍ୟବହାର କରିଥାନ୍ତି।
ଏହି ଆବେଦନରେ କୁହାଯାଇଛି ଯେ ନିର୍ବାଚନ ଆୟୋଗ ରାଜ୍ୟ ସରକାରଙ୍କୁ ସେହି ସଫ୍ଟୱେୟାରର ସୁବିଧା ପ୍ରଦାନ କରୁଛନ୍ତି, ଯାହା ଦ୍ୱାରା ସେମାନେ ଭୋଟର ତାଲିକାର ଫଟୋ ଛପାଇ ପାରିବେ। ଏହା ଉପରେ ନଜର ରଖିବା ପାଇଁ ଆୟୋଗ ଏକ ଦଳ ମଧ୍ୟ ଗଠନ କରିଛନ୍ତି, ତଥାପି ରାଜନୈତିକ ଦଳମାନେ ସେମାନଙ୍କର ପ୍ରୋଫାଇଲ ଏବଂ ସେମାନଙ୍କର ସ୍ବାର୍ଥ ଅନୁଯାୟୀ ଭୋଟରଙ୍କୁ ଟାର୍ଗେଟ କରୁଛନ୍ତି। ସେମାନଙ୍କୁ ନିର୍ବାଚନ ପ୍ରକ୍ରିୟାରୁ ଦୂରେଇ ରଖିବା ପାଇଁ ଏକ ଉପକରଣ ପ୍ରସ୍ତୁତ କରାଯାଉଛି। ମୁକ୍ତ ଏବଂ ନିରପେକ୍ଷ ନିର୍ବାଚନ ଦାବି ଉପରେ ଏହା ଏକ ପ୍ରଶ୍ନ ଚିହ୍ନ।
ଏହି ପ୍ରସଙ୍ଗରେ କୌଣସି ପ୍ରଭାବଶାଳୀ ଆଇନ ନ ଥିବାରୁ ଏହା ସମ୍ଭବ ବୋଲି ଆବେଦନକାରୀ କହିଛନ୍ତି। ଏହି କାରଣରୁ ଭୋଟର ତାଲିକାର ଯାଞ୍ଚ ସମ୍ଭବ ହୋଇ ପାରୁ ନାହିଁ। ଆବେଦନ ଅନୁଯାୟୀ ତେଲେଙ୍ଗାନାର ଭୋଟର ତାଲିକାରୁ ୨୭ ଲକ୍ଷ ଏବଂ ଆନ୍ଧ୍ରପ୍ରଦେଶରେ ୧୯ ଲକ୍ଷ ନାମ ହଟାଇ ଦିଆଯାଇଛି।
ସଫ୍ଟୱେୟାର ଇଞ୍ଜିନିୟର ଶ୍ରୀନିବାସ କୋଡାଲିଙ୍କ ଆବେଦନରେ ଦର୍ଶାଯାଇଛି ଯେ ଭୋଟରଙ୍କୁ ଚିହ୍ନଟ କରିବା ଏବଂ ଭୋଟର ତାଲିକାରେ ସଂଶୋଧନ କରିବା ପାଇଁ ନିର୍ବାଚନ ଆୟୋଗ ଦ୍ୱାରା ବ୍ୟବହୃତ ସଫ୍ଟୱେୟାର ସ୍ବଚ୍ଛ ନୁହେଁ। ଯେଉଁମାନଙ୍କ ନାମ ତାଲିକାରୁ କଟାଯାଇଛି ସେମାନଙ୍କ ମାମଲା ଉପସ୍ଥାପନ କରିବାର ସୁଯୋଗ ମଧ୍ୟ ଦିଆଯାଇ ନାହିଁ। ଏପରିକି ଆୟୋଗ କିମ୍ବା ଅନ୍ୟ କୌଣସି ଏଜେନ୍ସି ଭୋଟର ହେବାର ସମସ୍ତ ସର୍ତ୍ତ ପୂରଣ କରିଥିବା ଏହି ଭୋଟରଙ୍କୁ ସେମାନଙ୍କ ନାମ ବିଲୋପ ବିଷୟରେ ଅବଗତ କରାଇ ନାହାଁନ୍ତି, ଯାହାଫଳରେ ସେମାନେ ଉପଯୁକ୍ତ ପଦକ୍ଷେପ ଗ୍ରହଣ କରିପାରିବେ।
ସରକାର ଏବଂ ନିର୍ବାଚନ ଆୟୋଗଙ୍କୁ ନୋଟିସ ଜାରି କରୁଥିବାବେଳେ ପ୍ରଧାନବିଚାରପତି ଡି.ଓ୍ବାଇ.ଚନ୍ଦ୍ରଚୂଡ଼ ଏବଂ ବିଚାରପତି ପିଏସ୍ ନରସିହ୍ମାଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି ଯେ ଏହା ଏକ ଗୁରୁତର ପ୍ରସଙ୍ଗ, ଆମେ ଏହାର ଶୁଣାଣି କରିବୁ।