ଭୋପାଳ, ୧୬ା୨ (ପି.ଟି.)- ଭାରତର ପୂର୍ବତନ ଉଇକେଟକିପର ବ୍ୟାଟ୍ସମ୍ୟାନ ନମନ ଓଝା ସୋମବାର କ୍ରିକେଟର ସମସ୍ତ ଫର୍ମାଟରୁ ତାଙ୍କର ଅବସର ଘୋଷଣା କରିଛନ୍ତି। ଏହାଦ୍ୱାରା ଦୁଇ ଦଶନ୍ଧି ଘରୋଇ କ୍ୟାରିୟରର ପରିସମାପ୍ତି ଘଟିଛି। ମଧ୍ୟପ୍ରଦେଶର ଏହି ୩୭ବର୍ଷୀୟ କ୍ରିକେଟର ରଣଜୀ ଟ୍ରଫିରେ ଜଣେ ଉଇକେଟକିପର ହିସାବରେ ସର୍ବାଧିକ ଡିସ୍ମିସାଲ ପାଇଁ ରେକର୍ଡର ଅଧିକାରୀ ହୋଇଛନ୍ତି। ଭାରତ ତରଫରୁ ସେ ଗୋଟିଏ ଟେଷ୍ଟ, ଗୋଟିଏ ଅନ୍ତର୍ଜାତୀୟ ଦିନିକିଆ ଏବଂ ଦୁଇଟି ଅନ୍ତର୍ଜାତୀୟ ଟି୨୦ ଖେଳିଛନ୍ତି। ବହୁ ଦିନ ହେଲା ସେ ପିଠିରେ ଆଘାତଜନିତ ସମସ୍ୟାରେ ଥିଲେ। ଏକ ଭର୍ଚୁଆଲ ଖବରଦାତା ସମ୍ମିଳନୀରେ ସେ ତାଙ୍କ ଅବସର ଘୋଷଣା କରିଛନ୍ତି। ଓଝାଙ୍କ ଅନ୍ତର୍ଜାତୀୟ କ୍ୟାରିୟର ଭଲ ରହି ନ ଥିଲେ ମଧ୍ୟ ଉଜ୍ଜୟିନୀ ଜନ୍ମିତ ଏହି ଖେଳାଳି ୧୪୬ ପ୍ରଥମ ଶ୍ରେଣୀ ମ୍ୟାଚ ଖେଳି ୪୧.୬୭ ଆଭରେଜରେ ୨୨ଟି ଶତକ ସହ ୯,୭୫୩ ରନ ସଂଗ୍ରହ କରିଛନ୍ତି। ଘରୋଇ ସର୍କିଟରେ କିନ୍ତୁ ଏହି ଡାହାଣହାତୀ ବ୍ୟାଟ୍ସମ୍ୟାନଙ୍କର ଉଭୟ ବ୍ୟାଟିଂ ଓ ବୋଲିଂରେ ଜବରଦସ୍ତ ରହିଛି। ସେ ୧୪୩ ଲିଷ୍ଟ ଏ’ ଏବଂ ୧୮୨ ଟି୨୦ ଗେମ୍ରେ ୪,୨୭୮ ଏବଂ ୨,୯୭୨ ରନ କରିଛନ୍ତି। ଓଝା ମଧ୍ୟପ୍ରଦେଶ ତରଫରୁ ତାଙ୍କର ଶେଷ ରଣ୍ଜୀ ମ୍ୟାଚ ଗତବର୍ଷ ଜାନୁୟାରୀରେ ଉତ୍ତର ପ୍ରଦେଶ ତରଫରୁ ଖେଳିଥିଲେ। ଇନ୍ଦୋରରେ ଖେଳାଯାଇଥିବା ଏହି ରଣଜୀ ଟ୍ରଫି ଏଲିଟ୍ ଗ୍ରୁପ୍ ବି ମ୍ୟାଚରେ ମଧ୍ୟପ୍ରଦେଶ ଦଳର ଅଧିନାୟକତ୍ୱ କରିଥିଲେ। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ସେ ରାଜସ୍ଥାନ ରୟାଲ୍ସ, ସନରାଇଜର୍ସ ହାଇଦ୍ରାବାଦ ଏବଂ ଦିଲ୍ଲୀ ଡେୟାର ଡେଭିଲ୍ସ ଦଳ ତରଫରୁ ଖେଳିଛନ୍ତି।
