ବାଲେଶ୍ୱର,୧୨।୯(ମାନସ ବିଶ୍ୱାଳ): ବାଲେଶ୍ୱର ଫକୀରମୋହନ ବିଶ୍ୱବିଦ୍ୟାଳୟରେ ମଙ୍ଗଳବାର ନ୍ୟାସନାଲ ଆସେସମେଣ୍ଟ ଆଣ୍ଡ ଆକ୍ରିଡିଟେଶନ କାଉନସିଲ (ନାକ୍) ପିୟର ଟିମ୍ ପହଞ୍ଚିବେ। ବିଶ୍ୱବିଦ୍ୟାଳୟରେ ଶୈକ୍ଷିକ ବାତାବରଣ ତଥା ଶୈକ୍ଷିକ ଗୁଣବତ୍ତାକୁ ନାକ୍ ତରଫରୁ ଏକ ୬ ଜଣିଆ ପ୍ରତିନିଧି ଦଳ ମୂଲ୍ୟାୟନ କରିବାର କାର୍ଯ୍ୟକ୍ରମ ରହିଛି। ଏନେଇ ସମସ୍ତ ପ୍ରକାର ପ୍ରାକ୍ ପ୍ରସ୍ତୁତି ସରିଥିବା ବିଶ୍ୱବିଦ୍ୟାଳୟ କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠୀ ଏକ ପ୍ରେସ୍ ବିବୃତିରେ ସୂଚନା ଦେଇଛନ୍ତି।
ପ୍ରକାଶଯୋଗ୍ୟ, ଚଳିତବର୍ଷ ଫକୀର ମୋହନ ବିଶ୍ୱବିଦ୍ୟାଳୟରେ ସେକେଣ୍ଡ ସାଇକେଲ ନାକ୍ ପରିଦର୍ଶନର ଆୟୋଜନ କରାଯାଇଛି। ଏହି ପର୍ଯ୍ୟାୟରେ, ୨୦୧୬ରେ ବିଶ୍ୱବିଦ୍ୟାଳୟରେ ଫାଷ୍ଟ ସାଇକେଲ ନାକ୍ ପରିଦର୍ଶନର ଆୟୋଜନ କରାଯାଇଥିଲା। ସେପ୍ଟେମ୍ବର ୧୨ରୁ ୧୪ ତିନି ଦିନ ଧରି ଚାଲିବାକୁ ଥିବା ଏହି କାର୍ଯ୍ୟକ୍ରମରେ ନାକ୍ ପିୟର ଟିମ୍ ସଦସ୍ୟମାନଙ୍କ ଦ୍ୱାରା ବିଶ୍ୱବିଦ୍ୟାଳୟ ପକ୍ଷରୁ ଦାଖଲ କରାଯାଇଥିବା ସେଲ୍ଟ ଷ୍ଟଡ଼ି ରିପୋର୍ଟରେ ଉଲ୍ଲେଖ ଥିବା ଗୁଣାତ୍ମକମାନର ଯାଞ୍ଚ କରାଯିବା ସହ ଏହାର ସତ୍ୟାସତ୍ୟ ଆକଳନ କରାଯିବ ଓ ଏହି ଅନୁକ୍ରମରେ ମୂଲ୍ୟାୟନ କରାଯିବ। ଏହି ପରିପ୍ରେକ୍ଷୀରେ ନାକ୍ ପିୟର ଟିମ୍ ବିଶ୍ୱବିଦ୍ୟାଳୟରେ ଥିବା ବିଭିନ୍ନ ବିଭାଗ ସମୂହ ପରିଦର୍ଶନ କରିବା ସହ, ବିଶ୍ୱବିଦ୍ୟାଳୟର କୁଳପତି, କୁଳସଚିବ, ବିତ୍ତ ନିୟନ୍ତ୍ରକ, ପରୀକ୍ଷା ନିୟନ୍ତ୍ରକ, ବିଶ୍ୱବିଦ୍ୟାଳୟର ଇଣ୍ଟରନାଲ କ୍ୱାଲିଟି ଆସ୍ୟୁରେନ୍ସ ସେଲର ନିର୍ଦ୍ଦେଶକ, କଲେଜ ଡେଭଲପମେଣ୍ଟ କାଉନସିଲର ନିର୍ଦ୍ଦେଶକ, ଛାତ୍ର କଲ୍ୟାଣ ନିର୍ଦ୍ଦେଶକ ତଥା ବିଶ୍ୱବିଦ୍ୟାଳୟର ସ୍ନାତକୋତ୍ତର ପରିଷଦର ଅଧ୍ୟକ୍ଷଙ୍କ ସହ ଆଲୋଚନା କରିବେ। ଏଥିସହିତ ନାକ୍ର ପ୍ରତିନିଧିମାନେ ବିଶ୍ୱବିଦ୍ୟାଳୟରେ ଅଧ୍ୟୟନରତ ଛାତ୍ରୀଛାତ୍ର, ପ୍ରାକ୍ତନ ଛାତ୍ରୀଛାତ୍ର, ଶିକ୍ଷୟିତ୍ରୀଶିକ୍ଷକ, ଅଣଶିକ୍ଷକ କର୍ମଚାରୀମାନଙ୍କ ସହ ସାକ୍ଷାତ ଆଲୋଚନା କରିବେ। ନାକ୍ ଟିମ୍ର ପ୍ରତିନିଧିମାନେ ବିଶ୍ୱବିଦ୍ୟାଳୟରେ ଗଢ଼ି ଉଠିଥିବା ବିଭିନ୍ନ ଅନ୍ତଃନିର୍ମାଣ କାର୍ଯ୍ୟର ସମୀକ୍ଷା କରିବା ସହ ଏହାର ଗୁଣବତ୍ତା ମୂଲ୍ୟାୟନ କରିବାର କାର୍ଯ୍ୟକ୍ରମ ରହିଛି।
