କାଳିଆପାଣି,୧୭ା୫(ଡି.ଏନ.ଏ.): ଯାଜପୁର ଜିଲାର ନଗଡ଼ା ଏକଦା ଅପପୁଷ୍ଟିର ନିନ୍ଦା ମୁଣ୍ଡାଇଥିବାବେଳେ ଆଜି ପର୍ଯ୍ୟଟନସ୍ଥଳରେ ପରିଣତ ହେବାକୁ ଯାଉଛି। ଆଗାମୀ ଦିନରେ ପର୍ଯ୍ୟଟକମାନେ ପାହାଡ଼ ପାଦଦେଶରେ ଥିବା ସୁକିନ୍ଦାର ଆରାଧ୍ୟ ଦେବୀ ମା’ ଖଣ୍ଡୁରାଇଙ୍କ ଦର୍ଶନ କରିବେ। ଏହାପରେ ୬ କି.ମି. ପିଚୁ ରାସ୍ତାରେ ଯାଇ ପାହାଡ଼ ଶୀର୍ଷରେ ଥିବା ମହାଦେବଙ୍କ ଦର୍ଶନ କରିବା ସହ ମନୋରମ ଦୃଶ୍ୟକୁ ଉପଭୋଗ କରିବେ ବୋଲି ଗ୍ରାମ୍ୟ ଉନ୍ନୟନ ଓ ଦକ୍ଷତା ବିକାଶ ମନ୍ତ୍ରୀ ଇଂ. ପ୍ରୀତିରଞ୍ଜନ ଘଡ଼ାଇ ମହାଦେବ ମନ୍ଦିର ପ୍ରତିଷ୍ଠା ଉତ୍ସବରେ ଯୋଗଦେଇ ଏକଥା ପ୍ରକାଶ କରିଛନ୍ତି। ନଗଡ଼ା ଯିବା ରାସ୍ତାର ନାଲିଆଡ଼ାବାଠାରେ ମଙ୍ଗଳବାର ମହାଦେବ ମନ୍ଦିର ପ୍ରତିଷ୍ଠା ଉତ୍ସବ ଅନୁଷ୍ଠିତ ହୋଇଛି। ୩ ଦିନ ଧରି ପ୍ରତିଷ୍ଠା ଉତ୍ସବ ଚାଲିବାକୁ ଥିବାବେଳେ ପ୍ରଥମ ଦିନରେ ସ୍ଥାନୀୟ ଅଞ୍ଚଳର ୧ ହଜାରରୁ ଅଧିକ ମହିଳା ଯୋଗଦେଇଥିଲେ। ୫ରୁ ଊର୍ଦ୍ଧ୍ୱ ସଂକୀର୍ତ୍ତନ ଦଳ ସାମିଲ ହୋଇ ପ୍ରତିଷ୍ଠା ଉତ୍ସବକୁ ସରସ ସୁନ୍ଦର କରିଥିଲେ। ଶ୍ରମିକନେତା ନାରାୟଣ ଚନ୍ଦ୍ର ଧୀରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅନୁଷ୍ଠିତ ପ୍ରତିଷ୍ଠା ଉତ୍ସବରେ ଅନ୍ୟମାନଙ୍କ ମଧ୍ୟରେ ଉତ୍କଳ ସାମ୍ବାଦିକ ସଂଘ ରାଜ୍ୟ ସମ୍ପାଦକ ବିଶ୍ବଜିତ ନାୟକ, ଟାଟା ଷ୍ଟିଲ ମାଇନିଂର ସହପ୍ରଶାସନିକ ମୁଖ୍ୟ ସଞ୍ଜୀବ ସାହୁ, ଫେକର ବେଦାନ୍ତ କମ୍ପାନୀର ଲଜେଷ୍ଟିକ ମୁଖ୍ୟ ଅଜୟ କୁମାର ପାତ୍ର, ଖଣି ପରିଚାଳକ ସାରସ୍ବତ ନନ୍ଦ, ସୁକିନ୍ଦା ବ୍ଲକ ଅଧ୍ୟକ୍ଷ ଦିବ୍ୟରଞ୍ଜନ ବରାଳ, ଉପାଧ୍ୟକ୍ଷା ଭାଗ୍ୟଲକ୍ଷ୍ମୀ ରାଉତ, ପୂର୍ବତନ ସୁକିନ୍ଦା ବ୍ଲକ ଅଧ୍ୟକ୍ଷା ଭଗବତୀ ମହାନ୍ତଙ୍କ ସହ ବହୁ ପଞ୍ଚାୟତର ସରପଞ୍ଚ ଓ ସମିତିସଭ୍ୟମାନେ ସାମିଲ ହୋଇଥିଲେ। ନଗଡ଼ା ଅଞ୍ଚଳରେ କାହିଁ କେଉଁ କାଳରୁ ଶିବରାତ୍ରିରେ ଜାଗର ଯାତ୍ରା ୩ ଦିନ ଧରି ପାଳନ ହେଉଥିବାବେଳେ ମନ୍ତ୍ରୀ ଘଡ଼ାଇ ଓ ସ୍ଥାନୀୟ ଲୋକଙ୍କ ଉଦ୍ୟମରେ ୨୦୧୯ରେ ନାଲିଆଡାବାଠାରେ ମହାଦେବ ମନ୍ଦିର ନିର୍ମାଣ ପାଇଁ ଉଦ୍ୟମ ହୋଇଥିଲା। ମନ୍ତ୍ରୀ ଘଡ଼ାଇଙ୍କ ବ୍ୟକ୍ତିଗତ ଉଦ୍ୟମରେ ମନ୍ଦିର ନିମାଣ କାର୍ଯ୍ୟ ୨ ବର୍ଷରେ ଶେଷ ହୋଇଛି।
