ଚମ୍ପୁଆ,୫।୮(ଡି.ଏନ.ଏ)- ଜନସ୍ବାସ୍ୟ ବିଭାଗ ପକ୍ଷରୁ ଚମ୍ପୁଆ ଏନଏସି ବାସୀଙ୍କୁ ଗୋଳିଆ ପାନୀୟ ଜଳ ଯୋଗାଇ ଦିଆଯାଉଥିବାରୁ ଅସନ୍ତୋଷ ଦେଖାଦେଇଛି। ନିୟମିତ ଭାବେ ଏହି ପାନୀୟ ଜଳ ଯୋଗାଇ ଦିଆଯାଉଥିବାରୁ ଏନ୍ଏସି ବାସୀଙ୍କ ସ୍ବାସ୍ଥ୍ୟକୁ ନେଇ ବିଭାଗର ଦାୟିତ୍ୱ ପ୍ରତି ପ୍ରଶ୍ନ ଉଠିଛି। ବିଭାଗର ସ୍ବାସ୍ଥ୍ୟକର ପାନୀୟ ଜଳ ଯୋଗାଇ ଦେବାର ପ୍ରତିଶ୍ରୁତି ଏବେ ପାଣିର ଗାର ପାଲଟିଛି। ସୂଚନା ଅନୁସାରେ ଚମ୍ପୁଆ ଅଞ୍ଚଳରେ ପାନୀୟ ଜଳ ସମସ୍ୟା ସମାଧାନ ପାଇଁ ଏକ କମ୍ପାନି ପକ୍ଷରୁ ୮୦ ଲକ୍ଷ ଲିଟର କ୍ଷମତା ସମ୍ପନ୍ନ ଏକ ପାନୀୟ ଜଳ ପ୍ରକଳ୍ପ ନିର୍ମାଣ କରାଯାଇଛି। ଶୁଦ୍ଧ ପାନୀୟ ଜଳ ଯୋଗାଇବା ଲକ୍ଷ୍ୟ ନେଇ ଏହା ନିର୍ମାଣ କରାଯାଇଥିବା ବେଳେ ୬ ଲକ୍ଷ ଲିଟର କ୍ଷମତା ସମ୍ପନ୍ନ ଜଳ ସଂରକ୍ଷଣ ବ୍ୟବସ୍ଥା କରାଯାଇଛି। ମାତ୍ର କିଛି ଦିନ ହେବ ଉକ୍ତ ଟାଙ୍କିରୁ ଯୋଗାଇ ଦିଆଯାଉଥିବା ଜଳ ଗୋଳିଆ ଓ ପଟୁ ଆସୁଥିବା ଦେଖିବାକୁ ମିଳୁଛି। ଫଳରେ ସଂଯୋଗ ହୋଇଥିବା ଏନଏସି ବାସୀନ୍ଦାମାନେ କେତେକ ଏହାକୁ ଫୁଟାଇ ବ୍ୟବହାର କରୁଥିବା ବେଳେ କେତେକ ଛାଣି ବ୍ୟବହାର କରୁଛନ୍ତି। ଏସମ୍ପର୍କରେ ବିଭାଗୀୟ ଯନ୍ତ୍ରୀ କହିଛନ୍ତି ଯେ, ଖରା ଦିନେ ଏଭଳି ସମସ୍ୟା ହେଉ ନ ଥିବା ବେଳେ ବର୍ଷା ଦିନରେ ଏହି ସମସ୍ୟା ହେଉଛି। ନଦୀରେ ଥିବା ଇନଟେକ ୱେଲର ଗ୍ୟାଲେରୀ ଯୋଗୁ ଏହି ପାଣି ଗୋଳିଆ ଆସୁଛି। ଆମ୍ଭେ ତାକୁ ପିଏସି, ବ୍ଲିଚିଙ୍ଗ, ହାଲାମ ଓ ଆଦି ପକାଇ ସଫା କରୁଛୁ। ନିୟମିତ ଏହାକୁ ଫିଲଟରାଇଜ କରାଯାଉଥିଲେ ମଧ୍ୟ ବର୍ଷା ଯୋଗୁ ନଦୀରେ ଆସୁଥିବା ଗୋଳିଆ ପାଣି ପାଇଁ ଏହା ଗୋଳିଆ ହୋଇ ବାହାରୁଛି। ନିକଟ ଭବିଷ୍ୟତରେ ଗୋଧୂଳିଠାରେ ନିର୍ମାଣ କରାଯାଉଥିବା ୪୦ଲକ୍ଷ ଲିଟରର ୱାଟର ଟ୍ରିଟ୍ମେଣ୍ଟ ପ୍ଲାଣ୍ଟ କାଯର୍ୟକ୍ଷମ କରାଗଲେ ସ୍ବଚ୍ଛ ପାଣି ମିଳିପାରିବ।
