‘ମୋ ସ୍ତ୍ରୀ କାନ୍ଦୁଥିଲେ… ତା’ପରେ ମୋ ପାଖକୁ ଗୌତମ ଗମ୍ଭୀରଙ୍କ ଫୋନ ଆସିଲା…’ ଏମିତି କହି କାନ୍ଦି ପକାଇଲେ ସରଫରାଜ ଖାନ

ନୂଆଦିଲ୍ଲୀ,୨୧।୧୧: ସରଫରାଜ ଖାନ ବର୍ତ୍ତମାନ ଭାରତୀୟ ଦଳର ଅଂଶ ନୁହଁନ୍ତି। ପୂର୍ବତନ କ୍ରିକେଟର ଆକାଶ ଚୋପ୍ରାଙ୍କ ଶୋ’ ‘ବୈଠ ଔର୍‌ ବୋଲ’ (Baith Aur Bol) ରେ, ସରଫରାଜ ନିଜ କ୍ୟାରିୟରର ଏକ କଷ୍ଟଦାୟକ ସମୟ ବିଷୟରେ ଖୋଲି କହିଥିଲେ, ଯେତେବେଳେ ତାଙ୍କ ଉପରେ ଡ୍ରେସିଂ ରୁମର ତଥ୍ୟ ଲିକ କରିବାର ଅଭିଯୋଗ ଲାଗିଥିଲା। ସେହି ସମୟକୁ ମନେ ପକାଇ ସେ ବେଶ ଭାବବିହ୍ବଳ ହୋଇପଡ଼ିଥିଲେ ଏବଂ କହିଥିଲେ ଯେ, ତାଙ୍କର ନିଜର ଘନିଷ୍ଠ ଲୋକମାନେ ମଧ୍ୟ ତାଙ୍କ ଫୋନ କଲର ଉତ୍ତର ଦେବା ବନ୍ଦ କରିଦେଇଥିଲେ। ଗୌତମ ଗମ୍ଭୀର ଥିଲେ ପ୍ରଥମ ବ୍ୟକ୍ତି ଯିଏ ତାଙ୍କ ସହ ଯୋଗାଯୋଗ କରିଥିଲେ।
ଯେତେବେଳେ ଆକାଶ ଚୋପ୍ରା ତାଙ୍କୁ ତଥ୍ୟ ଲିକ କରିବା ଅଭିଯୋଗ ବିଷୟରେ ପଚାରିଲେ, ସରଫରାଜ କହିଲେ, ‘ପ୍ରଥମେ ମୁଁ ବହୁତ ଆଘାତ ପାଇଥିଲିମୁଁ ବୁଝିପାରୁ ନଥିଲି ଯେ ଏସବୁ କାହିଁକି ଘଟୁଛି। ମୁଁ ଏବେ ହିଁ ବିମାନରୁ ଓହ୍ଲାଇଥିଲି, ସେତିକିବେଳେ ମୋ ପାଖକୁ ଫୋନ କଲ ଓ ମେସେଜ ଆସିବା ଆରମ୍ଭ ହୋଇଗଲା ଏବଂ ସୋସିଆଲ ମିଡିଆରେ ଏହି ଖବର ପ୍ରଚାରିତ ହେବାକୁ ଲାଗିଲା। ବର୍ଡର-ଗାଭାସ୍କର ଟ୍ରଫି ସମୟରେ ମୁଁ ଆହତ ହୋଇଥିଲି ଏବଂ NCA (ନ୍ୟାସନାଲ କ୍ରିକେଟ ଏକାଡେମୀ) ରେ ମୋର ରିହାବିଲିଟେସନ (ପୁନର୍ବାସ ପ୍ରକ୍ରିୟା) ଚାଲିଥିଲା, ଠିକ ସେହି ସମୟରେ ଏହି ଖବର ସାମ୍ନାକୁ ଆସିଲା।’

ସେ ଆହୁରି ମଧ୍ୟ କହିଲେ, ‘ମୁଁ କାହା ସହ କଥା ହୋଇଥାନ୍ତି? ଏଥିରେ ସେପରି କିଛି ନଥିଲା; ଯଦି କିଛି ଥାଆନ୍ତା, ତେବେ ମୁଁ ପୁଣି ଥରେ ‘ଇଣ୍ଡିଆ-ଏ’ (India-A) ଦଳକୁ ଫେରିପାରି ନଥାନ୍ତି। ମୁଁ ନିକଟରେ ଶ୍ରୀଲଙ୍କା ଯାଇଥିଲି, ତେଣୁ ସୋସିଆଲ ମିଡିଆରେ ଏସବୁ କିପରି ଆରମ୍ଭ ହେଲା, ତାହା ମୁଁ ଜାଣେନାହିଁ। ସେହି ସମୟରେ ଏହା ମୋତେ ବହୁତ ବ୍ୟଥିତ କରିଥିଲା।’
ସରଫରାଜ କହିଲେ, ‘ଏଭଳି ପରିସ୍ଥିତିରେ କେହି ଆପଣଙ୍କ ଫୋନ କଲର ଉତ୍ତର ମଧ୍ୟ ଦିଅନ୍ତି ନାହିଁ। ଏହା ଏକ ଅତ୍ୟନ୍ତ କଷ୍ଟଦାୟକ ସମୟ ଥିଲାବିଶେଷକରି ମୋ ପରିବାର ପାଇଁ। ମୁଁ ସଂଘର୍ଷପୂର୍ଣ୍ଣ ଜୀବନ ବିତାଇବାକୁ ଅଭ୍ୟସ୍ତ, ତେଣୁ ମୁଁ ଏହାକୁ ସମ୍ଭାଳି ନେଇପାରିବି, କିନ୍ତୁ ମୋ ବାପାଙ୍କ ପାଇଁ ମୋତେ ବହୁତ ଖରାପ ଲାଗିଲା। ମୋ ପତ୍ନୀ, ଭାଇ ଏବଂ ମା’ଙ୍କ ପାଇଁ ମଧ୍ୟ ମୋତେ ଖରାପ ଲାଗିଲା। ସୋସିଆଲ ମିଡିଆରେ, ଛୋଟ ଛୋଟ କଥାକୁ ମଧ୍ୟ ଅତ୍ୟଧିକ ବଢ଼ାଇ ଚଢ଼ାଇ ଉପସ୍ଥାପନ କରାଯାଏ।’
ସରଫରାଜ ଖାନ କହିଲେ ଯେ, ଦୁଇ ଦିନ ପରେ ତାଙ୍କ ପାଖକୁ ଗୌତମ ଗମ୍ଭୀରଙ୍କ ଫୋନ ଆସିଥିଲା। ଗମ୍ଭୀର ତାଙ୍କୁ ନିଜ ଖେଳ ଉପରେ ଧ୍ୟାନ ଦେବାକୁ ପରାମର୍ଶ ଦେଇ କହିଲେ, ‘ସେସବୁ କଥା ଉପରେ ଧ୍ୟାନ ଦିଅ ନାହିଁ; ଏସବୁ କେବଳ ରାଜନୀତି।’ ସରଫରାଜ କହିଲେ, ‘ମୁଁ ତାଙ୍କୁ ଜଣାଇଲି ଯେ ମୋ ବାପା ବହୁତ ଦୁଃଖିତ ଅଛନ୍ତି ଏବଂ ମୋ ପତ୍ନୀ କାନ୍ଦୁଛନ୍ତି। ଏହା ଶୁଣି ସେ ମୋ ବାପାଙ୍କ ସହ କଥା ହେଲେ, ତାଙ୍କୁ ଆଶ୍ୱସ୍ତ କଲେ ଏବଂ କହିଲେ, ‘ସେ ଜଣେ ଭଲ କ୍ରିକେଟର, ତାକୁ ଖେଳିବାକୁ ଦିଅନ୍ତୁ; ଅନ୍ୟ ବିଷୟଗୁଡ଼ିକ ନେଇ ଚିନ୍ତା କରନ୍ତୁ ନାହିଁ।’

Dharitri – Odisha’s No.1 Odia Daily

Share