ଭୁବନେଶ୍ୱର,୨୮ା୧(ବ୍ୟୁରୋ): ପୁରୀ ସତ୍ୟବାଦୀ ନିର୍ବାଚନମଣ୍ଡଳୀ ଅଧୀନ ୬ ଜିଲା ପରିଷଦ ଜୋନ୍ରେ କଂଗ୍ରେସ ଗୋଟିଏ ହେଲେ ପ୍ରାର୍ଥୀ ନ ଦେବା ଘଟଣାରେ ପୂର୍ବତନ ପିସିସି ସଭାପତି ପ୍ରସାଦ ହରିଚନ୍ଦନ ମୁହଁ ଖୋଲିଛନ୍ତି। ଦଳ ପକ୍ଷରୁ ଟିକେଟ୍ ଦିଆଯିବା ସମ୍ପୂର୍ଣ୍ଣ ପିସିସି ସଭାପତିଙ୍କ ପ୍ରାଧିକୃତ। ପିସିସି ସଭାପତିଙ୍କ ସ୍ବାକ୍ଷରରେ ପ୍ରାର୍ଥୀଙ୍କୁ ଟିକେଟ୍ ଦିଆଯାଇଥାଏ। ଏହି ପ୍ରସଙ୍ଗରେ ଆଲୋଚନା ହେବାପରେ ମଧ୍ୟ ପିସିସି ପକ୍ଷରୁ ସ୍ପଷ୍ଟୀକରଣ ଦିଆ ନ ଯିବା ତାଙ୍କୁ ଆଶ୍ଚର୍ଯ୍ୟ କରୁଛି ବୋଲି ପ୍ରସାଦ କହିଛନ୍ତି।
ରୋଟାରି କ୍ଲବଠାରେ ଗୁରୁବାର ଏକ ଖବରଦାତା ସମ୍ମିଳନୀରେ ପ୍ରସାଦ ଭାବବିହ୍ବଳ ହୋଇ କାନ୍ଦି ପକାଇଥିଲେ। ସେ କହିଛନ୍ତି, ପଞ୍ଚାୟତ ନିର୍ବାଚନ ଲାଗି କଂଗ୍ରେସ ଭବନର ଜଣେ କର୍ମୀଙ୍କୁ ଟିକେଟ୍ ଦେଇ ତାଙ୍କ ପାଖକୁ ପଠାଯାଇଥିଲା। ହେଲେ ନିର୍ବାଚନମଣ୍ଡଳୀ ଦାୟିତ୍ୱ ବୁଝୁ ନ ଥିବାରୁ ଟିକେଟ ନେବାକୁ ସେ ମନା କରିଦେଇଥିଲେ। କିଛି ଗଣମାଧ୍ୟମରେ ପ୍ରସାରିତ ହୋଇଥିଲା ଯେ, ପ୍ରସାଦ ବିଜେଡି ଯିବେ ଓ ସେଥିପାଇଁ ସତ୍ୟବାଦୀକୁ କଂଗ୍ରେସ ଶୂନ୍ୟ କରିଦେଲେ। ସେ ଆଶା କରୁଥିଲେ, ଏହି ଖବର ସମ୍ପର୍କରେ ପିସିସି ସ୍ପଷ୍ଟୀକରଣ ରଖିବ। କିନ୍ତୁ ରଖିଲା ନାହିଁ। ୨୦୧୯ ସାଧାରଣ ନିର୍ବାଚନରେ ସତ୍ୟବାଦୀ ନିର୍ବାଚନମଣ୍ଡଳୀରୁ ଶୋଚନୀୟ ଭାବେ ପରାସ୍ତ ହୋଇଥିଲି। ସେ ସତ୍ୟବାଦୀରୁ ନିର୍ବାଚନ ନ ଲଢ଼ନ୍ତୁ ବୋଲି ପିସିସି ସଭାପତି ଚାହୁଁଥିଲେ। କିନ୍ତୁ ମୁଁ ପ୍ରଭାରୀଙ୍କୁ ନିର୍ବାଚନ ଲଢ଼ିବିନି ବୋଲି କହିବା ପରେ ମଧ୍ୟ ଅତର୍କିତ ଭାବେ ତାଙ୍କ ନାଁ ଘୋଷଣା କରାଗଲା, ଯାଦ୍ଦ୍ବାରା ସେ ପରାସ୍ତ ହେଲେ। ସେ ରାଜନୀତିରେ ଥିଲେ, ଅଛନ୍ତି ଓ ରହିବେ ବୋଲି କହିଛନ୍ତି। ଦୁଃଖର ବିଷୟ କଂଗ୍ରେସର ଲଢ଼େଇ ଭାଜପା ଓ ବିଜେଡି ସହ ହେବା କଥା। କିନ୍ତୁ ଏଠି କଂଗ୍ରେସର ଲଢେଇ କଂଗ୍ରେସ ସହ ହେଉଛି। ଦାୟିତ୍ୱ ଦିଆଯାଏ ନ ହେଲେ ନିଆଯାଏ, କାହା ଉପରେ ଲଦି ଦିଆଯାଏନି। ଆମେ ସବୁବେଳେ ସେଠାରୁ ଜିତୁଥିଲୁ। ଏଥର କିନ୍ତୁ ଜିଲା ସଭାପତି କି ବ୍ଲକ ସଭାପତି ଦିଆଗଲାନି। ଯେଉଁମାନେ ମୁଁ ଅସ୍ତ୍ର ତ୍ୟାଗ କରିଥିବା କଥା କହୁଛନ୍ତି ତାହା ଭୁଲ୍। କିଛି ଲୋକ ବିଜେଡିରେ ଯୋଗ ଦେଉଥିବା ନେଇ ଚର୍ଚ୍ଚା କରିଛନ୍ତି। ମୁଁ ସେମାନଙ୍କୁ ଚ୍ୟାଲେଞ୍ଜ କରୁଛି କି ସେମାନେ ଏହାର ପ୍ରମାଣ ଦିଅନ୍ତୁ। ଯେଉଁମାନଙ୍କ ନିକଟରେ ଖଣି ଏବଂ ଗଣମାଧ୍ୟମ ରହିଛି ସେମାନେ ଡିଲ୍ କରିବେ। ଏପରି କି ଅନେକ ଘର ଯଥା ବିଜେଡି, ଭାଜପା, ଜନତା ପାର୍ଟି, ସମୃଦ୍ଧ ଓଡିଶା, ଓଜିପି ଯାଇକି ଆସିଛନ୍ତି ଆଜି ସେମାନେ ଅଧିକ କଥା କହୁଛନ୍ତି। ସେମାନଙ୍କ ମଧ୍ୟରୁ କିଏ ୩ ଥର, କିଏ ୫ ଥର କିଏ ୬ ଥର ଘର ବଦଳେଇଛନ୍ତି। ସେମାନେ ଆଜି ମୋ ବିଷୟରେ ଅପପ୍ରଚାର କରୁଛନ୍ତି ବୋଲି ପ୍ରସାଦ ଅଭିଯୋଗ କରିଛନ୍ତି। ମୋ ପାଖରେ ବହୁ ଦସ୍ତାବିଜ ଅଛି। ନିର୍ବାଚନ ପରେ ଅନେକଙ୍କ ଗୁମର ଖୋଲବି। ୩ ବର୍ଷ ହେଲା ଘରୁ ବାହାରୁନି ବୋଲି ଅନେକେ ଅଭିଯୋଗ କରୁଛନ୍ତି। ୩ ବର୍ଷ ନୁହେଁ, ୩୩ ବର୍ଷ ହେଲା ଘରୁ ବାହାରି ନାହିଁ। ଆଉ ମୋ ଘର ହେଉଛି କଂଗ୍ରେସ ଭବନ। ୨୦୦୨ରୁ ମୋତେ ଅନ୍ୟ ଦଳକୁ ନେବା ପାଇଁ ଚେଷ୍ଟା ହୋଇଥିଲେ ମଧ୍ୟ କଂଗ୍ରେସ ସହ ରହିଛି ବୋଲି ପ୍ରସାଦ କହିବା ସହ ୨୦୨୪ରେ ସାଧାରଣ ନିର୍ବାଚନ ଲଢ଼ିବେ ନାହିଁ ବୋଲି କହିଛନ୍ତି।
