ଚଣ୍ଡୀଗଡ଼,୨।୧।୬: ମୁସ୍ଲିମ ଶରିଆ ଆଇନ ଅନୁସାରେ ମୁସଲମାନ ଝିଅ ୧୬ ବର୍ଷରେ ବିବାହ କରିବା ବୈଧ ବୋଲି ପଞ୍ଜାବ ଓ ହରିୟାଣା ହାଇକୋର୍ଟ ସୋମବାର ଏକ ମାମଲାର ଶୁଣାଣି କରି ରାୟ ଦେଇଛନ୍ତି। ଏଥିସହ ବିବାହ କରିଥିବା ଜଣେ ୧୬ ବର୍ଷୀୟା ବାଳିକା ଏବଂ ୨୧ ବର୍ଷୀୟ ଯୁବକଙ୍କୁ ସୁରକ୍ଷା ପ୍ରଦାନ ପାଇଁ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ୍ ଜସ୍ଜିତ୍ ସିଂ ବେଦିଙ୍କ ଏକକ ଖଣ୍ଡପୀଠ ପଠାନ୍କୋଟର ଏକ ମୁସଲମାନ ଦମ୍ପତିଙ୍କ ଆବେଦନର ଶୁଣାଣି କରି କହିଛନ୍ତି, ପରିବାର ଇଚ୍ଛା ବିରୋଧରେ ବିବାହ କରିଥିବା ଏହି ଯୋଡ଼ିଙ୍କୁ ସମ୍ବିଧାନ ପ୍ରଦତ୍ତ ଅଧିକାରରୁ ବଞ୍ଚତ୍ତ କରାଯାଇପାରିବ ନାହିଁ। ଇସ୍ଲାମିକ ଶରିଆ ଆଇନ ଅନୁସାରେ ମୁସ୍ଲିମ୍ ପର୍ସନାଲ ଲ’ ଦ୍ୱାରା ମୁସଲମାନ ଯୁବତୀଙ୍କ ବିବାହ ପରିଚାଳିତ ହୋଇଥାଏ। ଦିନେଶ ଫାର୍ଦୁଞ୍ଜି ମୁଲ୍ଲାଙ୍କ ପୁସ୍ତକ ‘ପ୍ରିନ୍ସିପଲ୍ସ ଅଫ୍ ମହମ୍ମେଦାନ୍ ଲ’ର ଅନୁଚ୍ଛେଦ ୧୯୫ ଅନୁସାରେ ୧୬ ବର୍ଷରୁ ଊର୍ଦ୍ଧ୍ୱ ମୁସଲମାନ ଝିଅ ୨୧ ବର୍ଷରୁ ଊର୍ଦ୍ଧ୍ୱ ପୁଅଙ୍କୁ ବିବାହ କରିପାରିବେ, ଯାହା କି ମୁସ୍ଲିମ୍ ପର୍ସନାଲ ଲ’ ରେ ଧାର୍ଯ୍ୟ ହୋଇଥିବା ହାଇକୋର୍ଟ କହିଛନ୍ତି। ମାମଲା ଅନୁଯାୟୀ, ମୁସଲମାନ ରୀତିନୀତିରେ ଗତ ୮ ତାରିଖରେ ୧୬ ବର୍ଷୀୟା ବାଳିକା ଏବଂ ୨୧ ବର୍ଷୀୟ ଯୁବକ ବିବାହ କରିଥିଲେ। ତେବେ ପରିବାର ଲୋକ ଏହି ବିବାହକୁ ବିରୋଧ କରିଥିଲେ। ସେମାନଙ୍କ ବିନା ଅନୁମତିରେ ବାହାଘର ହୋଇଥିବାରୁ ଏହି ଦମ୍ପତିଙ୍କୁ ବାରମ୍ବାର ଧମକ ଦିଆଯାଉଥିଲା। ଫଳରେ ଉଭୟେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
