ଚେନ୍ନାଇ,୧୩।୪: ପଶ୍ଚିମବଙ୍ଗର ମୁର୍ଶିଦାବାଦରେ ନୂତନ ୱାକଫ ଆଇନ ବିରୋଧରେ ବଡ଼ ଧରଣର ହିଂସା ଘଟିଛି। ଯେଉଁଥିରେ ୩ ଜଣ ପ୍ରାଣ ହରାଇଥିଲା ବେଳେ ଅନେକ ଆହତ ହୋଇଛନ୍ତି। ହିଂସା ଘଟଣା ପାଇଁ ତୃଣମୂଳ କଂଗ୍ରେସ (ଟିଏମସି) ଭାଜପାକୁ ଦାୟୀ କରୁଛି। ଅନ୍ୟପଟେ ଭାଜପା ଏହାକୁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତୁଷ୍ଟିକରଣ ରାଜନୀତିର ଫଳାଫଳ ବୋଲି କହିଛି।
ମୁର୍ଶିଦାବାଦ ହିଂସା ସମ୍ପର୍କରେ ଟିଏମସି ବିଧାୟକ ମଦନ ମିତ୍ର ଏକ ବିବାଦୀୟ ବୟାନ ଦେଇଛନ୍ତି। ଗଣମାଧ୍ୟମ ସହିତ କଥାବାର୍ତ୍ତା ସମୟରେ ଟିଏମସି ବିଧାୟକ ମଦନ ମିତ୍ର କହିଛନ୍ତି, ‘ଭାଜପା ନେତାମାନେ ବଙ୍ଗଳାରେ ଅଯଥା କଥା କହି ହିଂସା ସୃଷ୍ଟି କରିବାକୁ ଚାହୁଁଛନ୍ତି। ଯେତେ ଛୋଟ ହିଂସା ହେଉ, ତାହା ସମସ୍ତ ରାଜ୍ୟରେ ଘଟେ। ଏହାର ଦାୟିତ୍ୱ କେନ୍ଦ୍ର ସରକାରଙ୍କ ଉପରେ ରହିଥାଏ। ଏପରି ଏକ ୱାକଫ ଆଇନ ଆଣି ୨୦୨୬ ପଶ୍ଚିମବଙ୍ଗ ନିର୍ବାଚନ ପୂର୍ବରୁ, ଭାଜପା ନେତାମାନେ ଦଙ୍ଗା ସୃଷ୍ଟି କରିବାକୁ ଏବଂ ପାକିସ୍ତାନ ସହିତ ଯୁଦ୍ଧ କରିବାକୁ ଚାହୁଁଛନ୍ତି।
ଟିଏମସି ବିଧାୟକ ମଦନ ମିତ୍ର କହିଛନ୍ତି, ‘ଦେଶରେ ଯାହା ବି ଦଙ୍ଗା ହେଉଛି, ସେଥିପାଇଁ ଅମିତ ଶାହ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଯୋଗୀ ଆଦିତ୍ୟନାଥ ଦାୟୀ।’ ଯଦି ଏହି ପ୍ରକାରର ହିଂସାରେ କେହି ନିଜ ଜୀବନ ହରାନ୍ତି, ତେବେ ଏହା ଭୁଲ। ଯେପର୍ଯ୍ୟନ୍ତ ମମତା ବାନାର୍ଜୀ ଅଛନ୍ତି, ସେପର୍ଯ୍ୟନ୍ତ ବଙ୍ଗଳାରେ କୌଣସି ସ୍ଥାନରେ ହିଂସା ହୋଇପାରିବ ନାହିଁ। ମମତା ବାନାର୍ଜୀ ସମସ୍ତଙ୍କୁ ସାଙ୍ଗରେ ନେଇ ଚାଲିଛନ୍ତି।
ବଙ୍ଗଳା ହିଂସାର ରିପୋର୍ଟ ମଧ୍ୟରେ, ଭାଜପା ନେତା ଦିଲୀପ ଘୋଷ ଗଣମାଧ୍ୟମକୁ କହିଛନ୍ତି, ‘ମୁର୍ଶିଦାବାଦ ଜିଲାକୁ ପଶ୍ଚିମବଙ୍ଗରୁ ଅଲଗା କରିବାର ଷଡଯନ୍ତ୍ର ଚାଲିଛି। ହିନ୍ଦୁ ଅଞ୍ଚଳରେ ପୋଡ଼ାଜଳା ଏବଂ ଭଙ୍ଗାରୁଜା ହେଉଛି। ହିନ୍ଦୁମାନଙ୍କୁ ହତ୍ୟା କରାଯାଇଛି, ତଥାପି ବଙ୍ଗଳାର ଡିଜିପି କହୁଛନ୍ତି ଯେ କିଛି ହୋଇନାହିଁ।
ୱାକଫ ଆଇନକୁ ବିରୋଧ କରି ଶୁକ୍ରବାର ମାଲଦା, ମୁର୍ଶିଦାବାଦ, ଦକ୍ଷିଣ ୨୪ ପରଗନା ଏବଂ ହୁଗଲି ଜିଲାରେ ହିଂସା ଘଟିଥିଲା ଏବଂ ଏକ ପୋଲିସ ଭ୍ୟାନ ସମେତ ଅନେକ ଗାଡ଼ି ପୋଡ଼ି ଦିଆଯାଇଥିଲା। ଏପର୍ୟ୍ୟନ୍ତ, ମୁର୍ଶିଦାବାଦ ଜିଲାର ହିଂସା ପ୍ରଭାବିତ ଅଞ୍ଚଳରେ ସଂଘର୍ଷ ସମୟରେ ୩ ଜଣଙ୍କର ମୃତ୍ୟୁ ହୋଇଛି। ଶମଶେରଗଞ୍ଜରେ ୨ ଜଣ ଏବଂ ମୁର୍ଶିଦାବାଦ ମେଡିକାଲ କଲେଜରେ ଜଣେ ପ୍ରାଣ ହରାଇଛନ୍ତି।
