ଢେଙ୍କାନାଳ ଅଫିସ, ୨୬।୬
ଢେଙ୍କାନାଳ ସଦର ଥାନା ତରଭା ଫାଣ୍ଡି ଅଞ୍ଚଳର ବହୁଚର୍ଚ୍ଚିତ ଚିକୁନ ବିଶ୍ୱାଳ (୩୩) ହତ୍ୟାକାଣ୍ଡର ପର୍ଦ୍ଦାଫାଶ ହୋଇଛି। ଘଟଣାର ୧୧ଦିନ ପରେ ପୋଲିସ ହାତରେ ଧରାପଡ଼ିଛନ୍ତି ୫ ଅଭିଯୁକ୍ତ। ସେମାନେ ହେଲେ କାଙ୍କଡ଼ପାଳ ଗ୍ରାମର ଲିପୁନ କୁମାର ସାସ୍ମଲ (୩୨), ପ୍ରଶାନ୍ତ କୁମାର ସାହୁ(୪୬), ବ୍ରହ୍ମାନନ୍ଦ ସାସମଲ ଓରଫ୍ ହାଲୁଆ (୨୭), ଅଜୟ ସାହୁ ଓରଫ୍ କୁଲୁ (୩୧), ଢେଙ୍କାନାଳ ସହରସ୍ଥିତ ବାଜିଚୌକ ଅଞ୍ଚଳର ଶ୍ରୀକାନ୍ତ ରଣା ଓରଫ୍ ବଳି (୩୨)। ହତ୍ୟାକାଣ୍ଡରେ ବ୍ୟବହୃତ ଠେଙ୍ଗା, ଗରା, ପଥର ଜବତ ହୋଇଛି। ଏହି ଘଟଣାରେ ଅନ୍ୟ ୬ ଅଭିଯୁକ୍ତ ଫେରାର ଅଛନ୍ତି। ସାମାନ୍ୟ ବଚସାକୁ କେନ୍ଦ୍ର କରି ଏହି ହତ୍ୟାକାଣ୍ଡ ଘଟିଥିବା ଗୁରୁବାର ଅପରାହ୍ନରେ ସଦର ଥାନା ପରିସରରେ ଆୟୋଜିତ ଏକ ଖବରଦାତା ସମ୍ମିଳନୀରେ ଅତିରିକ୍ତ ଏସ୍ପି ବିନୟକୃଷ୍ଣ କାମିଲା ସୂଚନା ଦେଇଛନ୍ତି।
ଜୁନ୍ ୧୧ ରଜ ଅବସରରେ ତରଭା ଗ୍ରାମର ପ୍ରକାଶ ଚନ୍ଦ୍ର ବିଶ୍ୱାଳ ଏବଂ ତାଙ୍କ ଦାଦା ପୁଅ ଭାଇ ଜଗନ ବିଶ୍ୱାଳ ଅପରାହ୍ନ ୪ଟାରେ ରାଇପୁର ଛକକୁ ଗ୍ରସେରି ସାମଗ୍ରୀ ଆଣିବାକୁ ଯାଇଥିଲେ। ଏହି ସମୟରେ ସୋନୁ, ଲିପୁନଙ୍କ ସମେତ ସେଠାରେ ଉପସ୍ଥିତ ୭-୮ଜଣ ଯୁବକଙ୍କ ସହ କୌଣସି କାରଣରୁ ସେମାନଙ୍କ ବଚସା ହୋଇଥିଲା। ଉଭୟେ ଏହାର ପ୍ରତିବାଦ କରିବାରୁ ଯୁବକମାନେ ନିସ୍ତୁକ ମାଡ଼ ମାରିବା ସହ ସେମାନଙ୍କ ବାଇକ୍ ଭଙ୍ଗାରୁଜା କରିଥିଲେ। ଅଭିଯୁକ୍ତମାନେ ଜଗନଙ୍କୁ ମରଣାନ୍ତକ ଆକ୍ରମଣ କରୁଥିବାବେଳେ ପୁତୁରା ଚିକୁନ ପହଞ୍ଚତ୍ ଏହାର ତୀବ୍ର ପ୍ରତିବାଦ କରିଥିଲେ। ଏହି ସମୟରେ ଆକ୍ରମଣକାରୀମାନେ ଚିକୁନଙ୍କୁ ଏକ ଗାଡିରେ ବସାଇ ନେଇଯାଇ ବେଲଗୁଣ୍ଠା ନିକଟରେ ଠେଙ୍ଗା, ପାଣିଗରା ଓ ପଥରରେ ଛେଚି ଲହୁଲୁହାଣ କରିଦେଇଥିଲେ। ଗୁରୁତର ଅବସ୍ଥାରେ ଅଭିଯୁକ୍ତମାନେ ତାଙ୍କୁ ଜିଲା ଚିକିତ୍ସାଳୟରେ ଛାଡ଼ି ଦେଇ ପଳାଇଥିଲେ। ସଙ୍କଟାପନ୍ନ ଅବସ୍ଥାରେ ଚିକୁନ୍ଙ୍କୁ କଟକ ସ୍ଥାନାନ୍ତର କରାଯାଇଥିବାବେଳେ ବିଳମ୍ବିତ ରାତିରେ ତାଙ୍କର ମୃତ୍ୟୁ ହୋଇଯାଇଥିଲା। ଏହି ଘଟଣାକୁ ନେଇ ଗ୍ରାମରେ ତୀବ୍ର ଉତ୍ତେଜନା ଦେଖାଦେଇଥିଲା। ପ୍ରକାଶଙ୍କ ଅଭିଯୋଗ କ୍ରମେ ନଂ. ୨୨୫/୨୦, ଦଫା ୩୪୧, ୨୯୪, ୩୨୩, ୩୨୫, ୪୨୭, ୩୬୩, ୩୨୦, ୫୦୬ ଓ ୩୪ରେ ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଥିଲା। ଏସ୍ପି ଅନୁପମା ଜେମ୍ସଙ୍କ ନେତୃତ୍ୱରେ ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ଅଭିଯୁକ୍ତଙ୍କୁ ଗିରଫ କରିଥିଲା। ଅଭିଯୁକ୍ତ ଲିପୁନ ଏବଂ ଶ୍ରୀକାନ୍ତ ପେସାଦାର ଅପରାଧୀ। ସେମାନଙ୍କ ନାମରେ ସଦର ଏବଂ ଟାଉନ୍ ଥାନାରେ ଯଥାକ୍ରମ ୮ ଏବଂ ୧୩ଟି ମାମଲା ରହିଛି। ଅନ୍ୟତମ ଅଭିଯୁକ୍ତ ସତ୍ୟ ପ୍ରକାଶ ରାଉତ ଓରଫ୍ ସୋନୁଙ୍କ ସମେତ ୬ଜଣ ଫେରାର ଅଛନ୍ତି। ଖବରଦାତା ସମ୍ମିଳନୀରେ ଏସ୍ଡିପିଓ ଶ୍ରୀହର୍ଷ ମିଶ୍ର, ଥାନାଧିକାରୀ ସନ୍ଧ୍ୟାରାଣୀ ବେଉରିଆ ଉପସ୍ଥିତ ଥିଲେ।
