ଦେବଗଡ଼,୬।୫(ଶଶାଙ୍କ ଶେଖର ଝାଙ୍କର): ପୂର୍ବ ଶତ୍ରୁତାକୁ କେନ୍ଦ୍ରକରି ଦେବଗଡ଼ ଥାନା ଚଟିବରଘାଟ ଗ୍ରାମ ନିକଟସ୍ଥ ୪୯ ନମ୍ବର ଜାତୀୟ ରାଜପଥ ଉପରେ ହାଇୱାରେ ଧକ୍କା ଦେଇ ସ୍କୁଟି ଚାଳକ ରିଆମାଳ ଥାନା ମହେନ୍ଦ୍ରପୁର ଗ୍ରାମର କାର୍ତ୍ତିକ ଓରାମଙ୍କୁ ହତ୍ୟା କରାଯାଇଥିବା ଦେବଗଡ଼ ଥାନାରେ ଅଭିଯୋଗ ହୋଇଥିଲା। ଦେବଗଡ଼ ଥାନା ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ଉକ୍ତ ଘଟଣାରେ ପୋଲିସ ବୁଧବାର ଅଭିଯୁକ୍ତ ରିଆମାଳ ଥାନାଚଂଳର ଅସନଲତା ଗ୍ରାମର ସୁଶୀଲ କିଷାନ(୪୩)ଙ୍କୁ ଗିରଫ କରି କୋର୍ଟ ଚାଲାଣ କରିଛି।
ସୂଚନା ଅନୁଯାୟୀ, ରିଆମାଳ ଥାନା ମହେନ୍ଦ୍ରପୁର ଗ୍ରାମର କାର୍ତ୍ତିକ ମଙ୍ଗଳବାର ତାଙ୍କ ସ୍ତ୍ରୀ ଗୀତା ମିଞ୍ଜଙ୍କ ସହ ତିଲେଇବଣି ବଜାରକୁ ଆସିଥିଲେ। ସେଠାରେ ଜଣେ ହାଇୱା ଚାଳକ ଅସନଲତା ଗ୍ରାମର ସୁଶୀଲଙ୍କ ସହ କାର୍ତ୍ତିକଙ୍କ କୌଣସି କାରଣକୁ ନେଇ ଯୁକ୍ତିତର୍କ ହୋଇଥିଲା। ତେବେ ବଜାର ସାରି ଉଭୟ କାର୍ତ୍ତିକ ଓ ତାଙ୍କ ସ୍ତ୍ରୀ ସ୍କୁଟି ଯୋଗେ ତାଙ୍କ ଗ୍ରାମକୁ ଫେରୁଥିବା ସମୟରେ ଚଟିବରଘାଟ ଗ୍ରାମ ନିକଟରେ ସେମାନଙ୍କ ସ୍କୁଟି ଟାୟାର ପମ୍ପଚର ହୋଇଯାଇଥିଲା। ଫଳରେ ସ୍ଵାମୀ ସ୍ତ୍ରୀ ରାସ୍ତା କଡ଼ରେ ସ୍କୁଟି ସହ ଛିଡ଼ା ହୋଇଥିଲେ। ସୁଶୀଲ ହାଇୱାରେ ସେମାନଙ୍କୁ ପିଛା କରି ସେଠାରେ ପହଞ୍ଚି କିଛି ମନ୍ତବ୍ୟ ଦେବାରୁ କାର୍ତ୍ତିକ ସହ ପୁଣି ଥରେ ଯୁକ୍ତିତର୍କ ହୋଇଥିଲା। ତେବେ ଗୀତା ତାଙ୍କ ସ୍ଵାମୀଙ୍କୁ ବୁଝାସୁଝା କରି ସ୍କୁଟି ପାଖକୁ ଚାଲି ଆସିଥିଲେ। କିନ୍ତୁ ଅଭିଯୁକ୍ତ ସୁଶୀଲ ହାଇୱାକୁ କାର୍ତ୍ତିକଙ୍କ ଉପରେ ଚଢ଼ାଇ ଦେଇ ଫେରାର୍ ହୋଇଯାଇଥିଲା। ଗୁରୁତର କାର୍ତ୍ତିକଙ୍କୁ ଚିକିତ୍ସା ପାଇଁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ କାର୍ତ୍ତିକଙ୍କୁ ଡାକ୍ତର ମୃତ ଘୋଷଣା କରିଥିଲେ। ତେବେ ଘଟଣାସ୍ଥଳରେ ସାଇଣ୍ଟିଫିକ ଟିମ୍ ସହାୟତାରେ ଘଟଣାର ଅଧିକ ତଦନ୍ତ କରାଯାଇଥିଲା।