ବ୍ରହ୍ମପୁର ଅଫିସ, ୧୩।୩: ବ୍ରହ୍ମପୁର ପୌର ନିର୍ବାଚନର କଂଗ୍ରେସ ମେୟର ପ୍ରାର୍ଥୀ ମଞ୍ଜୁ ରଥଙ୍କ ଭୋଟ ପ୍ରଚାର ଶନିବାର ଆରମ୍ଭ ହୋଇଛି। ସହରର ଆରାଧ୍ୟ ଦେବୀ ମା’ ବୁଢ଼ୀ ଠାକୁରାଣୀ ମନ୍ଦିରରେ ପୂଜାର୍ଚ୍ଚନା ପରେ ବଡ଼ ବଜାର ଓ ସାନ ବଜାର ଅଞ୍ଚଳର ୱାର୍ଡଗୁଡ଼ିକ ପରିକ୍ରମା କରିଥିଲେ। ଦୀର୍ଘଦିନ ପରେ ମହାନଗରକୁ ଆସିଥିବା ଜିଲା କଂଗ୍ରେସ ସଭାପତି ତଥା ସାନଖେମୁଣ୍ଡି ବିଧାୟକ ରମେଶ ଜେନା ସାଥୀରେ ଥିଲେ। ୧୭ ୱାର୍ଡରେ ଦଳୀୟ କର୍ପୋରେଟର ପ୍ରାର୍ଥୀ ନ ଥିବା ସତ୍ତ୍ୱେ ସଭାପତିଙ୍କ ନିର୍ବାଚନୀ ପ୍ରଚାରରେ ଅନେକ ସମର୍ଥକ ଓ କର୍ମୀ ସାମିଲ ହୋଇଥିଲେ।
ସଭାପତି ହେବା ପରେ ଜିଲା କଂଗ୍ରେସ କାର୍ଯ୍ୟାଳୟ ସ୍ଥାନୀୟ ବାପୁଜୀ ଆଶ୍ରମରେ ଜେନା ପ୍ରଥମ କରି ପ୍ରବେଶ କରିଥିଲେ। ତାଙ୍କ ଦ୍ୱାରା ମନୋନୀତ କର୍ମକର୍ତ୍ତାମାନଙ୍କ ସହ ଆଲୋଚନାକରି ବିଭିନ୍ନ ବିଷୟରେ ପରାମର୍ଶ ଦେଇଥିଲେ। ଖବରଦାତାଙ୍କୁ ରମେଶ କହିଥିଲେ, ସଦ୍ୟ ସମାପ୍ତ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଓ ଚଳିତ ପୌର ନିର୍ବାଚନକୁ ରାଜ୍ୟ ସରକାର ସାମ୍ବିଧାନିକ ଏବଂ ଗଣତାନ୍ତ୍ରିକ ପଦ୍ଧତିରେ କରୁନାହାନ୍ତି। ନିଜ ଦଳର ସଂଖ୍ୟା ବୃଦ୍ଧି ନିମନ୍ତେ ନାନା ପ୍ରକାର ଅଗଣତାନ୍ତ୍ରିକ କାର୍ଯ୍ୟ କରୁଛନ୍ତି। ଶାସକ ଗୋଷ୍ଠୀ ବିରୋଧୀ ଦଳ ଓ ପ୍ରାର୍ଥୀଙ୍କୁ ବିଭିନ୍ନ ଭାବରେ ପ୍ରଲୋଭିତ ଏବଂ ଧମକଚମକ ଦେଇ ପ୍ରାର୍ଥୀପତ୍ର ପ୍ରତ୍ୟାହାର ପ୍ରୟାସ ଚଳାଇଛନ୍ତି। କେତେକ କ୍ଷେତ୍ରରେ ସଫଳ ମଧ୍ୟ ହୋଇଛନ୍ତି। ତେଣୁ ବ୍ରହ୍ମପୁର ସମେତ ଜିଲାର ବିଭିନ୍ନ ସହରାଞ୍ଚଳ ନିର୍ବାଚନରେ କଂଗ୍ରେସ ପ୍ରାର୍ଥୀ ଦେଇନଥିବା ସ୍ବୀକାର କରିଛନ୍ତି। ବିଜେଡି ସରକାରଙ୍କ ଟାର୍ଗେଟ କରି ରମେଶ କହିଥିଲେ, ରାଜ୍ୟରେ ବେରୋଜଗାରୀଙ୍କ ସଂଖ୍ୟା ବଢ଼ି ଚାଲିଛି। ବିଭିନ୍ନ ସାମଗ୍ରୀର ଦରଦାମ ନିୟନ୍ତ୍ରଣକୁ ଆଣିବାରେ ସରକାର ବିଫଳ ହୋଇଛନ୍ତି। ବିକାଶ ବାଧାପ୍ରାପ୍ତ ହୋଇଛି ଏବଂ ଅନେକ ଯୋଜନା କେବଳ ଘୋଷଣାରେ ଅଟକି ଯାଇଛି। ଏହି ସବୁ କାରଣରୁ ଲୋକେ ଉଭୟ ରାଜ୍ୟ ଓ କେନ୍ଦ୍ର ଶାସନ ପ୍ରତି ବିମୁଖ ହୋଇଯାଇଛନ୍ତି। ରାଜ୍ୟରେ ଓ ଏହି ଜିଲାରେ ଯେଉଁ ସବୁ ଉନ୍ନତିମୂଳକ କାର୍ଯ୍ୟକ୍ରମ ହୋଇଛି ତାହା କଂଗ୍ରେସ ଶାସନରେ ହୋଇଥିବା ଦର୍ଶାଇଥିଲେ। କଂଗ୍ରେସର ମେୟର ଓ କର୍ପୋରେଟର ପ୍ରାର୍ଥୀମାନେ ନିର୍ବାଚିତ ହେବାର ସେ ଆଶା ପ୍ରକଟ କରିଥିଲେ। ବାପୁଜୀ ଆଶ୍ରମରେ ରବି ରଥଙ୍କ ସମେତ ମେୟର ଓ କର୍ପୋରେଟର ପ୍ରାର୍ଥୀମାନେ ଉପସ୍ଥିତ ଥିଲେ।
