ନୂଆଦିଲ୍ଲୀ,୧୨।୩: ଆଇପିଏଲର ପ୍ରାରମ୍ଭିକ ମ୍ୟାଚ ମୁମ୍ବାଇ ଇଣ୍ଡିଆନ୍ସ ପାଇଁ ଚ୍ୟାଲେଞ୍ଜିଂ ହେବାକୁ ଯାଉଛି। ଜସପ୍ରିତ ବୁମ୍ରା ଆଘାତ ଯୋଗୁ କିଛି ମ୍ୟାଚରୁ ବାହାରେ ରହିପାରନ୍ତି ଏବଂ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ପ୍ରତିବନ୍ଧକ ଯୋଗୁ ଆଇପିଏଲର ପ୍ରଥମ ମ୍ୟାଚ ଖେଳିପାରିବେ ନାହିଁ। ମୁମ୍ବାଇ ଇଣ୍ଡିଆନ୍ସ ୨୩ ମାର୍ଚ୍ଚରେ ଏମଏ ଚିଦାମ୍ବରମ ଷ୍ଟାଡିୟମରେ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ଆଇପିଏଲର ପ୍ରଥମ ମ୍ୟାଚ ଖେଳିବ। ଆପଣ ନିଶ୍ଚୟ ଭାବୁଥିବ ଯେ ଆଇପିଏଲ ଏପର୍ଯ୍ୟନ୍ତ ଆରମ୍ଭ ହୋଇନାହିଁ, ତେବେ ହାର୍ଦ୍ଦିକଙ୍କୁ କାହିଁକି ବ୍ୟାନ କରାଯାଇଛି? ତେବେ ଆସନ୍ତୁ ଜାଣିବା…
ହାର୍ଦ୍ଦିକ ପାଣ୍ଡ୍ୟା ୨୦୧୫ରେ ମୁମ୍ବାଇ ଇଣ୍ଡିଆନ୍ସ ପାଇଁ ଖେଳି ତାଙ୍କ ଆଇପିଏଲ କ୍ୟାରିୟର ଆରମ୍ଭ କରିଥିଲେ। ଏହା ପରେ ସେ ୨୦୨୧ପର୍ଯ୍ୟନ୍ତ ଏହି ଫ୍ରାଞ୍ଚାଇଜର ଜଣେ ଗୁରୁତ୍ୱପୂର୍ଣ୍ଣ ଖେଳାଳି ଥିଲେ। ୨୦୨୨ରେ, ସେ ଗୁଜରାଟ ଟାଇଟାନ୍ସ ପାଇଁ ଅଧିନାୟକ ଭାବରେ ଖେଳିଥିଲେ ଏବଂ ତାଙ୍କର ପ୍ରଥମ ବର୍ଷରେ ହିଁ ସେମାନଙ୍କୁ ଚାମ୍ପିୟନ କରାଇଥିଲେ। ୨୦୨୩ରେ ମଧ୍ୟ ତାଙ୍କ ଅଧିନାୟକତ୍ୱରେ, ସେ ଗୁଜରାଟକୁ ଫାଇନାଲରେ ପହଞ୍ଚାଇଥିଲେ, ଯେଉଁଠାରେ ତାଙ୍କ ଦଳ ସିଏସ୍କେଠାରୁ ପରାସ୍ତ ହୋଇଥିଲା। ଗୁଜରାଟ ପାଇଁ ୨ଟି ସିଜିନ ଖେଳିବା ପରେ, ସେ ନଭେମ୍ବରରେ ମୁମ୍ବାଇ ଇଣ୍ଡିଆନ୍ସକୁ ଫେରିଥିଲେ ଏବଂ ଆଇପିଏଲ ୨୦୨୪ରେ ମୁମ୍ବାଇର ଦାୟିତ୍ୱ ନେଇଥିଲେ।
ହାର୍ଦ୍ଦିକ ପାଣ୍ଡ୍ୟା ଆଇପିଏଲ ୨୦୨୪ରେ ମୁମ୍ବାଇ ଇଣ୍ଡିଆନ୍ସର ଅଧିନାୟକ ଥିଲେ। ଏହି ସମୟ ମଧ୍ୟରେ, ଦଳକୁ ସ୍ଲୋ ଓଭର ରେଟ୍ ପାଇଁ ତିନିଥର ଜରିମାନା ଦିଆଯାଇଥିଲା। ଯେତେବେଳେ ଅଧିନାୟକ ପ୍ରଥମ ଥର ପାଇଁ ଦୋଷୀ ସାବ୍ୟସ୍ତ ହୁଅନ୍ତି, ତାଙ୍କୁ ୧୨ ଲକ୍ଷ ଟଙ୍କା ଜରିମାନା ଦିଆଯାଏ। ଯଦି ଏହା ଦ୍ୱିତୀୟ ଥର ପାଇଁ ହୁଏ, ତେବେ ଅଧିନାୟକ ଏବଂ ଅନ୍ୟ ୨୪ ଜଣ ଖେଳାଳିଙ୍କୁ ୧୨-୧୨ ଲକ୍ଷ ଟଙ୍କା ଲେଖାଏ ଜରିମାନା ଦେବାକୁ ପଡିବ। ତୃତୀୟ ଥର ଏପରି ଭୁଲ ପାଇଁ, ଅଧିନାୟକଙ୍କୁ ୩୦ ଲକ୍ଷ ଟଙ୍କା ଜରିମାନା ଏବଂ ଗୋଟିଏ ମ୍ୟାଚ ପାଇଁ ପ୍ରତିବନ୍ଧକ କରାଯାଏ। ଅନ୍ୟ ଖେଳାଳିମାନଙ୍କୁ ମଧ୍ୟ ଜରିମାନା ଲଗାଯାଏ।
ଆଇପିଏଲ ୨୦୨୪ରେ ଲକ୍ଷ୍ନୌ ସୁପର ଜାଏଣ୍ଟସ ବିପକ୍ଷରେ ଖେଳିବା ସମୟରେ, ମୁମ୍ବାଇ ଇଣ୍ଡିଆନ୍ସ ସିଜିନରେ ତୃତୀୟ ଥର ପାଇଁ ସ୍ଲୋ ଓଭର ରେଟ ପାଇଁ ଦୋଷୀ ସାବ୍ୟସ୍ତ ହୋଇଥିଲା। ଏବେ ହାର୍ଦ୍ଦିକ ପାଣ୍ଡ୍ୟା ଗୋଟିଏ ମ୍ୟାଚ ପାଇଁ ନିଷିଦ୍ଧ, ତେଣୁ ସେ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ପ୍ରଥମ ମ୍ୟାଚ ଖେଳିପାରିବେ ନାହିଁ, ଏହା ପରେ ସେ ଦଳକୁ ଫେରିବେ।
