କୋଦଳା,୯।୮(ଅମିତ କୁମାର ପଟ୍ଟନାୟକ): ୨୦୨୪ ସାଧାରଣ ନିର୍ବାଚନ ପାଖେଇ ଆସୁଥିବା ବେଳେ ଏବେ ଗଞ୍ଜାମ ଜିଲା କବିସୂର୍ଯ୍ୟନଗର ନିର୍ବାଚନ ମଣ୍ଡଳୀରେ ରାଜନୀତି ସରଗରମ ହେଲାଣି। କବିସୂର୍ଯ୍ୟନଗର ନିର୍ବାଚନ ମଣ୍ଡଳୀ ବେଗୁନିଆପଡା ବ୍ଲକ, କୋଦଳା ଏନଏସି, କବିସୂର୍ଯ୍ୟନଗର ଏନଏସି, କବିସୂର୍ଯ୍ୟନଗର ବ୍ଲକର ୧୨ ପଞ୍ଚାୟତ ଏବଂ ପୁରୁଷୋତ୍ତମପୁର ବ୍ଲକର ୯ ପଞ୍ଚାୟତକୁ ନେଇ ଗଠିତ। ଏହି ନିର୍ବାଚନ ମଣ୍ଡଳୀରେ ବିଜେଡିର ଦବଦବା ଥିବାବେଳେ କଂଗ୍ରେସ ଏକପ୍ରକାର ନିଷ୍କ୍ରିୟ ଓ ଭାଜପା ସାମାନ୍ୟ ସକ୍ରିୟ ରହିଛି। ଆସନ୍ତା ସାଧାରଣ ନିର୍ବାଚନରେ ବିଜେଡିର ପ୍ରାର୍ଥୀ ହେବାକୁ ଏବେ ଅନେକ ଆଶାୟୀ ଅଛନ୍ତି।
ବିଧାୟିକା ଲତିକା ପ୍ରଧାନ, କୋଦଳାର ପୂର୍ବତନ ନଗରପାଳ ହରପ୍ରସାଦ ସାହୁ, ରାଜ୍ୟ ଯୁବ ବିଜେଡି ସାଧାରଣ ସମ୍ପାଦକ ପ୍ରମୋଦ କୁମାର ପଣ୍ଡା ଏବଂ ବରିଷ୍ଠ ବିଜେଡି ନେତା ତଥା ପୁରୁଷୋତ୍ତମପୁର ବ୍ଲକର ଭୀମପୁର ପଞ୍ଚାୟତ ପୂର୍ବତନ ସରପଞ୍ଚ ସୀତାରାମ ପାଣିଗ୍ରାହୀ ଦୌଡ଼ରେ ରହିଛନ୍ତି। ତେବେ ସେମାନଙ୍କ ମଧ୍ୟରେ ଅର୍ନ୍ତଦ୍ୱନ୍ଦ୍ୱ ଥିବା ବାରି ହୋଇପଡ଼ୁଛି। କାରଣ ଗୋଟିଏ ଦଳରେ ଥିଲେ ମଧ୍ୟ ସେମାନଙ୍କୁ କେବେ ଗୋଟିଏ ମଞ୍ଚରେ ଦେଖିବାକୁ ମିଳୁନାହିଁ। କେବଳ ନିଜ ସମର୍ଥକଙ୍କୁ ନେଇ ଦଳୀୟ ସଂଗଠନ ସୁଦୃଢ କରିବାରେ ଲାଗିଛନ୍ତି। ୨୦୧୯ ସାଧାରଣ ନିର୍ବାଚନରେ ଖଲ୍ଲିକୋଟ ରାଣୀ ଭି. ସୁଜ୍ଞାନ କୁମାରୀ ଦେଓ ନିର୍ବାଚନରୁ ନିବୃତ ହେବା ପରେ ଲତିକା ପ୍ରଧାନ ବିଧାୟିକା ହୋଇଥିଲେ। ୨୦୧୪ ନିର୍ବାଚନରେ ସ୍ବାଧୀନ ଭାବେ ଲଢ଼ି ଦ୍ୱିତୀୟ ସ୍ଥାନରେ ଥିବା କୋଦାଳର ପୂର୍ବତନ ନଗରପାଳ ହରପ୍ରସାଦ ସାହୁ ୨୦୧୯ରେ କିନ୍ତୁ ବିଧାୟିକା ଲତିକା ପ୍ରଧାନଙ୍କୁ ସହଯୋଗ କରିଥିଲେ। ପରବର୍ତ୍ତୀ ସମୟରେ ଉଭୟଙ୍କ ମଧ୍ୟରେ ମତାନ୍ତର ଫଳରେ ଦୀର୍ଘ ୨୦ବର୍ଷ କୋଦଳା ପୌର ପରିଷଦକୁ ନିଜ ଅକ୍ତିଆର ରଖିଥିବା ହରପ୍ରସାଦ ୨୦୨୨ ପୌର ନିର୍ବାଚନରୁ ନିବୃତ ରହିଥିଲେ। ଫଳରେ ବିଧାୟିକାଙ୍କ ସମର୍ଥିତ ପ୍ରାର୍ଥି ପରାଜିତ ହୋଇଥିଲା ବେଳେ କୋଦଳା ଏନଏସିକୁ ଭାରତୀୟ ଜନତା ପାର୍ଟି ଦଖଲ କରିଥିଲା। ବର୍ତ୍ତମାନ ହରପ୍ରସାଦ ସାହୁ ମୁଖ୍ୟମନ୍ତ୍ରୀଙ୍କ ଆଦର୍ଶକୁ ନେଇ ଦଳୀୟ ସଂଗଠନରେ ଲାଗିପଡିଛନ୍ତି। ଯୁବ ସଂଗଠନକୁ ସୁଦୃଢ କରିବା ପାଇଁ ଝିଅ ରଞ୍ଜିତା ବିଭିନ୍ନ ସାମାଜିକ କାର୍ଯ୍ୟକ୍ରମ କରି ଲୋକଙ୍କ ନିକଟତର ହେଉଥିତ୍ା ଦେଖିବାକୁ ମିଳୁଛି। ସେହିପରି ୨୦୧୪ରେ କଂଗ୍ରେସରୁ ପ୍ରାର୍ଥୀ ହୋଇଥିବା ସୀତାରାମ ପାଣିଗ୍ରାହୀ ପରାଜିତ ହେବା ପରେ ନବୀନ ପଟ୍ଟନାୟକଙ୍କ ଆଦର୍ଶରେ ଅନୁପ୍ରାଣିତ ହୋଇ ବିଜେଡିରେ ଯୋଗ ଦେଇଥିଲେ। ସେ ମଧ୍ୟ କବିସୂର୍ଯ୍ୟନଗର ନିର୍ବାଚନ ମଣ୍ଡଳୀରେ ନିଜ ସପକ୍ଷରେ ସଂଗଠନକୁ ସୁଦୃଢ଼ କରିବାରେ ଲାଗିପଡ଼ିଛନ୍ତି। ଅପରପକ୍ଷରେ ଭାଜପା ଛାଡ଼ି ବିଜେଡିରେ ଯୋଗଦେଇ ରାଜ୍ୟ ଯୁବ ସାଧାରଣ ସମ୍ପାଦକ ହୋଇଥିବା ପ୍ରମୋଦ କୁମାର ପଣ୍ଡା ଆଗାମୀ ନିର୍ବାଚନକୁ ଆଖି ଆଗରେ ନିଜ ସମର୍ଥକମାନଙ୍କୁ ନେଇ ସଂଗଠନ ମଜଭୁତ କରିବାରେ ଲାଗିପଡ଼ିଛନ୍ତି। ଗତ ୨୦୧୯ରୁ ଖଲ୍ଲିକୋଟ ରାଣୀ ଭି ସୁଜ୍ଞାନ କୁମାରୀ ଦେଓ ରାଜନୀତିଠାରୁ ଦୂରେଇ ରହିଥିଲେ ମଧ୍ୟ ନିର୍ବାଚନ ମଣ୍ଡଳୀ ତାଙ୍କର ଏବେ ବି ଦବ୍ଦବା ରହିଛି। ଗତ ୫ ତାରିଖରେ ରାଣୀଙ୍କ ଜନ୍ମଦିନରେ ବିଧାୟିକା ଲତିକା ପ୍ରଧାନ ନିର୍ବାଚନ ମଣ୍ଡଳୀରେ କେକ୍ କାଟି ଜନ୍ମଦିନ ପାଳିଥିବା ବେଳେ ହରପ୍ରସାଦ ସାହୁଙ୍କ ପତ୍ନୀ ସୁନିତା ପ୍ରଭା ଏବଂ ଝିଅ ରଞ୍ଜିତା ମଧ୍ୟ ସାମାଜିକ ଗଣମାଧ୍ୟମ ଜରିଆରେ ଶୁଭେଚ୍ଛା ଜଣାଇଛନ୍ତି। ସୀତାରାମ ପାଣିଗ୍ରାହୀ ଏବଂ ପ୍ରମୋଦ ପଣ୍ଡା ନିଜ ସମର୍ଥକଙ୍କୁ ନେଇ ରାଣୀ ରହୁଥିବା ଚେନ୍ନାଇସ୍ଥିତ ବାସଭବନରେ ଶୁଭେଚ୍ଛା ଜଣାଇ ରାଜନୀତିକୁ ଆହୁରି ସକ୍ରିୟ କରିଦେଇଛନ୍ତି। ଅପରପକ୍ଷରେ କୋଦଳା ନଗର ବିଜେଡି ସଭାପତି ସଞ୍ଜୀବ କୁମାର ସାହୁ ଏବଂ ସମ୍ପାଦକ ଗୋପାଳ କୃଷ୍ଣ ସାହୁ ମଧ୍ୟ କୌଣସି ଦଳୀୟ କାର୍ଯ୍ୟରେ ଯୋଗ ଦେଉନଥିବା ବେଳେ ଚେନ୍ନାଇ ସ୍ଥିତ ବାସଭବନରେ ରାଣୀଙ୍କୁ ଭେଟି ଶୁଭେଚ୍ଛା ଜଣାଇବା ରାଜନୀତିକୁ ଆହୁରି ସରଗରମ କରିଛି। ତେଣୁ ସାଧାରଣ ନିର୍ବାଚନ ପାଖେଇ ଆସୁଥିବା ବେଳେ ବିଜେଡିରୁ ପ୍ରାର୍ଥୀ ହେବା ନେଇ ଏକାଧିକ ଆଶାୟୀ ଥିବା ବେଳେ କାହାକୁ ଗ୍ରୀନ ସିଗନାଲ ମିଳୁଛି ତାହା ଦେଖିବାକୁ ବାକି ରହିଲା।
