ମାଫିଆ ମୁଖତାର ଅନସାରୀଙ୍କ ମୃତ୍ୟୁ, ହସ୍ପିଟାଲରେ ପୋଲିସ ଛାଉଣି, ୧୪୪ ଧାରା ଜାରି

ବାନ୍ଦା,୨୮।୩: ଉତ୍ତର ପ୍ରଦେଶର ବାନ୍ଦା ହସ୍ପିଟାଲରେ ଶୁକ୍ରବାର ରାତିରେ ମାଫିଆରୁ ରାଜନେତା ହୋଇଥିବା ମୁଖତାର ଅନସାରୀଙ୍କ ମୃତ୍ୟୁ ହୋଇଛି। ବାନ୍ଦା ଜେଲରେ ହାର୍ଟ ଆଟାକ ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ବାନ୍ଦାରେ ମୁଖତାର ଅନସାରୀଙ୍କ ମାମଲା ପରିଚାଳନା କରିଥିବା ଓକିଲ ନାସିମ ହାୟଦାର କହିଛନ୍ତି ଯେ ତାଙ୍କର ମୃତ୍ୟୁ ପରେ ମେଡିକାଲ କଲେଜକୁ ଏକ କ୍ୟାଣ୍ଟନମେଣ୍ଟ ବା ପୋଲିସ ଛାଉଣିରେ ପରିଣତ କରାଯାଇଛି। ତାଙ୍କୁ ମଧ୍ୟ ଭେଟିବାକୁ ଅନୁମତି ଦିଆଯାଉ ନାହିଁ । କୁହାଯାଇଛି ଯେ ଯେତେବେଳେ ଆବଶ୍ୟକ ହୁଏ ଫୋନ ଯୋଗେ ଡକାଯିବ।
ବାନ୍ଦା ମେଡିକାଲରେ ଭର୍ତ୍ତି ହୋଇଥିବା ମୁଖତାର ଅନସାରୀଙ୍କ ଅବସ୍ଥା ଅତ୍ୟନ୍ତ ଗୁରୁତର ଥିଲା। ଏହି ସମୟରେ ମଉ ଏବଂ ଗାଜିପୁରରେ ସୁରକ୍ଷା ବୃଦ୍ଧି କରାଯାଇଛି। ବାନ୍ଦାଠାରେ ମଧ୍ୟ ବିଶେଷ ସୁରକ୍ଷା ବ୍ୟବସ୍ଥା ରହିଛି ଏବଂ ବହୁ ସଂଖ୍ୟକ ପୋଲିସ କର୍ମଚାରୀ ନିୟୋଜିତ ହୋଇଛନ୍ତି। ସଜାଗ ରହିବାକୁ ଡିଜିପି ମୁଖ୍ୟାଳୟ ନିର୍ଦ୍ଦେଶ ଦେଇଛି।