ନୂଆଦିଲ୍ଲୀ,୨୩।୩ : ରିଲାଏନ୍ସ ଇଣ୍ଡଷ୍ଟ୍ରି ଲିମିଟେଡ୍ (ଆର୍ଆଇଏଲ୍)ର ଅଧ୍ୟକ୍ଷ ମୁକେଶ ଅମ୍ବାନୀ ପୁଣି ଥରେ ଭାରତ ଓ ଏସିଆର ୧ ନମ୍ବର ଧନୀ ବ୍ୟକ୍ତିର ସ୍ଥାନ ହାସଲ କରିଛନ୍ତି। ଏପରିକି ସେ ବିଶ୍ୱର ଟପ୍-୧୦ ଧନୀ ବ୍ୟକ୍ତିଙ୍କ ସୂଚୀରେ ମଧ୍ୟ ଏକମାତ୍ର ଭାରତୀୟ ଭାବେ ସ୍ଥାନ ପାଇଛନ୍ତି ବୋଲି ହୁରୁନ୍ର ତାଜା ଧନିକଙ୍କ ସୂଚୀରୁ ଜଣାପଡ଼ିଛି। ରିସର୍ଚ୍ଚ ପ୍ଲାଟ୍ଫର୍ମ ହୁରୁନ୍ ରିୟଲ ଇଷ୍ଟେଟ୍ କମ୍ପାନୀ ଏମ୍୩ଏମ୍ ସହ ମିଶି ଧନିକଙ୍କ ସୂଚୀ ଜାରି କରିଛନ୍ତି। ଏପରିକି ‘ଦି ୨୦୨୩ ଏମ୍୩ଏମ୍ ହୁରୁନ ଗ୍ଲୋବାଲ ରିଚ୍ ଲିଷ୍ଟ’ ରେ ମୁକେଶ ଏକମାତ୍ର ଭାରତୀୟ ଓ ଏସିଆର ସବୁଠୁ ଧନୀ ବ୍ୟକ୍ତି ବୋଲି ଉକ୍ତ ତାଲିକାରେ ସ୍ଥାନରେ ପାଇଛନ୍ତି।
ସେହିଭଳି ଉକ୍ତ ସୂଚୀ ହିସାବରେ ମୁକେଶଙ୍କ ମୋଟ ନେଟ୍ ୱର୍ଥ ୮୨ ବିଲିୟନ ଡଲାର ରହିଥିବା ଜଣାପଡ଼ିଛି। ଏପରିକି ଗୌତମ ଆଦାନୀ ଦ୍ୱିତୀୟ ସ୍ଥାନରେ ରହିଛନ୍ତି। ଚଳିତବର୍ଷ ଆଦାନୀଙ୍କ ମୋଟ ନେଟ୍ୱର୍ଥ ୫୩ ବିଲିୟନ ଡଲାରରୁ ବି କମ୍ ହୋଇଯାଇଛି। ହୁରୁନ୍ ଧନିକଙ୍କ ସୂଚୀ ଅନୁସାରେ ସାଇରସ ପୁନାୱାଲା ଭାରତର ୩ୟ ସବୁଠାରୁ ଧନୀ ବ୍ୟକ୍ତି ତାଙ୍କର ମୋଟ ନେଟ୍ ୱର୍ଥ ୨୭ ବିଲିୟନ ଡଲାର ଆକଳନ କରାଯାଇଛି। ଦେଶରେ କୋଭିଡ୍-୧୯ ମହାମାରୀ କାଳରେ ସାଇରସ ପୁନାୱାଲାଙ୍କୁ ବେଶ୍ ଫାଇଦା ମିଳିଥିଲା। ତାଙ୍କ କମ୍ପାନୀ ସିରମ ଇନ୍ଷ୍ଟିଚ୍ୟୁଟ୍ ବିପୁଳ ପରିମାଣରେ କୋଭିଡ୍ ଟିକା ପ୍ରସ୍ତୁତ କରିଥିଲା। ହୁରୁନ୍ଙ୍କ ଗତବର୍ଷ ସୂଚୀରେ ସାଇରସ ପୁନାୱାଲା ୩ୟ ଧନଶାଳୀ ବ୍ୟକ୍ତି ଥିଲେ।
ତେବେ ତାଜା ସୂଚୀରେ ଶିବ ନାଦର ଓ ତାଙ୍କ ପରିବାରକୁ ୪ର୍ଥ ସ୍ଥାନ ମିଳିଛି। ହୁରୁନ୍ ହିସାବ ଅନୁସାରେ ନାଦର ଫ୍ୟାମିଲିର ବର୍ତ୍ତମାନ ନେଟ୍ୱର୍ଥ ୨୬ବିଲିୟନ ଡଲାରରୁ ବି ଅଧିକ ରହିଛି। ଗତବର୍ଷ ମଧ୍ୟ ନାଦର ପରିବାର ଉକ୍ତ ସୂଚୀର ୪ର୍ଥ ସ୍ଥାନରେ ଥିଲେ। ସେହିପରି ଷ୍ଟିଲ୍ କିଙ୍ଗ୍ ନାମରେ ପ୍ରସିଦ୍ଧ ଲକ୍ଷ୍ମୀ ମିତ୍ତଲ ୨୦ବିଲିୟନ ଡଲାର ନେଟ୍ୱର୍ଥ ସହ ଉକ୍ତ ସୂଚୀର ୫ମ ସ୍ଥାନରେ ଅଛନ୍ତି। ତେବେ ଗତବର୍ଷ ସୂଚୀର ୫ମ ସ୍ଥାନରେ ରାଧାକିଷନ ଦମାନୀ ଥିଲେ।
