ବ୍ରହ୍ମପୁର,୨୯୮(ସୁବାସ ଚନ୍ଦ୍ର ପାଢ଼ୀ): ଗଞ୍ଜାମ ଜିଲା ଗୋପାଳପୁର ଥାନା ଅନ୍ତର୍ଗତ ସତ୍ୟ ନାରାୟଣପୁର ମୁଖ୍ୟ ରାସ୍ତାରେ ପ୍ଲଟ ବ୍ୟବସାୟୀ ସୁଧୀର କୁମାର୍ ପାତ୍ରଙ୍କୁ ଗତ ଏପ୍ରିଲ ୧୫ ତାରିଖରେ ଅପହରଣ କରାଯାଇଥିଲା। ଏକ ସପ୍ତାହ ପରେ ତାଙ୍କ ଗଳିତ ମୃତଦେହ ସୋରଡ଼ାର ଏକ ଜଙ୍ଗଲିଆ ରାସ୍ତାରୁ ପୋଲିସ ଜବତ କରିଥିଲା । ମୃତ ସୁଧୀରଙ୍କ ସ୍ତ୍ରୀ ରଶ୍ମିତା ପାତ୍ରଙ୍କ ଅଭିଯୋଗ କ୍ରମେ ଗୋପାଳପୁର ପୋଲିସ ୨୧୩/୨୬ରେ ଏକ ହତ୍ୟା ମାମଲା ରୁଜୁ କରିଥିଲା।
ଏହି ବହୁ ଚର୍ଚ୍ଚିତ ହତ୍ୟା ମାମଲାରେ ମୁଖ୍ୟ ଷଡଯନ୍ତ୍ରକାରୀ ଥିବା ସୁଧୀରଙ୍କ ପୁତୁରା ତୁଷାରକାନ୍ତ ପାତ୍ର(୧୯)ଙ୍କୁ ଗିରଫ କରାଯାଇଥିଲା। ସେ ଏବେ ବ୍ରହ୍ମପୁର ମଣ୍ଡଳ କାରାଗାରରେ ବିଚାରାଧୀନ ବନ୍ଦୀ ଭାବେ ଅଛନ୍ତି । ତୁଷାର ଜଣେ ଯୁକ୍ତ ତିନି କଲେଜ ଛାତ୍ର ଥିବା ବେଳେ ତାଙ୍କ ପାଠ ପଢ଼ା ବ୍ୟାହତ ହେଉଥିବା ଓ ଉକ୍ତ ହତ୍ୟା ମାମଲାରେ ତାଙ୍କର ସମ୍ପୃକ୍ତି ନ ଥିବା ଦର୍ଶାଇ ଓକିଲଙ୍କ ଜରିଆରେ ସେ ଜିଲା ଜଜ ଅଶାନ୍ତ କୁମାର୍ ଦାସଙ୍କ କୋର୍ଟରେ ଜାମିନ ଆବେଦନ କରିଥିଲେ। କୋର୍ଟରେ ଉଭୟ ପକ୍ଷଙ୍କ ଓକିଲଙ୍କ ମଧ୍ୟରେ ଜବାବ ସଆଲ ହୋଇଥିଲା। ସରକାରଙ୍କ ପକ୍ଷରୁ ମାମଲା ପରିଚାଳନା କରୁଥିବା କ୍ୟାଡର ପିପି ବିଶ୍ୱଜିତ୍ ବରାଳ ଉକ୍ତ ଜାମିନକୁ ଦୃଢ଼ ବିରୋଧ କରିଥିଲେ । ଫଳରେ ଜଜ ଉକ୍ତ ଜାମିନ ଆବେଦନକୁ ଖାରଜ କରିଦେଇଛନ୍ତି । ପୂର୍ବରୁ ମଧ୍ୟ ତୁଷାରଙ୍କ ଜାମିନ ପ୍ରଥମ ଶ୍ରେଣୀ ବିଚାର ବିଭାଗ ମାଜିଷ୍ଟ୍ରେଟ (ଗ୍ରାମୀଣ) କୋର୍ଟରେ ଖାରଜ ହୋଇଥିଲା।
ମାମଲାର ବିବରଣୀରୁ ପ୍ରକାଶ, ପ୍ଲଟ ବ୍ୟବସାୟୀ ସୁଧୀର ଗତ ଏପ୍ରିଲ ୧୫ ତାରିଖ ସନ୍ଧ୍ୟାରେ ଘରକୁ ଫେରୁଥିବା ବେଳେ ମଣ୍ଡିଆପଲି ନିକଟ ପ୍ରେମ ସଂସ୍ଥା ରାସ୍ତାରୁ ତାଙ୍କୁ ଅପହରଣ କରାଯାଇଥିବା ନେଇ ଅଭିଯୋଗ ହୋଇଥିଲା। ପୋଲିସ ତାଙ୍କୁ ଠାବ କରିବା ପାଇଁ ସ୍ଥାନୀୟ ଅଞ୍ଚଳରେ ଲାଗିଥିବା ସିସିଟିଭି ଫୁଟେଜର ସହାୟତା ନେଇଥିଲା।
ଏସ୍ପିଙ୍କ ନିର୍ଦ୍ଦେଶରେ ୯ଟି ଟିମ ଗଠନ କରାଯାଇଥିଲା । ଏପ୍ରିଲ ୨୨ ତାରିଖରେ ସକାଳେ ସୋରଡା ଥାନା ଅନ୍ତର୍ଗତ ଗାଜଲବାଡ଼ି ରସିପଙ୍କାଳ କେନାଲ ନିକଟରୁ ସୁଧୀରଙ୍କ ଗଳିତ ମୃତଦେହ ପୋଲିସ ଜବତ କରିଥିଲା। ଘଟଣାର ତଦନ୍ତ ବେଳେ ପୋଲିସ ସୁଧୀରଙ୍କ ଝିଆରି ନିବେଦିତା ପାତ୍ର ଓ ତାଙ୍କ ପୁରୁଷ ବନ୍ଧୁ କାଳିଆ ଓରଫ କାଳୁ ଚରଣ ପ୍ରଧାନ, ପୁତୁରା ତୁଷାରକାନ୍ତ ପାତ୍ରଙ୍କ ସମେତ ୯ ଜଣଙ୍କୁ ଗିରଫ କରିଥିଲା । ଏହି ଘଟଣାରେ ପୋଲିସ ପର୍ଯ୍ୟାୟକ୍ରମେ ମୋଟ ୧୩ ଜଣକୁ ଗିରଫ କରିଥିବା ବେଳେ ଘଟଣାରେ ବ୍ୟବହୃତ ୪ଟି କାର୍, ୧୫ଟି ମୋବାଇଲ, ବନ୍ଧୁକ ଓ ଗୁଳି ଜବତ କରିଥିଲା। ଗିରଫ ସମସ୍ତ ଅଭିଯୁକ୍ତ ଏବେ ବ୍ରହ୍ମପୁର ମଣ୍ଡଳ କାରାଗାରରେ ଅଛନ୍ତି ।