ଆବୁଧାବି,୩।୧୦: ଯଦି ଅଧିନାୟକତ୍ୱ ଏକ କଳା, ତେବେ ଏମଏସ ଧୋନୀ ହେଉଛନ୍ତି ବରିଷ୍ଠ କଳାକାର। ଧଳା-ବଲ ଫର୍ମାଟରେ ପ୍ରକୃତରେ ସେ ଏକ ଉଦାହରଣ ସୃଷ୍ଟି କରିଛନ୍ତି। ଯେଉଁମାନେ ତାଙ୍କୁ ଅତି ନିକଟରୁ ଦେଖିଛନ୍ତି, ସେମାନେ ଜାଣିଛନ୍ତି ନେତୃତ୍ୱ ଦୃଷ୍ଟିରୁ ଧୋନୀଙ୍କଠାରୁ ଭଲ ବ୍ୟକ୍ତି କେହି ନାହାଁନ୍ତି ବୋଲି ଭାରତର ମୁଖ୍ୟ କୋଚ ରବି ଶାସ୍ତ୍ରୀ କହିଛନ୍ତି।
ରବି ଶାସ୍ତ୍ରୀ ଫ୍ୟାନ କୋଡ ସହିତ ଏକ ବାର୍ତ୍ତାଳାପରେ କହିଛନ୍ତି ଯେ, ସୀମିତ ଓଭର ଫର୍ମାଟରେ ଧୋନୀ ସର୍ବଶ୍ରେଷ୍ଠ। ଏହା ତାଙ୍କ ରେକର୍ଡ କହୁଛି। ଆଇସିସି ଟୁର୍ନାମେଣ୍ଟରେ ତାଙ୍କର ରେକର୍ଡ ଦେଖନ୍ତୁ। ସେ କ’ଣ ଜିତି ନ ଥିଲେ? ଆଇପିଏଲ, ଚାମ୍ପିଅନ୍ସ ଲିଗ, ସମସ୍ତ ଆଇସିସି ଟୁର୍ନାମେଣ୍ଟ, ଦୁଇଟି ବିଶ୍ୱକପ । ଯେତେବେଳେ ଧଳା ବଲ କ୍ରିକେଟ କଥା ଆସେ, ଏଠାରେ କେହି ତାଙ୍କ ନିକଟତର ନୁହଁନ୍ତି । ସେ ସର୍ବଶ୍ରେଷ୍ଠ। କିଙ୍ଗ କଙ୍ଗ, ଆପଣ ତାଙ୍କୁ ଏହିପରି ଡାକପାରନ୍ତି ବୋଲି ସେ କହିଛନ୍ତି।
କୋଚ ରବି ଶାସ୍ତ୍ରୀ ଆହୁରି ମଧ୍ୟ କହିଛନ୍ତି ଯେ ଧୋନୀଙ୍କ ଶାନ୍ତ ବ୍ୟବହାର ଏବଂ ପରିସ୍ଥିତି ନିୟନ୍ତ୍ରଣ ତାଙ୍କୁ ଅନ୍ୟମାନଙ୍କଠାରୁ ଭିନ୍ନ କରିଥାଏ। ସିଏସ୍କେକୁ ଦେଖି ସମସ୍ତେ ଅନୁମାନ କରିପାରିବେ। ଦଳରେ କେତେ ଶାନ୍ତି ଅଛି ଯେ ଜିନିଷଗୁଡିକ ନିୟନ୍ତ୍ରଣରେ ଅଛି ବୋଲି ସେ କହିଛନ୍ତି। ସୂଚନାଯୋଗ୍ୟ, ଅନ୍ତର୍ଜାତୀୟ କ୍ରିକେଟରୁ ଅବସର ନେବା ପରେ ମହେନ୍ଦ୍ର ସିଂ ଧୋନୀ ଇଣ୍ଡିଆନ ପ୍ରିମିୟର ଲିଗରେ ଚେନ୍ନାଇ ସୁପର କିଙ୍ଗ୍ସର ଅଧିନାୟକତ୍ୱ ଜାରି ରଖିଥିଲେ।
