ନୂଆଦିଲ୍ଲୀ,୫।୧: ଲୋକପ୍ରିୟ ୟୁଟ୍ୟୁବରଙ୍କ ସହ ଭିଡିଓ କରିବେ ବିରାଟ କୋହଲି। ପୂର୍ବରୁ କ୍ରିଷ୍ଟିଆନୋ ରୋନାଲ୍ଡୋଙ୍କ ପରି ବିଶ୍ୱ ପ୍ରସିଦ୍ଧ ତାରକାଙ୍କ ସହିତ ଭିଡିଓ କରିଥିବା ୟୁଟ୍ୟୁବର ଏହି ଖୁଲାସା କରିଛନ୍ତି। ଲୋକପ୍ରିୟ ଆମେରିକୀୟ ୟୁଟ୍ୟୁବର ମିଷ୍ଟର ବିଷ୍ଟ (MrBeast) ପୁଣିଥରେ ଭାରତୀୟ କ୍ରିକେଟ ତାରକା ବିରାଟ କୋହଲିଙ୍କ ସହ କାମ କରିବା ପାଇଁ ନିଜର ଇଚ୍ଛା ପ୍ରକାଶ କରିଛନ୍ତି। ନିକଟରେ ଏକ ସାକ୍ଷାତକାରରେ ସେ କହିଛନ୍ତି ଯେ, ସେ ବିରାଟଙ୍କ ସହ ଏକ ଭିଡିଓ ଶୁଟିଂ କରିବା ପାଇଁ ଚେଷ୍ଟା କରୁଛନ୍ତି।
ମିଷ୍ଟର ବିଷ୍ଟ ସିଧାସଳଖ ବିରାଟଙ୍କୁ ସମ୍ବୋଧନ କରି କହିଛନ୍ତି, “ହାଏ ବିରାଟ କୋହଲି, ମୁଁ ତୁମ ସହ ଭିଡିଓ ଶୁଟ୍ କରିବାକୁ ଚେଷ୍ଟା କରୁଛି।” ପୂର୍ବରୁ ୨୦୨୫ରେ ମଧ୍ୟ ସେ କୋହଲିଙ୍କୁ ଏହି ଅନୁରୋଧ କରିଥିଲେ। ଭାରତକୁ ନିଜର ସବୁଠାରୁ ବଡ଼ ଦର୍ଶକ ବର୍ଗ ଭାବେ ଦର୍ଶାଇ ସେ ଭାରତୀୟ ପ୍ରଶଂସକଙ୍କ ପାଇଁ କିଛି ସ୍ୱତନ୍ତ୍ର କରିବାକୁ ଚାହୁଁଥିବା କହିଛନ୍ତି।
ଜାନୁଆରୀ ୭, ୨୦୨୬ରୁ ପ୍ରାଇମ ଭିଡିଓରେ ଆରମ୍ଭ ହେବାକୁ ଥିବା ତାଙ୍କର ରିଆଲିଟି ଶୋ’ ‘Beast Games Season 2’ ରେ ପ୍ରସିଦ୍ଧ ଭାରତୀୟ ୟୁଟ୍ୟୁବର କ୍ୟାରିମିନାଟି ମଧ୍ୟ ନଜର ଆସିବେ ବୋଲି ସେ ନିଶ୍ଚିତ କରିଛନ୍ତି। ଏହି ଶୋ’ର ଦ୍ୱିତୀୟ ସିଜନରେ ୨୦୦ ଜଣ ପ୍ରତିଯୋଗୀ ୫ ମିଲିୟନ ଡଲାର (ପ୍ରାୟ ୪୧ କୋଟିରୁ ଅଧିକ ଟଙ୍କା) ପୁରସ୍କାର ପାଇଁ ପରସ୍ପର ସହ ଲଢ଼ିବେ।
ମିଷ୍ଟର ବିଷ୍ଟଙ୍କ ଏହି ଆହ୍ଵାନ ପରେ ସୋସିଆଲ ମିଡିଆରେ କ୍ରିକେଟ ପ୍ରେମୀ ଓ ୟୁଟ୍ୟୁବ୍ ପ୍ରଶଂସକଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଛି। ଯଦି ଏହି ଦୁଇ ଜଣ ଏକାଠି ହୁଅନ୍ତି, ତେବେ ଏହା ଡିଜିଟାଲ ଜଗତର ସବୁଠାରୁ ବଡ଼ ସହଯୋଗ ହେବ ବୋଲି କୁହାଯାଉଛି।
