ଭୁବନେଶ୍ୱର, ୨୩।୨(ବ୍ୟୁରୋ): ଜଗତ୍ସିଂହପୁର ଏମ୍ପି ଡା. ରାଜଶ୍ରୀ ମଲ୍ଲିକ ବୁଧବାର ଦିଲ୍ଲୀ ଯାତ୍ରା କରୁଥିବାବେଳେ ବିମାନରେ ଅସୁସ୍ଥ ହୋଇପଡ଼ିଥିବା ଜଣେ ଯାତ୍ରୀଙ୍କୁ ଚିକିତ୍ସା କରି ତାଙ୍କ ଜୀବନ ରକ୍ଷା କରିଛନ୍ତି। ଏନେଇ ସେ ତାଙ୍କ ଫେସ୍ବୁକ୍ ଆକାଉଣ୍ଟରେ ପୋଷ୍ଟ କରିଛନ୍ତି। ରାଜଶ୍ରୀ ଇଣ୍ଡିଗୋ ଏୟାରଲାଇନ୍ସର ୬ଇ୨୦୬୫ ବିମାନରେ ଦିଲ୍ଲୀ ଯାତ୍ରା କରୁଥିଲେ। ବିମାନଟି ପୂର୍ବାହ୍ନ ୧୦ଟା ୨୦ ମିନିଟ୍ରେ ଦିଲ୍ଲୀରେ ଅବତରଣ କରିଥିଲା। ଅବତରଣ କରିବାର ୨୦ ମିନିଟ୍ ପୂର୍ବରୁ ବିମାନରେ ଯାଉଥିବା ବ୍ରହ୍ମପୁରର ଜଣେ ଯାତ୍ରୀଙ୍କୁ ବାତ ମାରିବାରୁ ସେ ଅଚେତ ହୋଇପଡ଼ିଥିଲେ। ପେଷାରେ ଡାକ୍ତର ଥିବା ଏମ୍ପି ରାଜଶ୍ରୀ ଏହା ଦେଖି ତତ୍କ୍ଷଣାତ୍ ସିଟ୍ରୁ ଉଠି ତାଙ୍କ ଚିକିତ୍ସା ଆରମ୍ଭ କରିଥିଲେ। ଉପସ୍ଥିତ ବୁଦ୍ଧି ଖଟାଇ ‘ମାଉଥ୍ ଓପନ ଆଣ୍ଡ୍ କ୍ଲିନ୍’ ପଦ୍ଧତିରେ ଚିକିତ୍ସା କରିବା ସହିତ ବିମାନର ଅକ୍ସିଜେନ ମାସ୍କ ଓ ମସାଜ ଦେଇ ତାଙ୍କର ଜୀବନ ରକ୍ଷା କରିଥିଲେ। ଏମ୍ପିଙ୍କ ଏହି ମହାନ କାର୍ଯ୍ୟକୁ ବିମାନର ସମସ୍ତ ଯାତ୍ରୀ ଓ ବିମାନ କର୍ତ୍ତୃପକ୍ଷ ପ୍ରଶଂସା କରିଥିଲେ। ସୂଚନାଯୋଗ୍ୟ, ପୂର୍ବରୁ ୨୦୧୮-୧୯ରେ ମଧ୍ୟ ରାଜଶ୍ରୀ ମଲ୍ଲିକ ବିମାନରେ ଯାଉଥିବା ଜଗତ୍ସିଂହପୁରର ଆଉଜଣେ ଯାତ୍ରୀଙ୍କର ଚିକିତ୍ସା କରି ଜୀବନ ରକ୍ଷା କରିଥିଲେ। ସେତେବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟୁଇଟ୍ କରି ଏମ୍ପିଙ୍କ ପ୍ରଶଂସା କରିଥିଲେ।
