ଜଗତ୍ସିଂହପୁର, ୨୪ା୧୨ (ପ୍ରମୋଦ କୁମାର ନାୟକ): ଜଗତ୍ସିଂହପୁର ଜିଲାସ୍ତରୀୟ ମତ୍ସ୍ୟ ଓ ପ୍ରାଣିସମ୍ପଦ ମେଳାର ଉଦ୍ଘାଟନୀ ଉତ୍ସବରେ ସୋମବାର ବିଶୃଙ୍ଖଳା ଦେଖାଦେଇଛି। କାର୍ଯ୍ୟସୂଚୀ ଅନୁଯାୟୀ ପୂର୍ବାହ୍ନ ୧୧ଟାରୁ ୧୧.୧୦ ଭିତରେ ଅତିଥିମାନଙ୍କୁ ମଞ୍ଚକୁ ସ୍ବାଗତ କରାଯିବା ସହ ମେଳାକୁ ଆନୁଷ୍ଠାନିକ ଉଦ୍ଘାଟନ କାର୍ଯ୍ୟକ୍ରମ ଥିଲା। ଏହା ପୂର୍ବରୁ ଜଗତ୍ସିଂହପୁର ବିଧାୟକ ଅମରେନ୍ଦ୍ର ଦାସଙ୍କ ସମେତ ଅନ୍ୟ ଅତିଥିମାନେ ସେଠାରେ ପହଞ୍ଚତ୍ ସାରିଥିଲେ। କିନ୍ତୁ ଏମ୍ପି ବିଭୁ ତରାଇ ପହଞ୍ଚତ୍ବାରେ ବିଳମ୍ବ ହୋଇଥିଲା। ଏଥିଯୋଗୁ ବିଧାୟକ ଦାସ ତୀବ୍ର ଅସନ୍ତୋଷ ବ୍ୟକ୍ତ କରି ସେଠାରୁ ଚାଲିଯାଇଥିଲେ। ଗଲାବେଳେ ଆୟୋଜକମାନଙ୍କୁ ତାଗିଦା କରି କହିଥିଲେ, ଆପଣମାନଙ୍କ ମନମାନି ଚଳିବ ନାହିଁ। ସମୟ ସବୁଠୁ ମୂଲ୍ୟବାନ୍। ଏଥିରେ ଖିଲାପ କଲେ ଗ୍ରହଣ କରାଯିବ ନାହିଁ। ଏହାପରେ ସଭାସ୍ଥଳରେ ନିଆରା ପରିବେଶ ସୃଷ୍ଟି ହୋଇଥିଲା। ଏ ସମ୍ପର୍କରେ ସିଡିଭିଓ ଡା. ଅଜୟ କୁମାର ସାହୁ କହିଛନ୍ତି, ଏମ୍ପି ରାସ୍ତାରେ ଥିବାରୁ କିଛି ସମୟ ଅପେକ୍ଷା କରିବାକୁ ଅନୁରୋଧ କରାଯାଇଥିଲା। ଏମ୍ପି ଆସିବା ପରେ କାର୍ଯ୍ୟକ୍ରମ ଆରମ୍ଭ ହୋଇଥାନ୍ତା। ମାତ୍ର ବିଧାୟକ ଦାସ ଅଧଘଣ୍ଟା କାଳ ବସି ରହିଥିବାରୁ ବିଳମ୍ବକୁ ଗ୍ରହଣ କରିପାରି ନ ଥିଲେ। ଯେହେତୁ ଏମ୍ପିଙ୍କୁ ଅତିଥି କରି ଡାକିଛନ୍ତି ଅପେକ୍ଷା କରିବାକୁ ପଡ଼ିଥିଲା। ଏପରି କରି ନ ଥିଲେ ତାଙ୍କୁ ଅସମ୍ମାନ ହୋଇଥାନ୍ତା ବୋଲି ଡ. ସାହୁ କହିଛନ୍ତି।
ସୂଚନାଯୋଗ୍ୟ, ନିମନ୍ତ୍ରଣ କାର୍ଡରେ ମନ୍ତ୍ରୀ ସମ୍ପଦ ଚନ୍ଦ୍ର ସ୍ବାଇଁ ମୁଖ୍ୟଅତିଥି, ଏମ୍ପି ତରାଇ ମୁଖ୍ୟବକ୍ତା, ବିଧାୟକ ଅମରେନ୍ଦ୍ର ଦାସ, ବାଲିକୁଦା-ଏରସମା ବିଧାୟକ ଶାରଦା ପ୍ରସନ୍ନ ଜେନା, ତିର୍ତ୍ତୋଲ ବିଧାୟକ ରମାକାନ୍ତ ଭୋଇ, ଜିଲା ପରିଷଦ ସଭାପତି ଭୋଇ, ଜିଲାପାଳ ତଥା ଜିଲା ମତ୍ସ୍ୟ ଓ ପ୍ରାଣିସମ୍ପଦ ମେଳା ଅଧ୍ୟକ୍ଷ ଜେ. ସୋନାଲ, ଜଗତ୍ସିଂହପୁର ପୌରାଧ୍ୟକ୍ଷା ସିଂହ ଓ ପାରାଦୀପ ପୌରାଧ୍ୟକ୍ଷ ବସନ୍ତ ବିଶ୍ୱାଳ ସମ୍ମାନିତ ଅତିଥିଭାବେ ଯୋଗଦେବେ ବୋଲି ଉଲ୍ଲେଖ ଥିଲା। କିନ୍ତୁ ମନ୍ତ୍ରୀ ସ୍ବାଇଁ, ବାଲିକୁଦା-ଏରସମା ବିଧାୟକ, ତିର୍ତ୍ତୋଲ ବିଧାୟକଙ୍କ ସମେତ ଜିଲାପାଳ ଓ ପାରାଦୀପ ପୌରାଧ୍ୟକ୍ଷ ଏଥିରେ ଯୋଗଦେଇ ନ ଥିଲେ।
