ନୟାଗଡ଼ ଅଫିସ,୧୪।୧୨: ଏକ୍ସପାଏରି ଇଞ୍ଜେକଶନ, ଟାବ୍ଲେଟ୍, ଟାବ୍ଲେଟ ଖୋଳ ଓ କ୍ୟାପ୍ସୁଲରେ ତିଆରି ହୋଇଛି ଓଡିଆ ଚଳଚ୍ଚିତ୍ର ଦମନର ପୋଷ୍ଟର । ୧୦ ଫୁଟ ଲମ୍ବ ଓ ୬ଫୁଟ ଓସାରର ଏହି ପୋଷ୍ଟର ତିଆରି କରିଛନ୍ତି ନୟାଗଡ଼ ଜିଲା ଗଣିଆ ବ୍ଲକ ଆଡକଟା ପଞ୍ଚାୟତ ଧୂଆମଡା ଗଁାର ଯୁବ ଚିତ୍ରଶିଳ୍ପୀ ରାକେଶ କୁମାର ମହାରଣା ା ତାଙ୍କର ଏହି ମୁଭି ପୋଷ୍ଟର ସାମାଜିକ ଗଣମାଧ୍ୟମରେ ଭାଇରାଲ ହେବାରେ ଲାଗିଛି ା ଓଡ଼ିଆ ଚଳଚ୍ଚିତ୍ର ଦମନ ଜାତୀୟ ଓ ଅନ୍ତର୍ଜାତୀୟସ୍ତରରେ ଲୋକପ୍ରିୟ ହେବାରେ ଲାଗିଛି ।
ରାକେଶ ଏହି ଚଳଚ୍ଚିତ୍ର ଦେଖିବା ପରେ ଏହି ସିନେମାକୁ ନେଇ ଆଉ କ’ଣ କଳାକୃତି କରିହେବ ସେ ସମ୍ପର୍କରେ ଚିନ୍ତା କରିଥିଲେ ।
ଚଳଚ୍ଚିତ୍ରଟି ଡାକ୍ତରଙ୍କ କାହାଣୀ ଉପରେ ପର୍ଯ୍ୟବେସିତ ହୋଇଥିବାରୁ ମେଡିସିନରେ ମୁଭି ପୋଷ୍ଟର କରିବାକୁ ମନସ୍ଥ କରିଥିଲେ । ତେବେ ଏତେ ମେଡିସିନ କିଣି କରିବା ସମ୍ଭବ ନ ଥିଲା । ତେଶୁ ଏକ୍ସପାଏରି ଔଷଧ ଓ ଇଞ୍ଜେକଶନରେ ମୁଭି ପୋଷ୍ଟର ତିଆରି କରାଗଲେ ଠିକ୍ ହେବ ବୋଲି ଭାବିଥିଲେ । ପରେ ଏକ୍ସପାଏରି ମେଡିସିନ ଓ ଇଞ୍ଜେକଶନ ସଂଗ୍ରହ କରିଥିଲେ ।
ଏଥିପାଇଁ ୩ ହଜାର ଷ୍ଟ୍ରିପ୍ ଟାବ୍ଲେଟ, ୧୦୦ ଷ୍ଟ୍ରିପ୍ କ୍ୟାପ୍ସୁଲ୍, ୧୫୦ ଇଞ୍ଜେକଶନ ଭାଏଲ ବ୍ୟବହାର ହୋଇଛି । ସେହିପରି କେତେକ ଟାବ୍ଲେଟର ଖୋଳ ବ୍ୟବହାର ହୋଇଛି । ଔଷଧ ସଂଗ୍ରହରେ ୨ମାସ, ଟାବ୍ଲେଟକୁ ଖୋଳରୁ କାଢ଼ିବା ଓ କାଟିବାରେ ୧୦ ଦିନ ସମୟ ଲାଗିଥିଲା ।
ସମ୍ପୂର୍ଣ୍ଣ ପୋଷ୍ଟର ତିଆରି ପାଇଁ ୧ଦିନ ସମୟ ଲାଗିଥିଲା । ପୋଷ୍ଟର ତିଆରି ଭୁବନେଶ୍ୱରସ୍ଥିତ କଳିଙ୍ଗ ନଗର କେ-୨ରେ ହୋଇଛି । ଏନେଇ ଯୁବ ଚିତ୍ରଶିଳ୍ପୀ ରାକେଶ କୁମାର ମହାରଣା କୁହନ୍ତି, ଆମ ଘର ଗଣିଆରେ ହୋଇଥିବାବେଳେ ମୁଁ ଭୁବନେଶ୍ୱର କେ-୨ରେ ରହୁଛି । ଭୁବନେଶ୍ୱର ମେ ଫେୟାର ହୋଟେଲରେ ଆର୍ଟ ୱାର୍କ କରୁଛି ।
ଦମନର ମୁଭି ପୋଷ୍ଟର କରି ମୁଁ ଖୁସି ଅନୁଭବ କରୁଛି, ଯାହାକି ଧୀରେ ଧୀରେ ଲୋକପ୍ରିୟ ହୋଇ ଚାଲିଛି । ଅନ୍ୟପକ୍ଷେ କଳାକର ପରିବାରୁ ଆସିଥିବାରୁ କଳା ପ୍ରତି ଦୁର୍ବଳତା ରହିଛି । ମୁଁ ଚତୁର୍ଥ ଶ୍ରେଣୀରୁ ବିଭିନ୍ନ ପ୍ରକାର ଚିତ୍ର ଆଙ୍କିବା ଆରମ୍ଭ କରିଥିଲି ା ଆଉ ପଛକୁ ଫେରି ଚାହିଁ ନାହିଁ ।
ବିନା ଗୁରୁରେ ମୋର କଳାକୃତି ଚାଲୁ ରହିଛି ବୋଲି ସେ କହିଛନ୍ତି ା
