କୋକସରା, ୧୮।୧୧ (ଡି.ଏନ.ଏ)- ଦେଶରେ ଆଦିବାସୀଙ୍କ ଉପରେ ହେଉଥିବା ଅନ୍ୟାୟ ଅତ୍ୟାଚାର ବିରୋଧରେ ରାଷ୍ଟ୍ରୀୟ ଆଦିବାସୀ ଏକତା ପରିଷଦ ପକ୍ଷରୁ ବୁଧବାର ଦେଶବ୍ୟାପି ଆନ୍ଦୋଳନ ଜାରି ରହିଥିବା ବେଳେ ଏହାକୁ ସମର୍ଥନ ଜଣାଇ ଆଦିବାସୀ ଏକତା ପରିଷଦର ସମର୍ଥନରେ ଭାରତ ମୁକ୍ତି ମୋର୍ଚ୍ଚା ଧର୍ମଗଡ଼ ଉପଖଣ୍ଡ ପକ୍ଷରୁ କୋକସରା ତହସିଲ ଅଫିସ ଆଗରେ ଆନ୍ଦୋଳନ କରାଯାଇଛି। ରାଷ୍ଟ୍ରୀୟ ଆଦିବାସୀ ଏକତା ପରିଷଦର କୋକସରା ସଭାପତି ଉପେନ୍ଦ୍ର ଶବରଙ୍କ ନେତୃତ୍ୱ ଓ ଭାରତ ମୁକ୍ତି ମୋର୍ଚ୍ଚା କାର୍ଯ୍ୟକାରୀ ସଭାପତି ଦୁର୍ଯ୍ୟୋଧନ ଜାଲଙ୍କ ଅଧ୍ୟକ୍ଷତାରେ କୋକସରା ତହସିଲ ଅଫିସ ଆଗରେ ଆନ୍ଦୋଳନ କରାଯାଇଛି। କୋକସରା ତହସିଲଦାରଙ୍କ ଜରିଆରେ ୧୦ଦଫା ଦାବିପତ୍ର ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ପ୍ରଦାନ କରାଯିବା ନେଇ ସଂଘ ପକ୍ଷରୁ ସୂଚନା ଦିଆଯାଇଛି । ଆନ୍ଦୋଳନରେ ବହୁଜନ ମୁକ୍ତି ମୋର୍ଚ୍ଚା ପାର୍ଟି, ଓଡିଶା କାର୍ଯ୍ୟକାରୀ ସଭାପତି ନିର୍ମଳ ଜାଲ, ଶବର ସମାଜ ଉପ-ସଭାପତି କୁମ ଶବର, କାର୍ଯ୍ୟକର୍ତ୍ତା ବିଦ୍ୟାଧର ଶବର, ଗଣ୍ଡ ସମାଜ କାର୍ଯ୍ୟକର୍ତ୍ତା ନିରନ ମାଝି, ବରା ସମାଜ କାର୍ଯ୍ୟକର୍ତ୍ତା ହୀରାଲାଲ ନାଏକ, ଭାରତ ମୁକ୍ତି ମୋର୍ଚ୍ଚା ଗମ୍ଭୀଗୁଡା, ସଭାପତି ଜୟରାମ ମହାନନ୍ଦ, ପରମେଶ୍ୱର ବାଗ ପ୍ରମୁଖ କର୍ମକର୍ତ୍ତା ଆନ୍ଦୋଳନରେ ସାମିଲ ହୋଇଥିଲେ।
