ନୂଆଦିଲ୍ଲୀ,୨ା୯: ଆସନ୍ତା ୧୪ ତାରିଖରୁ ପାର୍ଲାମେଣ୍ଟର ମୌସୁମୀ ଅଧିବେଶନ ଆରମ୍ଭ ହୋଇ ଅକ୍ଟୋବର ୧ ପର୍ଯ୍ୟନ୍ତ ଚାଲିବ। ଏନେଇ ଲୋକ ସଭା ସେକ୍ରେଟାରିଏଟ୍ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଏଥିରେ କୁହାଯାଇଛି ଯେ, ରାଷ୍ଟ୍ରପତି ରାମନାଥ କୋବିନ୍ଦ ସେପ୍ଟେମ୍ବର ୧୪ ପୂର୍ବାହ୍ନ ୯ଟାରେ ଲୋକ ସଭାରେ ଅଧିବେଶନ ଆରମ୍ଭ ପାଇଁ ନିର୍ଦ୍ଦେଶ ଦେଇଛନ୍ତି। ରାଜ୍ୟ ସଭା ସେକ୍ରେଟାରିଏଟ୍ ପକ୍ଷରୁ ମଧ୍ୟ ଏକ ପୃଥକ୍ ବିବୃତି ଜାରି କରାଯାଇଛି।
ସେପ୍ଟେମ୍ବର ୧୪ରୁ ଅକ୍ଟୋବର ୧ ପର୍ଯ୍ୟନ୍ତ ମୌସୁମୀ ଅଧିବେଶନ ଚଳାଇବା ପାଇଁ ପୂର୍ବରୁ ସଂସଦୀୟ ବ୍ୟାପାର କ୍ୟାବିନେଟ କମିଟି ସୁପାରିସ କରିଥିଲା। ସୂଚନାନୁସାରେ ଅଧିବେନଶରେ ମୋଟ ୧୮ଟି ଶିଟିଙ୍ଗ୍ ହେବ। ଛୁଟି କିମ୍ବର ସପ୍ତାହାନ୍ତ ରହିବ ନାହିଁ। କୋଭିଡ୍-୧୯ ମହାମାରୀ ଯୋଗୁ ଏହି ଅଧିବେଶନରେ ଅନେକ କିଛି ପ୍ରଥମଥର ପାଇଁ ହେବାକୁ ଯାଉଛି। ଏଥିଲାଗି ଜୋର୍ଦାର ପ୍ରସ୍ତୁତି ଚାଲିଛି। ସମସ୍ତ ଏମ୍ପିଙ୍କ କୋଭିଡ୍ ଟେଷ୍ଟ କରାଯିବ, ଲୋକ ସଭା ଓ ରାଜ୍ୟ ସଭାରେ ସଦସ୍ୟଙ୍କ ବସିବା ପାଇଁ ଉଭୟ ଚାମ୍ବର ଓ ଗ୍ୟାଲେରିରେ ବ୍ୟବସ୍ଥା କରାଯିବ। ଫିଜିକାଲ ଡିଷ୍ଟାନ୍ସିଂକୁ ଗୁରୁତ୍ୱ ଦିଆଯିବ। ସୂଚନାଯୋଗ୍ୟ, ମହାମାରୀ କରୋନା ସଂକ୍ରମଣକୁ ଦୃଷ୍ଟିରେ ରଖି ବଜେଟ ଅଧିବେଶନକୁ ନିର୍ଦ୍ଧାରିତ ସମୟର ୧୨ ଦିନ ପୂର୍ବରୁ ଅର୍ଥାତ୍ ମାର୍ଚ୍ଚ ୨୩ରେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ସ୍ଥଗିତ ରଖାଯାଇଥିଲା।
