ବାହାନଗା,୧୨ା୧୧(ଡି.ଏନ୍.ଏ.): ବାଲେଶ୍ୱର ଜିଲା ବାହାନଗା ବ୍ଲକ ୧୬ ନମ୍ବର ଜାତୀୟ ରାଜପଥର ଓଳିଆପାଟଣା ପୋଲ ନିକଟରେ ରାସ୍ତା ଦୁର୍ଘଟଣାରେ ମା’ ପୁଅଙ୍କର ମୃତ୍ୟୁ ଘଟିଛି।
ସୋର ଥାନା ଅଧୀନସ୍ଥ ଖୁଣ୍ଟା ଗ୍ରାମର ବୁଦ୍ଧିରାମ ସେନାପତିଙ୍କ ସ୍ତ୍ରୀ ଶୁକ ସେନାପତି, ତାଙ୍କ ୩ ବର୍ଷର ପୁଅ ଏବଂ ସମ୍ପର୍କୀୟ ପୁତୁରା ଭଗବାନ ସେନାପତିଙ୍କ ସହିତ (ଓଡି ୦୧ ଏଜେ ୨୨୦୮) ନମ୍ବର ବିଶିଷ୍ଟ ସ୍କୁଟିରେ ବାଲେଶ୍ୱର ଯାଉଥିଲେ। ତେବେ ବାହାନଗା ବ୍ଲକ ୧୬ ନମ୍ବର ଜାତୀୟ ରାଜପଥ ଓଳିଆପାଟଣା ପୋଲ ନିକଟରେ ସ୍କୁଟିକୁ ପଛପଟୁ ଏକ ମାଲ୍ ବୋଝେଇ (ଆରଜେ ୧୪ ଜିଏଲ ୫୯୫୦) ନମ୍ବର ଟ୍ରକ ଧକ୍କା ଦେଇଥିଲା। ଫଳରେ ପଛରେ ବସିଥିବା ମା’ ପୁଅ ରାସ୍ତାର ଡାହାଣ ପାଖକୁ ଛିଟିକି ପଡ଼ିବା ସହିତ ମୋଟରସାଇକେଲ ଚଳାଉଥିବା ସମ୍ପର୍କୀୟ ପୁତୁରା ଭଗବାନ ରାସ୍ତାର ବାମପଟକୁ ଛିଟିକି ପଡ଼ିଥିଲେ। ଯାହାକି ପଛପଟେ ଧକ୍କା ଦେଇଥିବା ଟ୍ରକର ଆଗରେ ମା’-ପୁଅ ପିଟି ହେବାରୁ ଘଟଣାସ୍ଥଳରେ ଦୁଇଜଣଙ୍କର ମୃତ୍ୟୁ ଘଟିଛି। ଖବର ପାଇ ଖନ୍ତାପଡ଼ା ଥାନା ପୋଲିସ ଘଟଣାସ୍ଥଳରେ ପହଞ୍ଚି ଗୁରୁତର ହୋଇଥିବା ପୁତୁରାଙ୍କୁ ଚିକିତ୍ସା ପାଇଁ ଖନ୍ତାପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇଥିଲେ। ମୃତ ମା’-ପୁଅଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବାଲେଶ୍ବର ମୁଖ୍ୟ ଚିକିତ୍ସାଳୟକୁ ପଠାଇଥିଲା। ଦୁର୍ଘଟଣା ଘଟାଇଥିବା ଟ୍ରକ୍କୁ ପୋଲିସ ଜବତ କରିଛି।
