ଭୁବନେଶ୍ୱର,(ବ୍ୟୁରୋ)/ ଧର୍ମଶାଳା, (ଡି.ଏନ.ଏ.)୨୧।୩: ନୟାଗଡ଼ ଜିଲା ରଣପୁର ଥାନା ମଝିଆଖଣ୍ଡ ଗୋଡ଼ିପୋଖରୀ ଗ୍ରାମର କ୍ୟାମେରାମ୍ୟାନ ମାନସ ସ୍ବାଇଁଙ୍କୁ ଅପହରଣ ଓ ନିର୍ଯାତନା ପରେ ହତ୍ୟା କରି ପୋତି ଦିଆଯିବା ଘଟଣାରେ ପୋଲିସର ତଦନ୍ତକୁ ନେଇ ନାନା ପ୍ରଶ୍ନବାଚୀ ସୃଷ୍ଟି ହୋଇଛି। ମୁଖ୍ୟ ଅଭିଯୁକ୍ତଙ୍କ ସହ ସହଯୋଗୀଙ୍କୁ ପୋଲିସ ଧରିପାରୁ ନ ଥିବାରୁ ଅସନ୍ତୋଷ ବଢ଼ିବାରେ ଲାଗିଛି। ତେବେ ଏକମାତ୍ର ରୋଜଗାରିଆ ପୁଅ ମାନସଙ୍କୁ ହରାଇ ମା’ ଯମୁନା ସ୍ବାଇଁ ସମ୍ପୂର୍ଣ୍ଣ ଭାଙ୍ଗି ପଡ଼ିଛନ୍ତି। ସେ ନ୍ୟାୟ ପାଇଁ ଗଣମାଧ୍ୟମ ଜରିଆରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଗୁହାରି କରିଛନ୍ତି। ଯମୁନା କହିଛନ୍ତି, ଆମେ ନବୀନ ପଟ୍ଟନାୟକଙ୍କୁ ଭୋଟ ଦେଇଛୁ। ସେ ଆମର ମୁଖ୍ୟମନ୍ତ୍ରୀ। ଆମର ସେ କ’ଣ ବୁଝିଲେ। ମୋ ପୁଅକୁ ନ୍ୟାୟ କିପରି ସେମାନେ ଦେବେ। ମୁଖ୍ୟମନ୍ତ୍ରୀ କ’ଣ ଜାଣିନାହାନ୍ତି ମୋ ପୁଅ କିପରି ନ୍ୟାୟ ପାଇବ। ନବୀନ ବାବୁ ହିଁ ବୁଝନ୍ତୁ ବୋଲି ସେ କହିଛନ୍ତି।
ଘଟଣାର ମୁଖ୍ୟ ଅଭିଯୁକ୍ତ କୁହାଯାଉଥିବା ଶର୍ମିଷ୍ଠା ରାଉତ ଓ ସହଯୋଗୀମାନେ ଫେରାର ଅଛନ୍ତି। ପୋଲିସର ୩ଟି ଟିମ୍ ଚଢ଼ାଉ ଜାରି ରଖିଥିଲେ ମଧ୍ୟ ସେମାନଙ୍କୁ ଖୋଜିପାଉ ନାହାନ୍ତି। ସେପଟେ ପୋଲିସ ଟିମ୍ ଏୟାରପୋର୍ଟ ଥାନା ଅଞ୍ଚଳରେ ଥିବା ଶର୍ମିଷ୍ଠାଙ୍କ ଦୟାଲ ଆଶ୍ରମର ଆଖପାଖରେ ଲାଗିଥିବା ସିସିଟିଭି ହାର୍ଡଡିସ୍କକୁ ଜବତ କରି ଯାଞ୍ଚ କରୁଛି। ଅନ୍ୟପଟେ ଧର୍ମଶାଳା ଅଞ୍ଚଳରୁ ମାନସଙ୍କ ମୋବାଇଲକୁ ଚାନ୍ଦବାଲି ପୋଲିସ ଜବତ କରିଛି। ଗତ ଏକମାସ ତଳେ ସ୍ଥାନୀୟ ଜାଲଶୁଖା ଗ୍ରାମର ଶ୍ରମିକ ସୁରେଶ ନାଏକ କାମ କରିବାକୁ ଯାଉଥିବାବେଳେ ଧର୍ମଶାଳା ଥାନା ଅଧୀନ ୧୬ ନଂ. ଜାତୀୟ ରାଜପଥ ଶଙ୍ଖାରିଡ଼ିହ ନିକଟ ରାସ୍ତା ପାର୍ଶ୍ୱରୁ ଉକ୍ତ ମୋବାଇଲ ପାଇଥିଲେ। ପରେ ତାହାକୁ ସେ ସେଠାରେ ପାନ ଦୋକାନ କରିଥିବା ସୁଶାନ୍ତ ଗୁରୁଙ୍କୁ ଦେଇଥିଲେ। ପରେ ଚାନ୍ଦବାଲି ପୋଲିସ ପହଞ୍ଚତ୍ ମୋବାଇଲ ପାଇଥିବା ବ୍ୟକ୍ତିଙ୍କୁ ପଚରାଉଚରା କରିବା ସହ ଧର୍ମଶାଳା ପୋଲିସ ଉପସ୍ଥିତିରେ ମୋବାଇଲ ଫୋନଟିକୁ ଜବତ କରିଛି। ସିସିଟିଭି ଓ ମୋବାଇଲ ଫୋନ୍ରୁ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ପାଇବାକୁ ଆଶା ରଖିଛି ପୋଲିସ।
