ରଣପୁର,୧୭ା୧୦ (ସ୍ବ.ପ୍ର.): ନୟାଗଡ଼ ଜିଲା ରଣପୁରର ବନ୍ଧମୁଣ୍ଡା ଗ୍ରାମ ପଞ୍ଚାୟତ ଅଧୀନରେ ଥିବା ମାଳ ଜଙ୍ଗଲ ଭିତରେ ଆରାଧ୍ୟା ଦେବୀ ମା’ ଖିଲାମୁଣ୍ଡା ରଣପୁର ରାଜାଙ୍କ ନିମନ୍ତ୍ରଣରେ ଗତ ଦ୍ୱିତୀୟା ଓଷାଠାରୁ ଷୋଳପୂଜା ପାଇଁ ରଣପୁର ରାଜନଅରରେ ଅବସ୍ଥାପନ କରିଥିଲେ । ପ୍ରତିବର୍ଷ ଦଶହରା ଦିନ ଭକ୍ତମାନେ ରଣପୁର ଦଶହରା ପଡ଼ିଆରେ ପୂଜାର୍ଚ୍ଚନା କରି ମା’ଙ୍କୁ ବିଦାୟ ଦେଇଥାନ୍ତି। କିନ୍ତୁ ଗତବର୍ଷ କୋଭିଡ୍ କଟକଣା ଯୋଗୁ ମା’ ଦଶହରା ପଡ଼ିଆକୁ ଆସି ନ ଥିଲେ। କିନ୍ତୁ ଚଳିତବର୍ଷ ମା’ ଦଶହରା ପଡ଼ିଆରୁ ବିଦାୟ ନେଇଛନ୍ତି।
ଶୁକ୍ରବାର ରାତି ୭.୩୦ରେ ରଣପୁର ରାଜା ସାହେବ ଦିଲୀପ ଚନ୍ଦ୍ର ସିଂହଦେଓ, ସେନାପତି, ମନ୍ତ୍ରୀ,ଜଗୁଆଳ ଼ଏବଂ ରାଜ ପୁରୋହିତଙ୍କ ସମେତ ବହୁ ଭକ୍ତ ମା’ଙ୍କୁ ନେଇ ଏକ ବିରାଟ ଶୋଭାଯାତ୍ରାରେ ଦଶହରା ପଡ଼ିଆ ଅଭିମୁଖେ ବାହାରି ଥିଲେ। ଘଣ୍ଟ, କାହାଳି ଓ ବାଦ୍ୟ ସହ ଭକ୍ତମାନେ ବାଣ ଫୁଟାଇ ଶୋଭାଯାତ୍ରାରେ ରଣପୁର ସହର ପରିକ୍ରମା କରିଥିଲେ ା ଏହାପରେ ମା’ ଖିଲାମୁଣ୍ଡାଙ୍କୁ ହାଟସାହିଠାରେ ଥିବା ଦଶହରା ପଡ଼ିଆକୁ ଆଣିଥିଲେ । ସେଠାରେ ରାଜା ମା’ ଖିଲାମୁଣ୍ଡାଙ୍କୁ ପୂଜାର୍ଚ୍ଚନା କରିଥିଲେ। ସେହି ସମୟରେ ପୂର୍ବରୁ ପ୍ରସ୍ତୁତ ଥିବା ଏକ ପାରାକୁ ଆକାଶକୁ ଛଡ଼ାଯାଇଥିଲା।
ଅନ୍ଧାର ରାତିରେ ଭକ୍ତ ପାରା ଦେହରେ ମା’ ଖିଲାମୁଣ୍ଡା ବିଜେକରି ନିଜ ଆସ୍ଥାନ ରାଆଁଳକୁ ଚାଲିଯାଇଥିଲେ। ଠିକ୍ ସେହି ସମୟରେ ମା’ଙ୍କୁ ବିଦାୟ ଦେବା ପାଇଁ ୭ ଥର ତୋପ ସଲାମି ଦିଆଯାଇଥିଲା। ଛଡ଼ା ଯାଇଥିବା ପାରା ଶନିବାର ମାଳ ଅଞ୍ଚଳରେ ଥିବା ମା’ଙ୍କ ମନ୍ଦିର ପାଖରେ ମରିପଡ଼ିଥିବା ସ୍ଥାନୀୟ ଅଞ୍ଚଳବାସୀ ଦେଖିଥିଲେ। ମା’ ଖିଲାମୁଣ୍ଡା ନିଜ ଆସ୍ଥାନକୁ ଫେରି ଆସିଲେ ବୋଲି ସ୍ଥାନୀୟ ଆଦିବାସୀ ମାନଙ୍କ ବିଶ୍ୱାସ ରହିଛି।
