ଦାରିଙ୍ଗବାଡ଼ି,୨୭।୧(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ସିମନବାଡ଼ି ଶିବ ମନ୍ଦିର ପ୍ରାଙ୍ଗଣରେ ଦୁଇଦିନ ଧରି ଭାରତମାତା ପୂଜନ ଉତ୍ସବ ସହ ଅମୃତ ମିଳନ କାର୍ଯ୍ୟକ୍ରମ ବହୁ ଆଡମ୍ବରରେ ପାଳନ କରାଯାଇଛି। କାର୍ଯ୍ୟକ୍ରମକୁ ସଂସ୍କାର ଭାରତୀ ପକ୍ଷରୁ ସିମନବାଡ଼ି ପଞ୍ଚାୟତର ଅମୃତ ପରିବାର ପକ୍ଷରୁ ଆୟୋଜନ କରାଯାଇଥିଲା।
ପ୍ରକାଶ ଯେ, ପ୍ରତିବର୍ଷ ସାଧାରଣତନ୍ତ୍ର ଦିବସକୁ ସିମନବାଡ଼ିଠାରେ ଭାରତମାତା ପୂଜନ ଉତ୍ସବ ଭାବେ ପାଳନ କରାଯାଉଛି। ଏହା ଗତ ୧୦ବର୍ଷ ଧରି ପାଳନ କରାଯାଉଥିବା ବେଳେ ସାଧାରଣତନ୍ତ୍ର ଦିବସରେ ସ୍ବତନ୍ତ୍ର ଭାବେ ଭାରତମାତା ପୂଜନ ଉତ୍ସବ ପାଳନ କରାଯାଇଛି। ଉତ୍ସବକୁ ଚଳିତ ବର୍ଷ ଆରାଧନା ନାମରେ ନାମିତ କରାଯାଇଛି। ବ୍ଲକ ତଥା ଜିଲା ଓ ଜିଲା ବାହାରୁ ଜନସାଧାରଣ କାର୍ଯ୍ୟକ୍ରମରେ ଯୋଗ ଦେଇଥିଲେ। କାର୍ଯ୍ୟକ୍ରମ ବୁଧବାର ଆରମ୍ଭ ହୋଇ ଗୁରୁବାର ଉଦ୍ଯାପିତ ହୋଇଛି। ଏହି ଦୁଇଦିନିଆ କାର୍ଯ୍ୟକ୍ରମରେ ନଗରପରିକ୍ରମା, ସଂକୀର୍ତ୍ତନ, ଆଧ୍ୟାତ୍ମିକ ଚେତନା, ପତାକା ଉତ୍ତୋଳନ ସହ ସମ୍ବିଧାନ ସମ୍ପର୍କରେ ଲୋକଙ୍କୁ ସଚେତନ କରାଇବା ସହ ଯୁବପିଢ଼ିଙ୍କୁ ସଂସ୍କାର, ସାମାଜିକ ଶିକ୍ଷା ଆଦି ପରାମର୍ଶ ଦିଆଯାଇଛି। ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମରେ ଓଡ଼ିଶୀ ନୃତ୍ୟ ସହ ମୟୂରଭଞ୍ଜରୁ ଆସିଥିବା ଛଉନୃତ୍ୟ, ଖୋର୍ଦ୍ଧା ଜିଲାର ପାଇକଆଖଡ଼ା ଆଦି ବିଭିନ୍ନ ପାରମ୍ପରିକ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମକୁ ନିରଞ୍ଜନ ପଣ୍ଡା ଏବଂ ସଂସ୍କାର ଭାରତୀ ସାହିତ୍ୟ ବିଭାଗ ମୁଖ୍ୟ ତପନ ବରିହା ପ୍ରମୁଖ ପରିଚାଳନା କରଥିଲେ। ସେହିପରି ମୟୂରଭଞ୍ଜର ଅକ୍ଷୟ ମହାନ୍ତ, ସୁଶାନ୍ତ ମହାନ୍ତ, ଇତିଶ୍ରୀ ମହାନ୍ତ, ବୀଣାପାଣି ମହାନ୍ତ ପ୍ରମୁଖ କଳାକାର ନିଜ କଳା ପ୍ରଦର୍ଶନ କରିଥିଲେ। ସେହିପରି ଅଞ୍ଚଳର ଦେଶପ୍ରେମୀ, ସ୍ଥାନୀୟ ମୁକ୍ତିମଣ୍ଡପ ଶ୍ରଦ୍ଧାଳୁ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
