ଆଙ୍କାରା,୧୧।୨: ଫେବୃଆରୀ ୬ ତାରିଖରେ ତୁର୍କୀ ଏବଂ ସିରିଆରେ ହୋଇଥିବା ଭୟଙ୍କର ଭୂକମ୍ପରେ ବ୍ୟାପକ କ୍ଷୟକ୍ଷତି ହୋଇଛି। ପ୍ରଭାବିତ ଅଞ୍ଚଳରେ ବର୍ତ୍ତମାନ ଉଦ୍ଧାର କାର୍ଯ୍ୟ ଚାଲିଛି। ଶୁକ୍ରବାର ରାତିରେ ମୃତକଙ୍କ ସଂଖ୍ୟା ୨୩ହଜାର ଅତିକ୍ରମ କରିଥିବା ବେଳେ ଆହତଙ୍କ ସଂଖ୍ୟା ୪୦ ହଜାରରୁ ଅଧିକ ରହିଛି। ଭାରତୀୟ ଉଦ୍ଧାରକାରୀ ଦଳର ଜଣେ ସଦସ୍ୟ କହିଛନ୍ତି ଯେ, ତୁର୍କୀର ଅନେକ ସହରରେ ତାପମାତ୍ରା ଶୂନରୁ କମ୍, ଯେଉଁଠାରେ ତୁଷାରପାତ ମଧ୍ୟ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି କରୁଛି। ଇତିମଧ୍ୟରେ ସିରିଆ ସୀମାନ୍ତ ପ୍ରଦେଶରେ ଭୂକମ୍ପର ୧୦୮ ଘଣ୍ଟା ପରେ ଜଣେ ମହିଳା ଏବଂ ତାଙ୍କ ୩ ଶିଶୁ ଉଦ୍ଧାର ହୋଇଛନ୍ତି। ସେମାନଙ୍କ ମଧ୍ୟରେ ଏକ ନବଜାତ ଶିଶୁ ମଧ୍ୟ ଥିଲେ। ଯାହାର ଚିତ୍ର ବର୍ତ୍ତମାନ ସାରା ବିଶ୍ୱରେ ଚର୍ଚ୍ଚାରେ ଅଛି। ସେହିଭଳି ୯୦ ଘଣ୍ଟା ପରେ ଉଦ୍ଧାରକାରୀ ଟିମ ୧୦ ଦିନର ଶିଶୁ ଏବଂ ତାଙ୍କ ମା’ଙ୍କୁ ଜୀବନ୍ତ ଉଦ୍ଧାର କରିଥିଲେ।
