କୋକସରା/ଗୋଲାମୁଣ୍ଡା,୨୭ା୧୧(ଡି.ଏନ.ଏ.): ରବିବାର ସନ୍ଧ୍ୟାରେ କଳାହାଣ୍ଡି ଜିଲା ଗୋଲାମୁଣ୍ଡା ବ୍ଲକ ଅଧୀନ ତୁମୁରା ନିକଟରୁ ୩୦ରୁ ଊର୍ଦ୍ଧ୍ୱ ଦାଦନ ଶ୍ରମିକଙ୍କୁ ଉଦ୍ଧାର କରାଯାଇଛି। ସେମାନଙ୍କ ଘର କୋକସରା ବ୍ଲକ ମହିମା ପଞ୍ଚାୟତ ଘଣ୍ଟିଗୁଡା ଗ୍ରାମରେ। ଶ୍ରମିକମାନେ ନୂଆପଡା ଜିଲା ହାତୀବନ୍ଧାର ଜଣେ ଦାଦନ ଦଲାଲଙ୍କ ପ୍ରଲୋଭନରେ ପଡି ହାଇଦ୍ରାବାଦର ଏକ ଇଟାଭାଟିରେ କାମ କରିବାକୁ ଶନିବାର ରାତିରେ ଗାଁରୁ ଏକ ପିକ୍ଅପ୍ ଭ୍ୟାନରେ ଯାଉଥିଲେ। ବାଟରେ ଗୋଲାମୁଣ୍ଡା ବ୍ଲକ ତୁମୁରା ନିକଟରେ ଦଲାଲ ଜଣକ ଜଣଙ୍କ ପିଛା ଅଗ୍ରୀମ ୩୫ ହଜାର ଟଙ୍କା ଦେବାକୁ କହିଥିଲେ । ତେବେ ଟଙ୍କା ଦେଇ ନ ପାରିବାରୁ ଶ୍ରମିକମାନେ ଆଉ ହ୍ରାଇଦାବାଦ ଯାଇ ନ ପାରି ସେଠାରେ ଅଟକି ରହିଥିଲେ। ଏନେଇ କୌଣସି ସୂତ୍ରରୁ ଖବରପାଇ ଗୋଲାମୁଣ୍ଡା ବ୍ଲକ ଅଧ୍ୟକ୍ଷ ବିନ୍ଦୁ ମହାନନ୍ଦ ପହଞ୍ଚି ଶ୍ରମିକଙ୍କ ସହ ଆଲୋଚନା କରିଥିଲେ। ସେ ଘଟଣା ସମ୍ପର୍କରେ କୋକସରା ବ୍ଲକ ଉପାଧ୍ୟକ୍ଷ ରାଜୀବ କୁମାର ଅଗ୍ରୱାଲ ଓ ପ୍ରଶାସନିକ ଅଧିକାରୀଙ୍କୁ ଜଣାଇଥିଲେ। ଗୋଲାମୁଣ୍ଡା ବ୍ଲକ ଅଧ୍ୟକ୍ଷ ମହାନନ୍ଦଙ୍କ ତତ୍ତ୍ୱାବଧାନରେ ଶ୍ରମିକମାନଙ୍କୁ ଉଦ୍ଧାର କରାଯାଇଥିଲା । ପରେ ସେମାନଙ୍କୁ ଏକ ଗାଡିରେ ଘଣ୍ଟିଗୁଡା ପଠାଇବା ପାଇଁ ବ୍ୟବସ୍ଥା କରିଥିବା ଜଣାପଡିଛି।
