ତିହିଡ଼ି,୧୩।୬ (କାଳନ୍ଦୀ ବେହେରା): ଭଦ୍ରକ ଜିଲା ଧାମନଗର ବ୍ଲକ ଅନ୍ତର୍ଗତ ବୈତରଣୀ ଓ କୋଚିଳା ନଦୀର ସଙ୍ଗମସ୍ଥଳ ଗାନ୍ଧୀଘାଟ ଶାସନ ପ୍ରତିବର୍ଷ ବନ୍ୟା ବିଭୀଷିକାର ଶିକାର ହେଉଛି। ଗାନ୍ଧୀଘାଟ ଶାସନ ପଛପଟରେ ଥିବା ହସନାବାଦ, ଅର୍ଜୁନପୁର ଓ ପ୍ରଧାନୀ ପଞ୍ଚାୟତର ପ୍ରାୟ ୧୦ ହଜାରରୁ ଅଧିକ ଲୋକ ପ୍ରତିବର୍ଷ ବନ୍ୟା ଯନ୍ତ୍ରଣା ଭୋଗୁଛନ୍ତି।
ବୈତରଣୀ-କୋଚିଳା ସଙ୍ଗମସ୍ଥଳ ନିକଟରେ ଥିବା ଦୁଇଟି ଗାଁ ଅସ୍ତକ ଓ ଅଣ୍ଡଳଡିହ ମଧ୍ୟବର୍ତ୍ତୀ ଅଞ୍ଚଳରେ କୌଣସି ସୁଦୃଢ଼ ଘେରିବନ୍ଧ ନଥିବାରୁ ବନ୍ୟା ସମୟରେ ପାଣି ପଛପଟ ଦେଇ ପ୍ରବେଶ କରି ଏହି ତିନି ପଞ୍ଚାୟତରେ ବ୍ୟାପକ କ୍ଷତି ଘଟାଏ। ଅନେକ ଗାଁରେ ପ୍ରଥମ ମହଲା ପର୍ଯ୍ୟନ୍ତ ପାଣି ପଶିଯାଏ। ଫଳରେ ଲୋକମାନେ ପଶୁସମ୍ପଦ ସହିତ ନଦୀବନ୍ଧ ଓ ପୋଲ ଉପରେ ଆଶ୍ରୟ ନେବାକୁ ବାଧ୍ୟ ହୁଅନ୍ତି। ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, ଗତବର୍ଷ ବନ୍ୟାର ପ୍ରକୋପ ଅଧିକ ଥିଲା। ବୈତରଣୀ ନଦୀର ବାମପାର୍ଶ୍ୱରେ ଥିବା ଏସ୍କେଏଫ (ଘୋଷରା ) ନିକଟ ଅଞ୍ଚଳରେ ଜଳସମ୍ପଦ ବିଭାଗ ପକ୍ଷରୁ କୌଣସି ସଠିକ ଅନୁଧ୍ୟାନ ବିନା ଉଚ୍ଚତା ବୃଦ୍ଧି କରାଯାଇଥିବାରୁ ବୈତରଣୀ ଓ କୋଚିଳା ନଦୀର ପାଣି ସ୍ବାଭାବିକ ଭାବେ ନିଷ୍କାସନ ହୋଇପାରିନଥିଲା। ଏହା ଫଳରେ ପାଣି ପଛପଟକୁ ଫେରି ହସନାବାଦ, ଅର୍ଜୁନପୁର ଓ ପ୍ରଧାନୀ ପଞ୍ଚାୟତରେ ପଶି ବ୍ୟାପକ କ୍ଷତି ଘଟାଇଥିଲା। ଗତବର୍ଷ ଏହି ସମସ୍ୟାକୁ ନେଇ ସର୍ବଦଳୀୟ ବୈଠକ ଅନୁଷ୍ଠିତ ହୋଇଥିଲା। ତିନି ପଞ୍ଚାୟତର ଲୋକପ୍ରତିନିଧି ଓ ସ୍ଥାନୀୟ ବାସିନ୍ଦାମାନେ ମନ୍ତ୍ରୀଙ୍କୁ ଅବଗତ କରାଇଥିଲେ। ମନ୍ତ୍ରୀ ସ୍ଥଳ ପରିଦର୍ଶନ ମଧ୍ୟ କରିଥିଲେ, ସେଠି କିଛି କାମ ବି କରିଛନ୍ତି ହେଲେ ଏପର୍ଯ୍ୟନ୍ତ ଦୃଶ୍ୟମାନ ପଦକ୍ଷେପ ଗ୍ରହଣ କରାଯାଇନାହିଁ। ଆଗକୁ ବର୍ଷା ଦିନ ଆସୁଛି ,
ଆଗାମୀ ଦିନରେ ସରକାର ଓ ଜଳସମ୍ପଦ ବିଭାଗ ପକ୍ଷରୁ ସ୍ଥାୟୀ ପ୍ରତିକାର ବ୍ୟବସ୍ଥା କରାଗଲେ ହିଁ ଏହି ତିନି ପଞ୍ଚାୟତର ହଜାର ହଜାର ଲୋକ ବନ୍ୟା ବିପଦରୁ ମୁକ୍ତି ପାଇପାରିବେ ବୋଲି ସାଧାରଣରେ ଦାବି ହେଉଛି।