ନୂଆଦିଲ୍ଲୀ,୧୧।୧୦: କୋଭିଡ୍-୧୯ ଯୋଗୁ ଉପୁଜିଥିବା ସଙ୍କଟ ସମୟରେ ଲୋକଙ୍କୁ ଆଶ୍ୱସ୍ତି ଦେବା ଲାଗି ସରକାର ୬ ମାସର ମୋରାଟୋରିୟମ ସୁବିଧା ଘୋଷଣା କରିଥିଲେ। ଏହି ଅବଧିରେ ବ୍ୟାଙ୍କଗୁଡ଼ିକ ସୁଧ ଉପରେ ସୁଧ ଲାଗୁ କରିବାରୁୁ ସୁପ୍ରିମକୋର୍ଟରେ ମାମଲା ପହଞ୍ଚିଥିଲା। ସର୍ବୋଚ୍ଚ ନ୍ୟାୟାଳୟ ଏହି ମାମଲାରେ ବର୍ତ୍ତମାନ ଶୁଣାଣି ଜାରି ରଖିଛନ୍ତି। କେନ୍ଦ୍ର ସରକାର ଏବଂ ରିଜର୍ଭ ବ୍ୟାଙ୍କ(ଆର୍ବିଆଇ)କୁ ଏହି ମାମଲାରେ ପକ୍ଷଭୁକ୍ତ କରାଯାଇଛି। ଶନିବାର ହୋଇଥିବା ଶୁଣାଣିରେ ଉଭୟ କେନ୍ଦ୍ର ସରକାର ଏବଂ ଆର୍ବିଆଇ ପକ୍ଷ ରଖିଛନ୍ତି। ରିଜର୍ଭ ବ୍ୟାଙ୍କ କହିଛି ଯେ, ମୋରାଟୋରିୟମ ଅବଧି ବଢ଼ିଲେ ଏହା ଦେଶର ଅର୍ଥ ବ୍ୟବସ୍ଥା ଲାଗି ବିପଦ ସୃଷ୍ଟି କରିବ।
ଏଭଳି ଗୁରୁତ୍ୱପୂର୍ଣ୍ଣ ଦିଗକୁ ବିଚାର କରି ଅନାଦାୟ ଋଣ(ଏନ୍ପିଏ) ବର୍ଗୀକରଣ ଲାଗି ଆର୍ବିଆଇ ସୁପ୍ରିମକୋର୍ଟଙ୍କ ଅନୁମତି ଲୋଡ଼ିଛି। ସୂଚନାଯୋଗ୍ୟ, ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ବ୍ୟାଙ୍କ ଆକାଉଣ୍ଟଗୁଡିକ ଏନ୍ପିଏ ଘୋଷଣା କରିପାରୁନାହାନ୍ତି। ସୁପ୍ରିମକୋର୍ଟ ଜାରି କରିଥିବା ଅନ୍ତରୀଣ ନିର୍ଦ୍ଦେଶ ବ୍ୟାଙ୍କଗୁଡିକ ଲାଗି ସମସ୍ୟା ସୃଷ୍ଟି କରୁଛି। ଏହି ପ୍ରସଙ୍ଗ ବର୍ତ୍ତମାନ ଚୂଡାନ୍ତ ହୋଇପାରିନାହିଁ। ଫଳରେ କେନ୍ଦ୍ରୀୟ ବ୍ୟାଙ୍କର ନିୟାମକ କ୍ଷମତା ଗୌଣ ହେଉଥିବା ରିଜର୍ଭ ବ୍ୟାଙ୍କ ପକ୍ଷରୁ ସୁପ୍ରିମକୋର୍ଟରେ ଦାଖଲ କରାଯାଇଥିବା ସତ୍ୟପାଠରେ ଦର୍ଶାଯାଇଛି। ମାମଲାର ଚୂଡ଼ାନ୍ତ ଶୁଣାଣି ନ ହେବା ଯାଏ ବ୍ୟାଙ୍କ ଆକାଉଣ୍ଟଗୁଡିକୁ ଏନ୍ପିଏ ଘୋଷଣା କରାଯାଇପାରିବ ନାହିଁ ବୋଲି ସୁପ୍ରିମକୋର୍ଟ ପୂର୍ବରୁ ନିର୍ଦ୍ଦେଶ ଦେଇଛନ୍ତି। ଲୋକଙ୍କୁ ଋଣ ପୁନର୍ଗଠନ ସୁବିଧା ଯୋଗାଣର ବିଭିନ୍ନ ଦିଗ ସମ୍ପର୍କରେ ବିଚାରକରିବା ଲାଗି ରିଜର୍ଭ ବ୍ୟାଙ୍କ କେ.ଭି.କାମାଥ କମିଟି ଗଠନ କରିଥିଲେ। ଏହି କମିଟିର ସୁପାରିସ ସମ୍ପର୍କରେ ଜଣାଇବାକୁ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେଇଥିଲେ।
ଲୋକଙ୍କୁ କୋହଳ ସୁବିଧା ଅଧିକ ସମୟ ଯାଏ ପ୍ରଦାନ କରି ହେବ ନାହିଁ ବୋଲି କେନ୍ଦ୍ର ଅନ୍ୟ ଏକ ସତ୍ୟପାଠରେ କହିଛି। ତେଣୁ ଏ ନେଇ ହେଉଥିବା ଆବେଦନ ଉପରେ ସର୍ବୋଚ୍ଚ ନ୍ୟାୟାଳୟ ବେଶି ଧ୍ୟାନ ନ ଦେବାକୁ କେନ୍ଦ୍ର ନିବେଦନ କରିଛି। ସୂଚନାଯୋଗ୍ୟ, ସବୁ ବର୍ଗରେ ଲୋକଙ୍କୁ ଋଣ ଛାଡ଼ କରାଗଲେ ଦେଶର ବ୍ୟାଙ୍କିଙ୍ଗ୍ ବ୍ୟବସ୍ଥା ଦୋହଲିଯିବ ବୋଲି କେନ୍ଦ୍ର ପୂର୍ବରୁ ଉତ୍ତର ରଖିସାରିଛି। ମହାମାରୀ କରୋନା ଯୋଗୁ ଲୋକଙ୍କ ରୋଜଗାର ବର୍ତ୍ତମାନ ସଙ୍କଟରେ ରହିଛି। ଏଭଳି ସ୍ଥିତିରେ ଗତ ମାସରେ ଏକ ଆବେଦନର ବିଚାରକରି ସୁପ୍ରିମକୋର୍ଟ ବ୍ୟାଙ୍କଗୁଡିକୁ ଆକାଊଣ୍ଟ ଏନ୍ପିଏ ଘୋଷଣା ନ କରିବା ଲାଗି ନିର୍ଦ୍ଦେଶ ଦେଇଥିଲେ। ସରକାର ୬ ମାସର ମୋରାଟୋରିୟମ ଏବଂ ଏକକ ଋଣ ପୁନର୍ଗଠନ ସୁବିଧା ଘୋଷଣା କରିଛନ୍ତି। ମୋରାଟୋରିୟମ ଅବଧି ଅଗଷ୍ଟ ଶେଷ ଯାଏ ରହିଥିଲା। ସେହିଭଳି ବର୍ତ୍ତମାନ ଋଣ ପୁନର୍ଗଠନ ସୁବିଧା ପ୍ରଦାନ କରାଯାଉଛି। ଏହାବାଦ ୨ କୋଟି ଟଙ୍କାର ଋଣ ଉପରେ ଲାଗୁ ହେଉଥିବା ସୁଧର ସୁଧ ଭାର ବହନ କରିବାକୁ କେନ୍ଦ୍ର ସରକାର ରାଜି ଅଛନ୍ତି। ଆସନ୍ତା ୧୩ ତାରିଖରେ ଏହି ପ୍ରସଙ୍ଗରେ ପରବର୍ତ୍ତୀ ଶୁଣାଣି କରିବାକୁ ସୁପ୍ରିମକୋର୍ଟ ଧାର୍ଯ୍ୟ କରିଛନ୍ତି।
