ବରଗଡ଼,୧୩।୬(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ରବିଧାନ ସଂଗ୍ରହ ପ୍ରକ୍ରିୟାକୁ ମାସେ ବିତି ଯାଇଛି। ମାତ୍ର ଧାନ କିଣାବିକା ସମସ୍ୟା ଲାଗି ରହିଛି। ଅନ୍ୟଥର ଅପେକ୍ଷା ଏଥର ଚାଷୀମାନେ ଟୋକନ ସମସ୍ୟାରେ ଅଧିକ ଛନ୍ଦି ହୋଇ ଯାଇଛନ୍ତି। ଇତିମଧ୍ୟରେ ଅନେକ ଚାଷୀମାନଙ୍କ ଦ୍ୱିତୀୟ ପର୍ଯ୍ୟାୟ ଧାନବିକ୍ରି ଟୋକନ ଆସିଛି। ମାତ୍ର ପ୍ରଥମ ପର୍ଯ୍ୟାୟ ଭଳି ଦ୍ୱିତୀୟ ପର୍ଯ୍ୟାୟ ଟୋକନରେ ମଧ୍ୟ ତ୍ରୁଟି ରହିଥିବା ଚାଷୀମାନେ ଅଭିଯୋଗ କରିଛନ୍ତି। ଟୋକନରେ ବିକ୍ରିଯୋଗ୍ୟ ଧାନ ପରିମାଣ ଯଥେଷ୍ଟ କମ୍ ରହିଥିବା ଚାଷୀମାନେ କହିଛନ୍ତି। ଏଭଳି ଅଭିଯୋଗ ନେଇ ଶୁକ୍ରବାର ଚାଷୀ ସଂଗଠନ ଜୟ କିଷାନ ଆନ୍ଦୋଳନ ନେତୃତ୍ୱରେ ଚାଷୀମାନେ ସମବାୟ ସମିତି ସମୂହ ଉପନିବନ୍ଧକ(ଡିଆରସିଏସ୍)ଙ୍କୁ ଫେରାଦ ହୋଇଥିଲେ। ଧାନବିକ୍ରି ଟୋକନରେ ଦେଖାଯାଇଥିବା ତ୍ରୁଟି ବିଚ୍ୟୁତିର ସଂଶୋଧନ କରାଯାଇ ଏହି ସମସ୍ୟାର ସମାଧାନ କରିବାକୁ ସେମାନେ ଦାବି କରିଥିଲେ। ଏ ଦିଗରେ ତ୍ୱରିତ୍ ପଦକ୍ଷେପ ନିଆ ନଗଲେ ଆଗକୁ ଆନ୍ଦୋଳନ ତୀବ୍ର ହେବ ବୋଲି ଜୟ କିଷାନ ଆନ୍ଦୋଳନର ସମ୍ପାଦକ ହର ବଣିଆଁ ରୋକ୍ଠୋକ୍ ଚେତାବନୀ ଦେଇଥିଲେ।
ସେହିପରି ଧାନ କିଣାବିକା ସମସ୍ୟାର ସମାଧାନ ଦାବିରେ ଭାରତୀୟ କିସାନ ସଂଘ, ବରଗଡ଼ ଜିଲା ଶାଖାର ଏକ ପ୍ରତିନିଧି ଦଳ ମଧ୍ୟ ଶୁକ୍ରବାର ଜିଲାପାଳ ଆଦିତ୍ୟ ଗୋୟଲଙ୍କୁ ଫେରାଦ ହୋଇଥିଲେ। ଟୋକନ ସମସ୍ୟା ନେଇ ଝାରବନ୍ଧ ଡଭାରେ ଚାଷୀମାନେ ଦୀର୍ଘଦିନ ହେଲା ଅନଶନରେ ବସିଥିବା ସତ୍ତ୍ୱେ ପ୍ରଶାସନ ତାକୁ ଅଣଦେଖା କରୁଥିବା ଯୋଗୁ ଏହି ପ୍ରତିନିଧି ଦଳ ଉଦ୍ବେଗ ପ୍ରକାଶ କରିଥିଲେ। ସେହିପରି ଜିଲାପାଳ ଗୋୟଲଙ୍କୁ ୭ଦଫା ଦାବିରେ ସେମାନେ ଏକ ଦାବିପତ୍ର ପ୍ରଦାନ କରିଥିଲେ। ମଣ୍ଡିରୁ ତୁରନ୍ତ ଧାନ ଉଠାଇ ଚାଷୀଙ୍କୁ ବିକ୍ରିଧାନର ପ୍ରାପ୍ୟରାଶି ପ୍ରଦାନ, ସମସ୍ତ ଚାଷୀଙ୍କ ଟୋକନ ସମସ୍ୟାର ତ୍ୱରିତ୍ ସମାଧାନ, ଚାଷୀମାନଙ୍କୁ ଆବଶ୍ୟକ ମୁତାବକ ସାର ଯୋଗାଇ ଦେବା ଆଦି ଦାବି ରହିଛି। ଆସନ୍ତା ୩ଦିନ ମଧ୍ୟରେ ଦାବି ପୂରଣ କରା ନଗଲେ ଭାରତୀୟ କିସାନ ସଂଘ ଜିଲାପାଳଙ୍କ କାର୍ଯ୍ୟାଳୟ ଘେରାଉ କରିବ ବୋଲି ଚେତାବନୀ ଦେଇଛି। ଭାରତୀୟ କିସାନ ସଂଘ, ବରଗଡ଼ ଜିଲାର ଜିଲା ସଭାପତି ପୀତାମ୍ବର ସାହୁଙ୍କ ନେତୃତ୍ୱରେ ରାଜ୍ୟ ସଭାପତି ଶ୍ରୀମୁଖ ପ୍ରଧାନ, ରାଷ୍ଟ୍ରୀୟ ସଦସ୍ୟ କେଦାର ମିଶ୍ର, ଭୁପାଳ ବିଶି, ଚୈତନ୍ୟ କର୍ଣ୍ଣ, କୌସ୍ତୁଭ ସାହୁ, ସୁଜିତ ପ୍ରଧାନ, ରବିନ୍ଦ୍ର ବିଶି, କରୁଣାକର ପ୍ରଧାନ, ହରିଶ ପ୍ରଧାନ, ଭେଙ୍କଟେଶ୍ୱର କର୍ମୀ ପ୍ରମୁଖ ଦାବିପତ୍ର ପ୍ରଦାନ ସମୟରେ ଉପସ୍ଥିତ ଥିଲେ।