ଭୁବନେଶ୍ୱର,୬।୬: ୮ ଦିନ ମଧ୍ୟରେ ଓଡ଼ିଶା ଛୁଇଁବ ମୌସୁମୀ! ପ୍ରବଳ ଗରମ ଓ ଗୁଳୁଗୁଳିରୁ ଶୀଘ୍ର ମିଳିପାରେ ମୁକ୍ତି। ଆଗାମୀ ୬ରୁ ୮ ଦିନ ମଧ୍ୟରେ ଓଡ଼ିଶା ଛୁଇଁପାରେ ଦକ୍ଷିଣ-ପଶ୍ଚିମ ମୌସୁମୀ ବାୟୁ। ଭାରତୀୟ ପାଣିପାଗ ବିଭାଗ (IMD) ପକ୍ଷରୁ ଏନେଇ ଆକଳନ କରାଯାଇଛି।
ଦେଶର ମୁଖ୍ୟ ଭୂ-ଭାଗ କେରଳ ଛୁଇଁବା ପରେ ଏବେ ମୌସୁମୀ ବାୟୁ ଧୀରେ ଧୀରେ ଆଗକୁ ଅଗ୍ରସର ହେବାରେ ଲାଗିଛି। ପାଣିପାଗ ବିଭାଗର ସୂଚନା ଅନୁଯାୟୀ, ଓଡ଼ିଶାର କିଛି ଅଞ୍ଚଳକୁ ମୌସୁମୀ ବାୟୁ ଅଗ୍ରସର ହେବା ପାଇଁ ବାୟୁମଣ୍ଡଳୀୟ ପରିସ୍ଥିତି ସମ୍ପୂର୍ଣ୍ଣ ଅନୁକୂଳ ରହିଛି। ଯଦି ସବୁ କିଛି ଠିକ ରହେ, ତେବେ ଚଳିତ ବର୍ଷ ପବିତ୍ର ରଜ ସମୟକୁ ଅର୍ଥାତ ଆସନ୍ତା ଜୁନ ୧୧ରୁ ୧୪ ତାରିଖ ଭିତରେ ରାଜ୍ୟରେ ମୌସୁମୀ ବାୟୁ ପ୍ରବେଶ କରିବ।
ମୌସୁମୀ ବାୟୁ ଓଡ଼ିଶା ଆଡ଼କୁ ଅଗ୍ରସର ହେଉଥିବାରୁ ବାୟୁମଣ୍ଡଳରେ ଆର୍ଦ୍ରତା ବୃଦ୍ଧି ପାଇବ। ଏହାର ପ୍ରଭାବରେ ମୌସୁମୀ ପ୍ରବେଶ କରିବା ପୂର୍ୱରୁ ରାଜ୍ୟର ଅଧିକାଂଶ ସ୍ଥାନରେ ଗରମ ସହ ଗୁଳୁଗୁଳିର ପ୍ରକୋପ ଅଧିକ ଅନୁଭୂତ ହେବ। କିନ୍ତୁ ଏହା ସହିତ ଅନେକ ଜିଲାରେ ପ୍ରାକ-ମୌସୁମୀ ବର୍ଷା ଏବଂ କାଳବୈଶାଖୀର ପ୍ରଭାବ ମଧ୍ୟ ଦେଖିବାକୁ ମିଳିବ।
ପାଣିପାଗ ବିଶେଷଜ୍ଞଙ୍କ ଅନୁସାରେ, ଚଳିତ ବର୍ଷ ଏଲ ନିନୋ (El Ni୦o) ର ପ୍ରଭାବ ଯୋଗୁଁ ଜୁନରୁ ସେପ୍ଟେମ୍ୱର ମଧ୍ୟରେ ସାଧାରଣ ବୃଷ୍ଟିପାତର ପରିମାଣ ସାମାନ୍ୟ କମ ରହିପାରେ। ଦକ୍ଷିଣ ଏବଂ କେନ୍ଦ୍ରୀୟ ଓଡ଼ିଶାରେ ସ୍ୱାଭାବିକ ବର୍ଷା ହେବାର ସମ୍ଭାବନା ଥିବାବେଳେ, ଉତ୍ତର ଓଡ଼ିଶାରେ ବୃଷ୍ଟିପାତର ପରିମାଣ ସାଧାରଣଠାରୁ କମ ରହିବା ନେଇ ଆକଳନ କରାଯାଇଛି। ମୌସୁମୀ ଆସିବା ପରେ ହିଁ ରାଜ୍ୟରେ ତାପମାତ୍ରା ହ୍ରାସ ପାଇବ ଏବଂ ଚାଷ କାର୍ଯ୍ୟ ତ୍ୱରାନୱିତ ହେବ।
