ସୋସିଆଲ ମିଡିଆରେ ପ୍ରତିଦିନ ଅନେକ ଭିଡିଓ ଭାଇରାଲ ହୋଇଥାଏ। ଏହି ଭିଡିଓଗୁଡ଼ିକ ମଧ୍ୟରୁ କେତେକ ମଜାଳିଆ ହୋଇଥିବା ବେଳେ ଆଉ କେତେକ ଅତ୍ୟନ୍ତ ସ୍ପର୍ଶକାତର ହୋଇଥାଏ। ଏବେ ସେମିତି ଏକ ଭିଡିଓ ଭାଇରାଲ ହେଉଛି। ଯାହାକୁ ଦେଖିଲେ ପଶୁମାନଙ୍କୁ ଥଟ୍ଟା କରିବା କେତେ ଯେ ଭୟଙ୍କର ତାହା ବୁଝାପଡ଼ିବ।
ମାଙ୍କଡ଼ମାନେ ସବୁଠାରୁ ଚଞ୍ଚଳ ଏବଂ ହିଂସ୍ର ପ୍ରାଣୀମାନଙ୍କ ମଧ୍ୟରୁ ଅନ୍ୟତମ। ଭିଡିଓରେ ଦେଖିବେ ମାଙ୍କଡ଼କୁ ଚିଡ଼ାଇବା କିପରି ଜଣେ ଯୁବତୀଙ୍କୁ ମହଙ୍ଗା ପଡ଼ିଛି। ଜଣେ ଯୁବତୀ ପ୍ରାଣୀ ଉଦ୍ୟାନରେ ଏକ ମାଙ୍କଡ଼ର କେଜ୍ରେ ଆଘାତ କରୁଛନ୍ତି, ଏହା ପରେ ମାଙ୍କଡ଼ଟି ତାଙ୍କ କେଶ ଧରି ଖୁବ୍ ଜୋର୍ରେ ଭିଡ଼ି ନେଉଛି। ସାଧାରଣତଃ ପ୍ରାଣୀ ଉଦ୍ୟାନରେ ପର୍ଯ୍ୟଟକମାନେ ପଶୁମାନଙ୍କୁ ଥଟ୍ଟା କରିବା ଉଚିତ ନୁହେଁ। ଯେଉଁମାନେ ଏହି ପରାମର୍ଶକୁ ଗମ୍ଭୀରତାର ସହ ଗ୍ରହଣ କରନ୍ତି ନାହିଁ, ସେମାନେ ଅଡୁଆରେ ପଡନ୍ତି। ମେକ୍ସିକୋ ପ୍ରାଣୀ ଉଦ୍ୟାନରେ ଜଣେ ଯୁବତୀଙ୍କ ସହିତ ଏପରି ଘଟଣା ଘଟିଛି। ଭିଡିଓଟି ସୋସିଆଲ ମିଡିଆରେ ଶେୟାର କରାଯାଇଛି। ଯାହାକୁ ବର୍ତ୍ତମାନ ସୁଦ୍ଧା ୧୦ ମିଲିୟନରୁ ଅଧିକ ଲୋକ ଦେଖିସାରିଲେଣି। ସ୍ପାଇଡର ପ୍ରଜାତିର ମାଙ୍କଡ଼ମାନେ ଦକ୍ଷିଣ ଆମେରିକାର ଟ୍ରପିକାଲ ଜଙ୍ଗଲରେ ବାସ କରନ୍ତି, ଯାହା ମେକ୍ସିକୋ ଏବଂ ବ୍ରାଜିଲରେ ଅଧିକ ପରିମାଣର ଦେଖାଯାନ୍ତି।
