ବଣାଇଁ, ୧୭।୨(ପ୍ରଦୀପ ତ୍ରିପାଠୀ): ବଣାଇଁ ଉପଖଣ୍ଡ କିଷାନ ସମାଜ ପକ୍ଷରୁ ତାଙ୍କ ଜାତିକୁ ଆଳ କରି କିଛି ନ୍ୟସ୍ତସ୍ୱାର୍ଥ ବ୍ୟକ୍ତି ଏକ ଜାତି ଭିତ୍ତିକ ସଂଗଠନ କରି ଅର୍ଥ ଆଦାୟ କରିବା ନେଇ ଆଜି ବିରୋଧ ପ୍ରଦର୍ଶନ କରାଯିବା ସହ ବଣାଇଁ ସହର ପରିକ୍ରମା କରିବା ପରେ ଉପଜିଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀ ଓଡ଼ିଶା ଓ କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀଙ୍କୁ ସ୍ମାରକପତ୍ର ପ୍ରଦାନ କରିଛନ୍ତି।
ଶତାଧିକ ନେତା ଏହି ରାଲିରେ ‘ଛି ଛି ଛି ରେ ଉଗ୍ରେ ଛି’ ବୋଲି ନାରା ଦେଇ ବିକ୍ଷୋଭ ପ୍ରଦର୍ଶନ କରିଛନ୍ତି। ସମାଜର ଏକ ସଂଗଠନ ନାମରେ ଗୁରୁତର ଅଭିଯୋଗ ଆଣି ତାକୁ ଅସିଦ୍ଧ ଘୋଷଣା କରିବାକୁ ଦାବି ଜଣାଇଛନ୍ତି। କିଷାନ ଜନଜାତି ପ୍ରତିଟି କ୍ଷେତ୍ର ଓ ଯୋଜନା ବିଶେଷ କରି ଜମିପଟ୍ଟା, ବିଦ୍ୟାଳୟ ପ୍ରମାଣପତ୍ର, ଆଧାର ଓ ରାସନକାର୍ଡରେ କିଷାନ ଜନଜାତି ମାନ୍ୟତା ପାଇ ପୁରୁଷ ପୁରୁଷ ଧରି ସେହି ପରିଚୟରେ ରହି ଆସୁଛନ୍ତି। କିନ୍ତୁ ଏବେ ୫୫୦ କିଷାନ ସମାଜ ନାମରେ ଏକ ଅଣପଞ୍ଜୀକୃତ ସଂଗଠନ ଗଢ଼ି କିଛି ବ୍ୟକ୍ତି ସମଗ୍ର କିଷାନ ଜନଜାତି ସମାଜରେ ବିଶୃଙ୍ଖଳା ସୃଷ୍ଟି କରୁଥିବା ଅଭିଯୋଗ ହୋଇଛି।
କିଷାନ ସମାଜ ପରମ୍ପରା ବିରୋଧୀ ଏକ ରୁଲ ବୁକ ତିଆରି କରି କୁଚିଣ୍ଡା, ବଣାଇଁ , ବାରକୋଟ ଅଞ୍ଚଳରେ ରହୁଥିବା ସମାଜ ଲୋକଙ୍କୁ ନିୟମ ମାନିବାକୁ ବାଧ୍ୟ କରାଯାଉଥିବା ଓ ବିବାହ ସମୟରେ ସଂଗଠନର ଅଣଆପତ୍ତି ଜନକ ପ୍ରମାଣପତ୍ର ନଥିଲେ ବିବାହ ଭାଙ୍ଗି ଦେଉଥିବା କିଷାନ ସମାଜ ସିଧାସଳଖ ଅଭିଯୋଗପତ୍ରରେ ଉଲ୍ଲେଖ କରିଛନ୍ତି।
ତେଣୁ ସମାଜରେ ବିଶୃଙ୍ଖଳା ଓ ଅସ୍ଥିରତା ସୃଷ୍ଟି କରୁଥିବା ଏହି ସଂଗଠନର ରୁଲ୍ ବୁକକୁ ଅସିଦ୍ଧ ଓ ବିବାହ ପାଇଁ ଦିଆଯାଉଥିବା ଅଣଆପତ୍ତ ପ୍ରମାଣପତ୍ରକୁ ଅବୈଧ ଘୋଷଣା କରିବା ସହ ସଂଗଠନ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବୀ ହେଉଛି। ବିଶେଷତଃ ଏହି ସଂଗଠନକୁ ଭାଜପା ନେତା ତଥା କେନ୍ଦ୍ରିକଳା ସରପଞ୍ଚ ଉଗ୍ରସେନ କିଷାନଙ୍କ ନେତୃତ୍ଵରେ ରତ୍ନାକର କିଷାନ, ଭୀମସେନ କିଷାନ, ରୁଷାବ କିଷାନ ପ୍ରମୂଖ ଚଳାଉଥିବାରୁ ତାଙ୍କ ପ୍ରତି ଦୃଢ଼ କାର୍ଯ୍ୟନୁଷ୍ଠାନ ଦାବୀ କରାଯାଇଛି।
