ରଘୁନାଥପୁର,୨୫ା୪(ରାଜେନ୍ଦ୍ର ନାରାୟଣ ସିଂହ)କ୍ରିକେଟରେ ଅଲ୍ରାଉଣ୍ଡର ଭାବେ ପ୍ରଥମେ ରଘୁନାଥପୁର ବ୍ଲକରୁ ଜଗତ୍ସିଂହପୁର ଜିଲା ଏବଂ ଏବେ ରାଜ୍ୟସ୍ତରରେ ସିଲେକ୍ଟ ହୋଇ ରାଜ୍ୟ ପାଇଁ ସୂର୍ଯ୍ୟକାନ୍ତ ଦାସ (୧୬) କ୍ରିକେଟ ଖେଳୁଛନ୍ତି। ଆଶା ଅନେକ ହେଲେ ଅର୍ଥ ସାଜିଛି ବାଧକ। ସରକାରୀ ସ୍ତରରେ ସହଯୋଗ ମିଳିଲେ ନିଜର ଦକ୍ଷତାକୁ ପ୍ରତିପାଦିତ କରିପାରନ୍ତେ ବୋଲି ସେ କହିଛନ୍ତି। ରଘୁନାଥପୁର ବ୍ଲକ କୋରକୋରା ଗ୍ରାମରେ ସୂର୍ଯ୍ୟକାନ୍ତଙ୍କ ଘର। ନବୀନ ଓଡ଼ିଶା ନୂଆ ଓଡ଼ିଶା କାର୍ଯ୍ୟକ୍ରମ ପରିପେକ୍ଷୀରେ ରଘୁନାଥପୁର ବ୍ଲକ ପକ୍ଷରୁ ୧୯ଟି ପଞ୍ଚାୟତରେ କ୍ରୀଡା ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏହି ପ୍ରତିଯୋଗିତାରେ ସୂର୍ଯ୍ୟକାନ୍ତ ପଞ୍ଚାୟତରୁ ବ୍ଲକସ୍ତରୀୟ ଓ ପରେ ଜିଲାସ୍ତରୀୟ କ୍ରିକେଟରେ ମଧ୍ୟ ଅଲରାଉଣ୍ଡର ଭାବେ ସଫଳତା ହାସଲ କରିଥିଲେ। ପରେ ରାଜ୍ୟସ୍ତରୀୟ କ୍ରିକେଟ୍ ପାଇଁ ସେ ସମ୍ବଲପୁରଠାରେ ମନୋନୀତ ହୋଇ ବିହାର ରାଜ୍ୟକୁ କ୍ରିକେଟ ଖେଳିବାକୁ ଯାଇଥିଲେ। ସେଠାରେ ସୂର୍ଯ୍ୟକାନ୍ତ ନିଜର ପରାକାଷ୍ଠା ବଳରେ ସଫଳତା ପାଇ ଉଚ୍ଚ ପ୍ରଶଂସିତ ହୋଇଥିଲେ। ପିତା ଯୋଗେନ୍ଦ୍ର ଦାସ ଓ ମା’ ସସ୍ମିତାଙ୍କ ପୁତ୍ର ସୂର୍ଯ୍ୟକାନ୍ତ ରଘୁନାଥପୁର ବ୍ଲକ ଅନ୍ତର୍ଗତ ଏକ ମଫସଲ ଗ୍ରାମର ଅତ୍ୟନ୍ତ ଗରିବ ପରିବାରରେ ଜନ୍ମ ହୋଇଥିଲେ। ତାଙ୍କର ପିଲାଟି ଦିନରୁ କ୍ରିକେଟ ଖେଳ ପ୍ରତି ଅଧିକ ଆଗ୍ରହ ରହିଥିଲା। ଗ୍ରାମାଞ୍ଚଳରେ କ୍ରିକେଟ ପ୍ରତିଯୋଗିତା ହେଉ କି ବିଦ୍ୟାଳୟସ୍ତରରେ ସେ ଅନେକ ଟ୍ରଫି ହାସଲ କରି ଗ୍ରାମ ପାଇଁ ଗୌରବ ଆଣିପାରିଛନ୍ତି। ଯଦି ସୂର୍ଯ୍ୟକାନ୍ତଙ୍କୁ ସରକାରଙ୍କ ପକ୍ଷରୁ ମାଗଣାରେ କ୍ରିକେଟ କୋଚିଂ ଦିଆଯିବାର ବ୍ୟବସ୍ଥା କରାଯାଇପାରନ୍ତା, ତେବେ ସେ ଏକ ଉଚ୍ଚକୋଟୀର କ୍ରିକେଟର ହୋଇ ଓଡ଼ିଶା ପାଇଁ ଅନେକ ଗୌରବ ଆଣିପାରିବେ ବୋଲି ଗଣମାଧ୍ୟମକୁ ଏକ ସାକ୍ଷାତ୍କାରରେ କହିଛନ୍ତି। ଆମ ଓଡ଼ିଶା ନବୀନ ଓଡ଼ିଶା କ୍ରୀଡ଼ା ପ୍ରତିଯୋଗିତାରେ ସଫଳତା ହାସଲ କରି ରାଜ୍ୟ ପାଇଁ ଖେଳୁଥିବା ଯୁବ କ୍ରିକେଟର ସୂର୍ଯ୍ୟକାନ୍ତଙ୍କୁ ସରକାରୀ ସୁବିଧା ସୁଯୋଗ ଯୋଗାଇଦେବାକୁ ସରପଞ୍ଚଙ୍କ ପ୍ରତିନିଧି ଚନ୍ଦ୍ରକାନ୍ତ ପଣ୍ଡାଙ୍କ ସହ ଅଞ୍ଚଳବାସୀ ଜିଲାପାଳ ଓ ସରକାରଙ୍କୁ ଅନୁରୋଧ କରିଛନ୍ତି।
