ଥୁଆମୂଳ ରାମପୁର,୨୨ା୧୧(ଦୁର୍ଗା କୀର୍ତ୍ତି)- କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ସଦରଠାରେ ରାଜାରାଜୁଡ଼ା ଅମଳର ପୁରୁଷୋତ୍ତମ ସାଗର ଓ ଆଡିବନ୍ଧ ସାଗର ନାମରେ ୨ ପୋଖରୀ ରହିଛି। ଏହାର ପୁନରୁଦ୍ଧାର ଓ ସୌନ୍ଦର୍ଯ୍ୟକରଣ ନାମରେ ଲକ୍ଷାଧିକ ଟଙ୍କା ଖର୍ଚ୍ଚ ହୋଇଥିଲେ ବି ଆଖିଦୃଶିଆ କାମ ହୋଇ ନ ଥିବା ଲୋକେ ଅଭିଯୋଗ କରି ଅସନ୍ତୋଷ ପ୍ରକାଶ କରିଛନ୍ତି। ସୂଚନା ଅନୁସାରେ ଏହି ଦୁଇ ପୋଖରୀର ପୁନରୁଦ୍ଧାର ଓ ସୌନ୍ଦର୍ଯ୍ୟକରଣ ପାଇଁ ଡିଏମ୍ଏଫ୍ ପାଣ୍ଠିରୁ ଆର୍ଥିକବର୍ଷ ୨୦୨୩-୨୪ରେ ୨୦ ଲକ୍ଷ ଲେଖାଏ ଟଙ୍କା ଖର୍ଚ୍ଚ କରାଯାଇଥିଲା। ସେହିପରି ଏମ୍ଜିଏନ୍ଆର୍ଇଜିଏସ୍ ଓ ପଞ୍ଚଦଶ ଓଡ଼ିଶା ଷ୍ଟେଟ ଫାଇନାନ୍ସ କମିଶନରେ ଆର୍ଥିକବର୍ଷ ୨୦୨୩-୨୪, ୨୦୨୪-୨୫ରେ ୫ରୁ ୧୦ ଲକ୍ଷ ଏବଂ ବ୍ଲକ ପାଣ୍ଠି ମିଶାଇ ପାଖାପାଖି ୫୦ ଲକ୍ଷ ଟଙ୍କା ଖର୍ଚ୍ଚ ହୋଇଛି। ହେଲେ ଦୁଇ ଗୋଟି ପୋଖରୀରେ ପୂର୍ବ ଅପେକ୍ଷା ଅଧିକ ପଙ୍କ ଏବଂ ଚାରିଆଡ଼େ ଅନାବନା ଗଛଲତା ଉଠିଛି। ଏହା ଦ୍ୱାରା ପୋଖରୀ ପାଣି ପ୍ରଦୂଷିତ ହୋଇପଡିଛି। ପୋଖରୀ ପୁନରୁଦ୍ଧାର ନାମରେ ଅର୍ଥ ଆତ୍ମସାତ୍ କରାଯାଇଥିବା ଅଭିଯୋଗ କରି ଅଞ୍ଚଳବାସୀ ଏହାର ଉଚ୍ଚସ୍ତରୀୟ ତଦନ୍ତ ଦାବି କରୁଛନ୍ତି। ଏ ନେଇ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଟଙ୍କଧର ସାହୁଙ୍କୁ ପଚାରିବାରୁ ପୋଖରୀ ପୁନରୁଦ୍ଧାର ପାଇଁ ବର୍ତ୍ତମାନ ପଞ୍ଚାୟତରୁ ୪ଲକ୍ଷ ଦେଇଛୁ, ବହୁ ଶୀଘ୍ର ପୁଣି କାମ ଆରମ୍ଭ କରାଯିବ। କନିଷ୍ଠ ଯନ୍ତ୍ରୀ ସତ୍ୟ ନାରାୟଣ ବେହେରାଙ୍କୁ ପଚାରିବାରୁ ପୂର୍ବରୁ ଯାହା କାମ ସରିଛି, ବର୍ତ୍ତମାନ ଆମ ପାଖରେ ଆହୁରି ପାଣ୍ଠି ଅଛି, ସପ୍ତାହେ ମଧ୍ୟରେ ଯାହା କାମ ରହିଯାଇଛି ଆରମ୍ଭ କରିବୁ ବୋଲି କହିଛନ୍ତି।
