ଅହମ୍ମଦାବାଦ,୨୦।୩: ୨୦୧୪ ଆଇପିଏଲର ପର୍ପଲ କ୍ୟାପ୍ ଅଧିକାରୀ ମୋହିତ ଶର୍ମାଙ୍କୁ ନେଟ୍ ବୋଲର ଭାବେ ଦଳରେ ସାମିଲ କରିଛି ନୂଆ ଫ୍ରାଞ୍ଚାଇଜ ଗୁଜରାଟ ଟାଇଟନ୍ସ। ଏହା କ୍ରିକେଟ ପ୍ରଶଂସକଙ୍କୁ ଚକିତ କରି ଦେଇଛି। ମୋହିତଙ୍କ ସହିତ ବାମ ହାତୀ ପେସର ବରିନ୍ଦର ସ୍ରନ ମଧ୍ୟ ନେଟ୍ ବୋଲର ଭାବେ ଟାଇଟନ୍ସ କ୍ୟାମ୍ପରେ ଯୋଗ ଦେଇଛନ୍ତି।
୨୦୧୪ରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ପକ୍ଷରୁ ପ୍ରତିନିଧିତ୍ୱ କରିଥିବା ମୋହିତ ୧୬ ମ୍ୟାଚ୍ରେ ସର୍ବାଧିକ ୨୩ ଉଇକେଟ ନେଇଥିଲେ। ୩୩ ବର୍ଷୀୟ ପେସରଙ୍କ ପ୍ରତି ଅକଶନରେ କୌଣସି ଫ୍ରାଞ୍ଚାଇଜ ଇଚ୍ଛା ପ୍ରକଟ କରି ନ ଥିଲେ।
ହରିୟାନା ଖେଳାଳି ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱରେ ୨୦୧୩ରୁ ୨୦୧୫ ପର୍ଯ୍ୟନ୍ତ ଖେଳିଥିଲେ। ୨୦୧୬ ରୁ ୧୮ କିଙ୍ଗ୍ସ ଏକାଦଶ ପଞ୍ଜାବ (ଏବେ ପଞ୍ଜାବ କିଙ୍ଗ୍ସ) ପାଇଁ ଖେଳିବା ପରେ ସେ ପୁଣି ଫେରିଥିଲେ ସିଏସ୍କେ କ୍ୟାମ୍ପକୁ। ସେ ୨୦୨୦ରେ ଯୋଡ଼ି ହୋଇଥିଲେ ଦିଲ୍ଲୀ କ୍ୟାପିଟାଲ୍ସ ସହ। କେବଳ ଏତିକି ନୁହେଁ ସେ ୨୦୧୪ ଟି୨୦ ବିଶ୍ୱକପ୍ ଏବଂ ୨୦୧୫ ଦିନିକିଆ ବିଶ୍ୱକପ୍ରେ ଭାରତୀୟ ଦଳ ପାଇଁ ଖେଳିଥିଲେ। ମୋଟ ଉପରେ ଅନ୍ତର୍ଜାତୀୟ ସ୍ତରରେ ୨୬ ଦିନିକିଆ ଏବଂ ୮ ଟି୨୦ ମ୍ୟାଚ୍ ଖେଳିଛନ୍ତି।
