ଭୁବନେଶ୍ୱର,୧୩।୬: ଶପଥ ନେଇଛନ୍ତି ଓଡ଼ିଶାରେ ଭାଜପାର ପ୍ରଥମ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ମୋହନ ଜଣେ ଆଦିବାସୀ ନେତା ଅଟନ୍ତି। ଏଥିସହ ଓଡ଼ିଶାକୁ ୨୪ବର୍ଷ ପରେ ଦୁଇ ଉପମୁଖ୍ୟମନ୍ତ୍ରୀ ମିଳିଛନ୍ତି। ସେମାନେ ହେଲେ ପ୍ରଥମ ଥର ବିଧାୟକ ହୋଇଥିବା ପ୍ରଭାତି ପରିଡା ଓ ବରିଷ୍ଠ ବିଧାୟକ କନକବର୍ଦ୍ଧନ ସିଂ ଦେଓ। ତେବେ ମୁଖ୍ୟମନ୍ତ୍ରୀ ଓ ଦୁଇ ଉପ ମୁଖ୍ୟମନ୍ତ୍ରୀଙ୍କ ସହ ୧୩ଜଣ ମନ୍ତ୍ରୀ ଶପଥ ନେଇଛନ୍ତି। ୮ଜଣ କ୍ୟାବିନେଟ ମନ୍ତ୍ରୀ ଭାବେ ଶପଥ ନେଇଥିବାବେଳେ ୫ଜଣ ରାଷ୍ଟ୍ରମନ୍ତ୍ରୀ ଭାବେ ଶପଥ ନେଇଛନ୍ତି। ତେବେ ମୋହନଙ୍କ ସରକାରରେ କାହାକୁ କେଉଁ ବିଭାଗ ମିଳିବ ଏନେଇ କଳ୍ପନାଜଳ୍ପନା ଆରମ୍ଭ ହୋଇ ଯାଇଛି। ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ପରଠାରୁ ଚର୍ଚ୍ଚା ଲାଗି ରହିଛି। ଆଶା କରାଯାଉଛି ଏନେଇ ଆଜି ଆସିପାରେ ପୋର୍ଟଫୋଲିଓ ।
୮ଜଣ କ୍ୟାବିନେଟ ପାହ୍ୟା ପାଇଥିବା ମନ୍ତ୍ରୀମାନେ ହେଲେ, ସୁରେଶ ପୂଜାରୀ, ରବି ନାରାୟଣ ନାୟକ, ନିତ୍ୟାନନ୍ଦ ଗଣ୍ଡ, କୃଷ୍ଣଚନ୍ଦ୍ର ପାତ୍ର, ପୃଥ୍ବୀରାଜ ହରିଚନ୍ଦନ, ଡ. ମୁକେଶ ମହାଲିଙ୍ଗ, ବିଭୂତି ଭୂଷଣ ଜେନା ଓ ଡ. କୃଷ୍ଣଚନ୍ଦ୍ର ମହାପାତ୍ର।
ରାଷ୍ଟ୍ରମନ୍ତ୍ରୀ ହେଲେ, ଗଣେଶ ରାମ ସିଂ ଖୁଣ୍ଟିଆ, ସୂର୍ଯ୍ୟବଂଶୀ ସୂରଜ, ପ୍ରଦୀପ ବଳସମାନ୍ତ, ଗୋକୁଳାନନ୍ଦ ମଲ୍ଲିକ ଓ ସମ୍ପଦ ସ୍ବାଇଁ।
ତେବେ ଏମାନଙ୍କୁ ଛଡା ଅନ୍ୟ କେତେଜଣ ଦାବିଦାରଙ୍କୁ ମଧ୍ୟ ମନ୍ତ୍ରୀମଣ୍ଡଳରେ ସ୍ଥାନ ପାଇବାର ସମ୍ଭାବନା ରହିଛି। ବିଧାନସଭାକୁ ପ୍ରଥମ ଏଣ୍ଟ୍ରିରେ ମନ୍ତ୍ରୀ ହୋଇଥିବା ୭ ବିଧାୟକଙ୍କୁ ଆଜି ବିଭାଗ ବଣ୍ଟନ କରାଯିବ । କୁହାଯାଉଛି କି, ବିଜେଡି ସଭାପତି ଓ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କଣ୍ଟାବାଞ୍ଜିରେ ହରାଇ ପ୍ରଚଣ୍ଡ ବିଜୟ ହାସଲ କରିଥିବା ଲକ୍ଷ୍ମଣ ବାଗ୍ଙ୍କୁ ମଧ୍ୟ କୌଣସି ବିଭାଗ ମିଳିପାରେ। ଏଥିସହ ଛତିଶଗଡ ରାଜ୍ୟପାଳଙ୍କ ପୁଅ ପୃଥୀରାଜ ହରିଚନ୍ଦନଙ୍କୁ କିଛି ବଡ଼ ବିଭାଗ ମଧ୍ୟମିଳିପାରେ ବୋଲି ଚର୍ଚ୍ଚା ହେଉଛି।
ଏକ ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ଏହି ଲିଷ୍ଟରେ ବାବୁ ସିଂ, ଇରାସିସ ଆଚାର୍ଯ୍ୟ, ସଞ୍ଜାଳି ମୁର୍ମୁ, ଶତ୍ରୁଘ୍ନ ଜେନା,ନବୀନ କୁମାର ଜୈନ, ସରୋଜ କୁମାର ପ୍ରଦାନ, ଦୁର୍ଗା ପ୍ରସାଦ ନାଏକ, ପ୍ରଦ୍ୟୁମ୍ନ କୁମାର ନାଏକଙ୍କୁ ମଧ୍ୟ ମନ୍ତ୍ରୀମଣ୍ଡଳରେ ସ୍ଥାନ ମିଳିପାରେ।
ଏଥିସହ ରଣପୁର ବିଧାୟିକା ତଥା ଭାଜପାର ବରିଷ୍ଠ ନେତ୍ରୀ ସୁରମା ପାଢୀଙ୍କୁ ବାଚସ୍ପତି ପଦ ମିଳିପାରେ ବୋଲି ଆଲୋଚନା ହେଉଛି।
କହିରଖୁଛୁ କି, ଓଡ଼ିଶା ମନ୍ତ୍ରୀମଣ୍ଡଳର ମୁଖ୍ୟମନ୍ତ୍ରୀଙ୍କ ସମେତ ୨୨ଜଣ ମନ୍ତ୍ରୀ ରହିପାରିବେ। ଏବେଯାଏ ମୁଖ୍ୟମନ୍ତ୍ରୀ ଓ ଉପ ମୁକ୍ୟମନ୍ତ୍ରୀଙ୍କ ସମେତ ୧୬ଜଣଙ୍କୁ ମନ୍ତ୍ରୀମଣ୍ଡଳରେ ସ୍ଥାନ ମିଳିଛି। ୮ଜଣଙ୍କୁ କ୍ୟାବିନେଟ ମନ୍ତ୍ରୀ ପାହ୍ୟା ମିଳିଥିବାବେଳେ ୫ଜଣଙ୍କୁ ରାଷ୍ଟ୍ରପାହ୍ୟା ମିଳିଛି। ତେବେ ଆହୁରି ୬ଜଣଙ୍କୁ ମନ୍ତ୍ରୀ ପଦ ମିଳିପାରେ ବୋଲି ଆଲୋଚନା ହେଉଛି। ଆଜି ସଂଧ୍ୟା ସୁଦ୍ଧା ଏନେଇ ସ୍ପଷ୍ଟ ସୂଚନା ମିଳପାରେ ବୋଲି କୁହାଯାଉଛି।
