ନୂଆଦିଲ୍ଲୀ,୧୪।୧: ଆଦିବାସୀ ସମ୍ପ୍ରଦାୟ ପାଇଁ ଲୋକ ସଭାରେ ୪୭ ଟି ଆସନ ସଂରକ୍ଷିତ ରହିଛି, ଯାହା ଦେଶର ଜନସଂଖ୍ୟାର ପ୍ରାୟ ୯ ପ୍ରତିଶତ ଅଟେ। ୨୦୧୪ରେ ଭାଜପା ଏଥିରୁ ୨୭ଟି ଆସନରେ ଜିତିଥିଲା। ୨୦୧୯ ନିର୍ବାଚନରେ ଏହି ସଂଖ୍ୟା ୩୧କୁ ବୃଦ୍ଧି ପାଇଛି। ଭାଜପା ଏହାର ପ୍ରଦର୍ଶନରେ ଉନ୍ନତି ଆଣିବାକୁ ଚାହୁଁଛି। ଏଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଫେବୃୟାରୀରେ ଝାଡ଼ଖଣ୍ଡ-ଗୁଜରାଟରେ ଦୁଇଟି ରାଲିରେ ସମ୍ବୋଧିତ କରିପାରନ୍ତି। ଆଦିବାସୀ ସମାଜକୁ ଦୃଷ୍ଟିରେ ରଖି ଆୟୋଜିତ ହେବାକୁ ଥିବା ଏହି ସମ୍ମିଳନୀ ମାଧ୍ୟମରେ ପ୍ରଧାନମନ୍ତ୍ରୀ ଏହି ୪୭ଟି ଆସନରେ ଦଳର ବିଜୟ ନିଶ୍ଚିତ କରିବାକୁ ଚେଷ୍ଟା କରିବେ।
‘ପ୍ରଧାନମନ୍ତ୍ରୀ ଜନ ମନ ଯୋଜନା’ ମାଧ୍ୟମରେ ଆଦିବାସୀ ସମାଜର ସ୍ଥିତି ସୁଧାରିବା ପାଇଁ କେନ୍ଦ୍ର ସରକାର ଏକ ସ୍ବତନ୍ତ୍ର ଅଭିଯାନ ଆରମ୍ଭ କରିଥିଲେ। ଏହା ଅଧୀନରେ ୯ ପ୍ରମୁଖ ମନ୍ତ୍ରଣାଳୟ ଦେଶର ୧୦୦ଟି ଆଦିବାସୀ ପ୍ରାଧାନ୍ୟ ଜିଲାରେ ଆଦିବାସୀ ସମ୍ପ୍ରଦାୟ ମଧ୍ୟରେ ଶିବିର ସ୍ଥାପନ କରି ସେମାନଙ୍କ ବିକାଶ ପାଇଁ କାର୍ଯ୍ୟ କରିବାକୁ ଯାଉଥିଲେ। ଏହା ଅଧୀନରେ ସମସ୍ତ ଆଦିବାସୀଙ୍କ ଆଧାର କାର୍ଡ ତିଆରି କରିବା, ଜନ ଧନ ଖାତା ଖୋଲିବା, ଆୟୁଷ୍ମାନ ଯୋଜନା ଏବଂ ଉଜ୍ୱଳା ଯୋଜନାର ଲାଭ ପ୍ରଦାନ କରିବା, କିଷାନ କ୍ରେଡିଟ କାର୍ଡ ତିଆରି କରିବା ଏବଂ ଯୋଗ୍ୟ କୃଷକମାନଙ୍କୁ ପ୍ରଧାନମନ୍ତ୍ରୀଙ୍କ ଆର୍ଥିକ ସହାୟତା ଯୋଜନାର ସୁବିଧା ପ୍ରଦାନ କରିବା ଉଦ୍ଦେଶ୍ୟ ଥିଲା। ଏଥିପାଇଁ ୨୪ ହଜାର କୋଟି ଟଙ୍କା ମଧ୍ୟ ଅନୁମୋଦନ କରାଯାଇଛି।